ABŞ konqresmenlərindən Xocalı soyqırımı ilə bağlı bəyanat...

Bakı:

27 °C

65 %

7 m/s

Əlaqə

AZ RU EN

Ana səhifə / Xəbər lenti / ABŞ konqresmenlərindən Xocalı soyqırımı ilə bağlı bəyanat...

ABŞ konqresmenlərindən Xocalı soyqırımı ilə bağlı bəyanat...

01.03.2022 [10:01]

Nardar BAYRAMLI

ABŞ Konqresinin iki üzvü Xocalı soyqırımının 30-cu ildönümü ilə bağlı bəyanatla çıxış ediblər. Konqresin Nümayəndələr Palatasının respublikaçı üzvü, Arizona ştatını təmsil edən Pol Qosar bəyanatında 26 fevral 1992-ci il tarixində Sovet İttifaqının dağılmasından sonra yaranmış Ermənistan-Azərbaycan Dağlıq Qarabağ münaqişəsi zamanı faciəvi hadisənin qeydə alındığını, Xocalı şəhərində 613 mülki əhalinin qətlə yetirildiyini bildirib.

Konqres üzvü qeyd edib ki, baş verənlərin dəyişdirilməsi mümkün deyil, lakin qurbanların xatirəsini yad etmək və bütün dünyaya mülki əhalinin hədəf alınmasının heç zaman qəbul edilməyəcəyini xatırlatmaq mümkündür. Konqres üzvü ABŞ-ın bir daha eyni taleyi başqalarının yaşamaması naminə Xocalıda həyatını itirənlərin xatirəsini yad etdiyini və sülhün tərəfdarı olduğunu bildirib.

ABŞ Konqresinin Nümayəndələr Palatasının demokrat üzvü, Azərbaycan üzrə İşçi Qrupun həmsədri, Tennesi ştatını təmsil edən Stiv Kohen isə bəyanatında Azərbaycanın Qarabağ bölgəsində yüzlərlə azərbaycanlının qətlə yetirilməsinin 30-cu ildönümünün anıldığını bildirib. Konqres üzvü, həmçinin Azərbaycan və Ermənistan arasında sülhün bərqərar olacağına ümidvar olduğunu, uzunmüddətli sülh, təhlükəsizlik və regional əməkdaşlığın Cənubi Qafqaz regionunun maraqlarına uyğun olduğunu söyləyib.

Qəzetimizə açıqlama verən Milli Məclisin deputatı Elman Məmmədov hesab edir ki, ABŞ konqresmenlərinin Xocalı soyqırımı ilə əlaqədar bəyanat vermələri bizim siyasi uğurumuzdur. Onun sözlərinə görə, dövlətimiz Xocalı soyqırımının dünyada tanınması istiqamətində sistemli tədbirlər həyata keçirir: “Görülən işlər öz nəticəsini verməkdədir. 2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış “Xocalıya ədalət!” beynəlxalq kampaniyası hazırda uğurla davam etdirilir. Görülən işlərin nəticəsidir ki, İslam Əməkdaşlıq Təşkilatı Parlament İttifaqının, Meksika, Pakistan, Çexiya, Peru, Kolumbiya, Panama, Honduras, Sudan, Qvatemala və Cibuti parlamentlərinin müvafiq sənədlərində Xocalıda törədilmiş kütləvi qətllərin soyqırımı aktı olduğu təsdiq edilib. Rumıniya, Bosniya və Hersoqovina, Serbiya, İordaniya, Sloveniya, Şotlandiya parlamentləri, eləcə də ABŞ-ın 20-dən çox ştatının icra və qanunvericilik orqanları Xocalı faciəsini qətliam kimi qiymətləndirərək qətiyyətlə pisləyiblər. Bu günlərdə isə Kanada Azərbaycanlıları Şəbəkəsinin təşkilatçılığı ilə Kanada parlamentinə Xocalı qətliamına dair petisiya təqdim edilib. Avropa Şurası Parlament Assambleyasında da Xocalı soyqırımının 30-cu ildönümü ilə bağlı sənəd yayıldı. Bir sıra ölkələrdə kütləvi tədbirlər təşkil olundu. ABŞ Konqresinin üzvlərinin bəyanatları görülən işlərin nəticəsidir. Düşünürəm ki, bu gün diasporumuz bu istiqamətdə daha böyük işlər görə bilər və bu prosesdə türk diasporu ilə birgə addımlar atılmalıdır. Belə olarsa, gücümüz ikiqat artacaq. Hesab edirəm ki, bundan sonra da hər birimiz Xocalı faciəsinin tanıdılması və onu törədənlərin layiqli cəzalarını almaları üçün var qüvvəmizlə çalışmalıyıq”.

Paylaş:

Baxılıb: 792 dəfə