Azərbaycan Prezidenti İlham Əliyevə Beynəlxalq Sambo Federasiyası İcraiyyə Komitəsinin qərarı ilə Sambonun Çempion kəməri təqdim edilib

Bakı:

15°C

88%

3m/s

AZ RU EN

Ana səhifə / Gündəm / Azərbaycan Prezidenti İlham Əliyevə Beynəlxalq Sambo Federasiyası İcraiyyə Komitəsinin qərarı ilə Sambonun Çempion kəməri təqdim edilib

Azərbaycan Prezidenti İlham Əliyevə Beynəlxalq Sambo Federasiyası İcraiyyə Komitəsinin qərarı ilə Sambonun Çempion kəməri təqdim edilib

23.06.2015 [09:40]

İyunun 22-də Azərbaycan Respublikasının Prezidenti İlham Əliyev Beynəlxalq Sambo Federasiyasının prezidenti Vasili Şestakov ilə görüşüb.
Qonaq Beynəlxalq Sambo Federasiyası İcraiyyə Komitəsinin qərarı ilə Sambonun Çempion kəmərini dövlətimizin başçısına təqdim edib.
Beynəlxalq Sambo Federasiyasının prezidenti Vasili Şestakov deyib: İcazə verin, belə bir bayramı təşkil etdiyinizə görə təşəkkürümü bildirim. Mən Bakıda hələ 1974-cü ildə olmuşdum. İndi isə gözlərimə inana bilmirəm.
Prezident İlham Əliyev: O vaxtdan Bakıda olmamısınız?
Vasili Şestakov: Xeyr, olmuşam. Amma indi bir daha baxdım. Çox gözəl şəhərdir.
Prezident İlham Əliyev: Çox sağ olun. Şadam ki, gəlmisiniz və belə bir möhtəşəm tədbiri - idman yarışını, sambonu izləyirsiniz.
Vasili Şestakov: Dəstəyinizə görə Sizə təşəkkür edirəm. Çox sağ olun. Çünki məhz Sizin sayənizdə sambo yarışları belə böyük idman tədbirinin proqramına daxil edilib. Hələ Soçidə sambodan söhbət düşəndə bu idman növünün Avropa Oyunlarına daxil edilməsinə görə Sizə təşəkkür bildirildi. Biz də Sizi təbrik etmək və Çempion kəmərini təqdim etmək istərdik.
Vasili Şestakov Sambonun Çempion kəmərini dövlətimizin başçısına təqdim edib.
Prezident İlham Əliyev: Çox sağ olun.
Vasili Şestakov: Belə bir kəmər fəxri prezident kimi Vladimir Vladimiroviçə təqdim edilib. Sambonun Azərbaycanda və bütün dünyada inkişafına göstərdiyiniz böyük xidmətlərə görə Beynəlxalq Sambo Federasiyası İcraiyyə Komitəsinin qərarı ilə Sizə Sambonun Çempion kəmərini təqdim edirik. Bu, ikinci belə kəmərdir. Birincisi Vladimir Vladimiroviç Putinə təqdim olunub.
Prezident İlham Əliyev: Çox sağ olun. Mən işimə verilən qiymətə görə minnətdarlığımı bildirirəm. Siz qeyd etdiyiniz kimi, sambo birinci Avropa Oyunlarının proqramına daxil edilib. Bu Prezident Putinlə mənim birgə təşəbbüsüm idi. Biz bu barədə hələ ötən ilin yazında müzakirə aparmışdıq. Biz Avropa Olimpiya Komitəsinə müraciət etdik ki, sambo ilk Avropa Oyunlarının proqramına daxil edilsin. Deməliyəm ki, Oyunların proqramına daha 7 idman növü üzrə yarışların daxil edilməsi planlaşdırılırdı. On doqquzu artıq müəyyənləşdirilmişdi və yalnız bir idman növü qalırdı. Əlbəttə, biz Avropa Olimpiya Komitəsinə xahişimizi təmin etdiklərinə görə də minnətdarıq. Beləliklə, belə bir gün gəlib çatdı. Həqiqətən də idmanın bu növü bizi birləşdirir.
Beynəlxalq Sambo Federasiyasının prezidenti Vasili Şestakov Azərbaycanda güclü sambo məktəbinin olduğunu və bunun maraqla izləndiyini vurğulayıb.
Prezident İlham Əliyev: Bu, sambonun gələcəkdə Olimpiya Oyunlarının proqramına daxil edilməsinə aparan yoldur. Bu idman növü bizdə çox sevilir. Bu yarışlardan sonra, fikrimcə, sambo bölməsinə axın daha da artacaq. Çünki hamı gözəl bilir ki, cüdo Olimpiya idman növü olduğuna görə gəncləri və uşaqları özünə daha çox cəlb edir. Hamı Olimpiya çempionu olmaq istəyir. Biz sambonu da bu cür dəstəkləyirik və dəstəkləyəcəyik.
Vasili Şestakov: Ümid edirəm ki, Sizin dəstəyinizlə sambo Olimpiya Oyunlarına yol tapacaq. Sizin çox məşhur - 7 dəfə dünya çempionunuz Ceyhun Məmmədov var. O, sambonun əfsanəsidir. Buna görə də o, Beynəlxalq Federasiyanın ən yüksək mükafatına - Qızıl nişana layiq görülüb. Tarixdə cəmi bir idmançı bu nişanla mükafatlandırılıb. O, ən yaxşı samboçular onluğuna daxil olub.
Prezident İlham Əliyev: Çox sağ olun.
* * *
Sonra Azərbaycan Sambo Federasiyasının Prezidenti Ceyhun Məmmədov qonaqlarla görüşüb.