Avropa Parlamenti, yoxsa Ermənistan parlamenti?

Bakı:

22 °C

68 %

3 m/s

Əlaqə

AZ RU EN

Ana səhifə / Analitik / Avropa Parlamenti, yoxsa Ermənistan parlamenti?

Avropa Parlamenti, yoxsa Ermənistan parlamenti?

11.03.2022 [23:59]

Erməni lobbisinin girovluğunda olan AP siyasi oyuncağa çevrilib

Qurum erməni vandalizminə dəstək xarakterli “təşəbbüs”lərin ünvanıdır

Nurlan QƏLƏNDƏRLİ

Avropa Parlamenti (AP) yenidən siyasi şou səhnəsinə çevrildi. İclas adı altında növbəti absurd teatr tamaşası səhnəyə qoyuldu. Məsələ və məqsəd bu dəfə də ermənilərin “məzlum, əzilən toplum” kimi təqdim edilməsi idi. Erməni lobbisinin qidalandırdığı siyasi korrupsionerlər - avropalı bəzi parlamentarilər timsah göz yaşları axıdaraq barbarların “dərdinə şərik oldular”. Söhbət AP-də Azərbaycan əleyhinə “Dağlıq Qarabağda mədəni irsin məhv edilməsi haqqında” qətnamənin qəbul edilməsindən gedir.

Təbii ki, bu, Azərbaycan ictimaiyyəti tərəfindən haqlı narazılıqla qarşılanır, qəbuledilməz və yolverilməz hesab edilir. Yeri gəlmişkən, Milli Məclisin Beynəlxalq münasibətlər və parlamentlərarası əlaqələr komitəsi, Azərbaycan QHT-ləri bununla əlaqədar bəyanat yayıblar.

Əlbəttə, Avropa Parlamentində erməni lobbisinin girovluğunda olan bir qrup deputatın təşəbbüsü və canfəşanlığı ilə Azərbaycan əleyhinə qərəzli qətnamənin qəbul edilməsi heç nəyi dəyişmir. Əvvəla, belə kağız parçalarının heç bir hüquqi qüvvəsi və siyasi təsir mexanizmi yoxdur. İkincisi, bununla reallıqları təhrif etmək, erməni vandalizmini və Ermənistanın hərbi-siyasi cinayətlərini gizlətmək, diqqəti bu məsələlərdən yayındırmaq mümkün deyil. Üçüncüsü isə, beynəlxalq ictimaiyyət belə təşəbbüslərin haradan gəldiyini, “qətnamə” adlandırılan kağız parçalarının kimlərin fəallığı ilə qəbul edildiyini yaxşı bilir. Məlumat üçün qeyd edək ki, sənədin müəlliflərindən biri Hollandiyadakı Xristian-Demokrat Partiyasının (ChristenUnie, CU) funksioneri, Avropa Xalq Partiyasının rəhbərlərindən olan Piter van Dalendir. Dalen parlamentaridən daha çox, siyasi-ideoloji ekstremist təsiri bağışlayır. Onun hansı “əqidə-mənəviyyat” daşıyıcısı və hansı mövqe sahibi olduğunu bilmək üçün bu sözlərinə diqqət yetirmək kifayətdir: “Avropada müsəlmanların sayının artması çox böyük təhlükədir. Türkiyənin Avropa İttifaqında yer almasını qətiyyən yolverilməz saydığım kimi, hesab edirəm ki, Avropa ölkələrindəki iqtisadi problemlərin əsas səbəblərindən biri sekulyarlaşmadır. Biz xristian dəyərlərini unuduruq, qloballaşırıq, hətta müsəlmanlarla yanaşı yaşamağın normal olduğunu deyirik. Halbuki dünyada intellektual və mədəniyyət, sivilizasiya və bacarıq baxımından güclü xalqlarla zəif xalqlar var”. Piterin bu mövqeyi irqçi, nasist, islamofob və barbar yanaşmadan başqa bir şey deyil. Belə olan halda, onun kimilərin pul qarşılığında, çirkin niyyət və çirkli siyasi məqsədlər naminə erməni vandalizminə haqq qazandırmaları, Azərbaycan əleyhinə “qara piar” kampaniyası aparmaları təəccüblü görünmür. Təəssüf doğuran odur ki, Avropa İttifaqının qurumu olan AP siyasi oyuncağa çevrilib, gah separatizmə, gah erməni vandalizminə dəstək verən, gah da beynəlxalq ictimaiyyəti aldatmağa yönəlmiş “təşəbbüs”lərə ev sahibliyi edir.

