Gənclərin vətənpərvərlik tərbiyəsi...

Bakı:

22 °C

68 %

3 m/s

Əlaqə

AZ RU EN

Ana səhifə / MEDİA / Gənclərin vətənpərvərlik tərbiyəsi...

Gənclərin vətənpərvərlik tərbiyəsi...

27.12.2023 [11:05]

Mənəviyyat məsələsidir

Ölkəmizdə milli mənlik şüuruna malik olan gənclər saysız-hesabsızdır. Buna dəfələrlə əmin olmuşuq. Baxmayaraq ki, torpaqlarımız 30 ilə yaxın düşmənin işğalı altında qaldı, lakin Azərbaycan gəncliyi bununla barışmadı. Dövlətimiz bu işğalın aradan qaldırılması üçün sülh yolunu illərlə təklif etdi, qan tökülməməsi üçün danışıqlar apardı. Amma qarşı tərəfin buna məhəl qoymaması, danışıqlara deyil, təxribatlara üstünlük verməsi fonunda 27 sentyabr 2020-ci il tarixində başlayan, 44 gün davam edən müharibədə Prezident İlham Əliyevin siyasi iradəsi, Ordumuzun rəşadəti ilə Azərbaycan gəncliyi öz sözünü dedi.

Cəbhənin müxtəlif istiqamətlərində gedən döyüşlər zamanı gənclərimizin igidliyi barədə illər, onilliklər boyu yazılsa da bitib-tükənən deyil. Xüsusilə, Azərbaycanın mədəniyyət paytaxtı olan Şuşanın işğaldan azad edilməsi igidliyin, cəsurluğun ən pik nöqtəsi hesab olunur.

Mövzunu “Yeni Azərbaycan”a dəyərləndirən Milli Qeyri-Hökumət Təşkilatları Forumunun rəhbəri Rauf Zeyni bildirib ki, bu gün dövlətimizin əsas prioritetlərindən biri gənc nəslin milli mənlik şüurunda yetişdirilməsidir. O qeyd edib ki, ölkəmizdə milli kimlik şüurunun inkişaf etdirilməsi məqsədilə xüsusi milli siyasət həyata keçirilir: “Bu gün gənclərin milli mənlik şüurunun inkişaf etdirilməsi və onlara vətənpərvərlik hisslərinin aşılanması vacib işlərdən biridir. Gənc nəslin vətənpərvərlik ruhunun artırılmasında təhsil ocaqlarının və hərbi xidmətin əvəzedilməz rolu var. Ordu dövlətin müstəqiliyini, suverenliyini və ərazi bötövlüyünün qorunmasının təminatçısıdır. Ordunun tərkib hissəsinin böyük bir qismi gənclərdən ibarətdir. Müharibə dövründə Prezident İlham Əliyevin gənclərə müraciəti Azərbaycan gənclərinin üzərinə düşən məsuliyyət idi. Bu çağırışdan sonra gənclərin Vətənin müdafiəsinə könüllü olaraq qoşulması, xüsusilə ölkə xaricində yaşayan gənclərin də bu çağırışa səs verməsi tarixi qələbənin ilk qığılcımları oldu. 44 günlük müharibədə şücaət göstərərək Azərbaycanın işğal altında olan torpaqlarının işğaldan azad edilməsi Azərbaycan gəncliyinin vətənpərvər ruhda tərbiyə almasının əyani göstəricisi oldu”.

R.Zeyni bildirib ki, gənclər Azərbaycan dövlətinin yaratdığı imkanlardan yararlanır, özlərini inkişaf etdirir, bilik və bacarıqlarını artırırlar: “Gənclərimiz dövlət və cəmiyyət qarşısında məsuliyyətini hiss edir qarşısına qoyulan öhdəlikləri layiqincə yerinə yetirirlər. Təbii ki, ökə rəhbərinin gənclərə inamı Vətən müharibəsində Azərbaycan gənclərinin böyük şücaət göstərməsinə zəmin yaratdı. Son illər ölkədə gənclərlə aparılan vətənpərvərlik tərbiyəsi işinin artıq mükəmməl bir sistemi formalaşıb. Həyata keçirilən tədbirlər silsilə xarakter alıb. Bütün bunlar isə təbii ki, aparılan təbliğat işlərinin nəticəyönümlülüyünə müsbət təsir edir”.

R.Zeyni vurğulayıb ki, gənc nəslin vətənpərvər ruhda yetişməsində ən vacib amillərdən biri də mənəviyyat məsələsidir: “Mənəviyyat olmayan yerdə nə milli mənlik şüurundan, nə də vətənpərvərlikdən söz gedə bilməz. Maddi və mənəvi dəyərlərə malik yetişdirilən, tərbiyə olunan gənc nəsil heç bir halda zərərli axınların qurbanına çevrilməz və gələcəkdə də dövlətin yükünü layiqilə daşıya bilər. Hər bir dövlətin varlığı və gələcəyi həm də gənclərin tərbiyəsindən asılıdır. Dövlətimiz öz müstəqilliyini yenidən bərpa etdikdən sonra qarşıda duran əsas vəzifələrdən biri uşaq və gənclərin sağlam və vətənpərvər ruhda böyüməsi, onların fiziki və mənəvi inkişafı, milli ruhda tərbiyəsi məsələsi oldu. Ulu Öndərin uzaqgörən siyasəti nəticəsində gələcəyimiz olan gənc nəslin inkişaf etməsi üçün bütün lazımi tədbirlər həyata keçirildi. Sevindirici haldır ki, əsası Heydər Əliyev tərəfindən qoyulan və bu gün də Prezident İlham Əliyev tərəfindən uğurla davam etdirilən dövlət gənclər siyasəti nəticəsində həm ölkə daxilində, həm ölkə xaricində Azərbaycanımızı layiqi ilə təmsil edən gənclər yetişib. Həmin gənclər xarici dövlətlərin aparıcı və qabaqcıl universitetlərində oxuyaraq ölkəmizi həmin ölkədə layiqilə təmsil edirlər. Hər birimizə yaxşı məlumdur ki, bir dövlətin bayrağı başqa bir dövlətdə iki halda qaldırılaraq dalğalanır. Biri ölkə başçısı başqa bir ölkəyə rəsmi səfər etdikdə, digəri isə idmançılar beynəlxalq tədbirlərdə qələbə qazandıqda. Məhz bu baxımdan da gənc idmançılarımızın da beynəlxalq tədbirlərdə qazandığı qələbə aparılan uğurlu siyasətin bariz nümunəsidir”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi” istiqaməti üzrə hazırlanmışdır

Paylaş:

Baxılıb: 775 dəfə