YAP Gənclər Birliyi Ümummilli lider Heydər Əliyevin 90 illik yubileyi ilə bağlı layihələrini yekunlaşdırıb

Bakı:

23 °C

63 %

11 m/s

AZ RU EN

Ana səhifə / YAP xəbərləri / YAP Gənclər Birliyi Ümummilli lider Heydər Əliyevin 90 illik yubileyi ilə bağlı layihələrini yekunlaşdırıb

YAP Gənclər Birliyi Ümummilli lider Heydər Əliyevin 90 illik yubileyi ilə bağlı layihələrini yekunlaşdırıb

11.05.2013 [10:24]

Mübariz Qurbanlı: Ümummilli liderimiz Heydər Əliyev həmişə Azərbaycan xalqının mənafeyini düşünən bir öndər olub, bu istiqamətdə apardığı ardıcıl və məqsədyönlü siyasət Onun bütün fəaliyyətinin əsasını təşkil edib
Xəbər verdiyimiz kimi, Yeni Azərbaycan Partiyasının Gənclər Birliyi müasir Azərbaycan dövlətinin qurucusu, Ümummilli lider Heydər Əliyevin anadan olmasının 90 illik yubileyi münasibətilə silsilə tədbirlər keçirib. Bu münasibətlə yekun tədbir isə mayın 10-da YAP Gənclər Birliyinin Ofisində gerçəkləşib. Tədbirdə Yeni Azərbaycan Partiyası İcra katibinin müavini, millət vəkili Mübariz Qurbanlı iştirak edib. Mübariz Qurbanlı Ümummilli lider Heydər Əliyevlə olan görüşlərindən, Ulu öndərin xalqımız və dövlətimiz qarşısındakı xidmətlərindən ətraflı şəkildə bəhs edib.
Millət vəkili deyib ki, Ulu öndər Heydər Əliyevin Azərbaycan tarixində yeri və rolu uzun müddət müzakirə ediləcək. Onun sözlərinə görə, hələ sovetlər hakimiyyəti dövründə Azərbaycan xalqında milli hisslərin oyanması və güclənməsində Ulu öndərin fəaliyyətinin müstəsna rolu olub: “Heydər Əliyevin xalqımız qarşısında xidmətləri o qədər böyük və zəngindir ki, bu, zaman-zaman tədqiqatlar mövzusu olacaq. Ümummilli liderimizin fəaliyyəti Azərbaycanın dünəni, bu günü və gələcəyinə hesablanmış fəaliyyətdir. Ulu öndərimiz keçmişə istinad edərək bu günümüzü necə qurmağı və gələcəyimiz üçün hansı işlər görülməsinin nümunəsini bizə göstərdi. Hesab edirəm ki, bu, hər bir millətin inkişafında əsas şərtlərdən biridir. Yəni, Ümummilli liderimiz düzgün seçimin yolunu göstərdi ki, ölkəmizin və xalqımızın inkişafı, tərəqqisi üçün hansı mərhələlərdən keçməyimiz vacibdir. Heydər Əliyevin bu günə hesablanmış fəaliyyəti hər birimizin gözü qarşısında baş verib. Yaxın tariximizə nəzər salsaq, bu tarixə münasibətin özünü də aydın şəkildə dərk edirik”.
YAP İcra katibinin müavini deyib ki, Azərbaycanın son on illiklər ərzində qazandığı uğurlar Ulu öndər Heydər Əliyevin fəaliyyəti ilə birbaşa bağlıdır. Onun sözlərinə görə, 1969-cu ildə Heydər Əliyevin Azərbaycana rəhbər seçilməsi, əslində, çağdaş tariximizə ölkəmizin sürətli və uzunmüddətli inkişafının əsasını qoyması kimi daxil olub: “Ümummilli liderimiz Heydər Əliyev həmişə Azərbaycan xalqının mənafeyini düşünən bir öndər olub, bu istiqamətdə apardığı ardıcıl və məqsədyönlü siyasət Onun bütün fəaliyyətinin əsasını təşkil edib. Bu gün Azərbaycanda həyata keçirilən böyük tədbirlər məhz Heydər Əliyevin ölməz ideyalarının həmişəyaşar, əbədi olduğunu bir daha sübut edir. Ulu öndərimizin uzaqgörənliyi, müdrikliyi və fədakarlığı bu şəxsiyyəti təkcə Azərbaycan xalqının deyil, bütün dünya azərbaycanlılarının liderliyinə yüksəldib, Onun ömür yolu isə Vətənə xidmətin parlaq nümunəsinə çevrilib. Bütün şüurlu həyatını xalqına və Vətəninə həsr etmiş Ümummilli liderimiz Heydər Əliyev Azərbaycan xalqının tarixinə müstəqilliyimizin memarı və qurucusu kimi daxil olub. Yorulmaz, çoxşaxəli və zəngin fəaliyyəti Azərbaycanı sürətli inkişaf yoluna çıxarıb və şübhə yoxdur ki, yaxın illərdə ölkəmiz dünyanın ən güclü dövlətlərindən birinə çevriləcək”.
Millət vəkili qeyd edib ki, müasir müstəqil Azərbaycan dövləti Ulu öndər Heydər Əliyevin gərgin zəhmətinin, qətiyyətli siyasətinin bəhrəsidir. Onun sözlərinə görə, Azərbaycanın bugünkü inkişaf strategiyasının müəllifi də məhz Ümummilli liderimizdir. M.Qurbanlı Ulu öndər Heydər Əliyevin Azərbaycan gəncliyi üçün gördüyü işlərdən də geniş söhbət açıb, bu gün də bu siyasi xəttin Prezident İlham Əliyev tərəfindən uğurla davam etdirildiyini gənclərin diqqətinə çatdırıb. Sonra gənclərin Ümummilli lider Heydər Əliyevlə bağlı fikirləri dinlənilib, onları maraqlandıran suallar cavablandırılıb.
Tədbir iştirakçıları, həmçinin, YAP Gənclər Birliyinin Ofisində Ulu öndər Heydər Əliyevin həyat və fəaliyyətini özündə əks etdirən fotosərgiyə tamaşa ediblər.
Daha sonra gənclər Sahil bağında “Heydər Əliyev irsini öyrənək!” adlı flaşmob keçiriblər. Flaşmobda əllərində Heydər Əliyev irsindən bəhs edən kitablar tutan gənclərin bu tədbiri şəhər sakinləri tərəfindən maraqla qarşılanıb.
Nardar BAYRAMLI

Paylaş:

Baxılıb: 1443 dəfə