AP-nin deputatları “Avropa dəyərləri” adlandırdıqları normaları, o cümlədən insan hüquqlarını, ədalətli yanaşmanı əsas tuturlarsa və ikili standartlardan uzaqdırlarsa... O zaman birmənalı şəkildə ermənilərin Qarabağda mədəni irsimizi, abidələrimizi, məscidlərimizi məhv etməsinə dair müzakirələr aparmalı, müvafiq qərar qəbul etməlidirlər. Onlara da yaxşı məlumdur ki, ermənilər 30 il ərzində işğal altında saxladıqları Azərbaycan torpaqlarında misli görünməmiş vəhşiliklər törədib, tarixi, dini, mədəni abidələri dağıdıblar, məscidlərimiz təhqir olunub. Bu, əslində, təkcə xalqımıza deyil, bütövlükdə, dünya mədəni irsinə, bəşər sivilizasiyasına qarşı barbarlıq, vandalizm aktı və soyqırımı siyasəti, cinayət əməlidir. Postmüharibə dövrünün reallıqları erməni vandalizminin simasını daha dəqiq əks etdirir. Vəhşi qəbilə kimi kəndlərin, qəsəbələrin, şəhərlərin darmadağın edilməsi, dini abidələrin təhqirə məruz qoyulması erməni barbarizminin sərhəd tanımadığını göstərir. Avropa Parlamentində məlum “qətnaməyə” səs verənlər Ermənistanın Azərbaycana məxsus sərvətləri talamasından, iqtisadi resursları qanunsuz mənimsəməsi və istismar etməsindən, kəndləri, şəhərləri, qəsəbələri dağıtmasından, mədəni irsə qarşı soyqırımı siyasəti həyata keçirməsindən xəbərdardırlar.

Prezident İlham Əliyev bir müddət əvvəl Ağdamda təhqir edilmiş məscidin timsalında erməni vandalizminin simasını bütün dünyaya göstərmişdi. Dövlət başçısı “Bu məscid ermənilər tərəfindən təhqir edilib, burada inəklər, donuzlar saxlanılıb. Ermənilər nəinki Azərbaycan xalqını, bütün müsəlman aləmini təhqir ediblər”, - deyə vurğulamışdı. Erməni lobbisinin girovluğunda olanların, o cümlədən Piter van Dalenin də bu reallıqlardan xəbəri var, şübhəsiz. Amma pul hərisi və erməni faşizminin eybəcər sifətinin heyranıdırlar. Belə olmasaydı, tolerantlıqdan, multikulturalizmdən, ümumbəşəri dəyərlərdən bəhs edən Avropa Parlamenti məscidlər donuz saxlanılan tövləyə çevriləndə susmazdı.

Digər tərəfdən, AP daim hüquqdan - beynəlxalq hüquq normalarına riayət olunmasından danışır. Amma sadəcə danışır... Belə olmasaydı, erməni vandalizmi nəticəsində mədəni abidələrin qəsdən dağıdılması, onların mənsubiyyətinin dəyişdirilməsi və özününkiləşdirilməsinin beynəlxalq humanitar hüququn, xüsusən də 1949-cu il Cenevrə Konvensiyalarının, UNESCO-nun 1954 və 1970-ci il Konvensiyalarının kobud şəkildə pozulması olduğunu qətiyyətlə bəyan edərdi...

Nəhayət, bütün bunlar belə bir sual doğurur: faktları gözardı, reallıqları isə təhrif edərək qərəzli qətnamə qəbul edən qurum Avropa Parlamentidir, yoxsa Ermənistan parlamenti?!

Paylaş:

Baxılıb: 1218 dəfə