Hər dəfə 200 kilometr yol qət edirəm - Böyük həvəslə Mingəçevirdən Ağcabədiyə gedən müəllim

Bakı:

17°C

72%

4m/s

Əlaqə

AZ RU EN

Ana səhifə / Müsahibə / Hər dəfə 200 kilometr yol qət edirəm - Böyük həvəslə Mingəçevirdən Ağcabədiyə gedən müəllim

Hər dəfə 200 kilometr yol qət edirəm - Böyük həvəslə Mingəçevirdən Ağcabədiyə gedən müəllim

16.11.2023 [11:20]

Uşaqlıqdan bugünədək müəllim haqqında çox fikirlər eşitmişik. Müəllimi bəzən bağbana bənzədiblər, bəzən şam ömrü yaşadığını qeyd ediblər. Müəllim haqqında nə qədər gözəl fikirlər söylənsə, yenə də azdır. Bunu insan yaşa dolduqca, müəllimlərin onun həyatında nə qədər böyük rol oynamış olduğunu gördükcə daha aydın dərk edir. Müəllimi həm də haqlı olaraq keçmişin əmanətçisi, gələcəyin qurucusu adlandırıblar. Həyat yolumuzu işıqlandırmaq üçün valideynlərimiz qədər müəllimlərimiz də bütün çətinliklərə dözür, maneələri aşır, gələcəyi qurmaq üçün əllərindən gələni edirlər. Bu gün həmin müəllimlərdən biri ilə sizləri tanış etmək istərdik.

Hacıyeva Samirə Qənbər qızı 1991-ci ildə Mingəçevir şəhərində, müəllim ailəsində anadan olub. Ali təhsilini Azərbaycan Müəllimlər İnstitutunun Mingəçevir filialında alıb. Ailəlidir, 2 övladı var. Hazırda Mingəçevirdə yaşasa da, Ağcabədi rayonu, Ş.Məhərrəmov adına Qaravəlli kənd tam orta məktəbində müəllim işləyir. Bəs buna necə nail olur? Yaxşısı budur, müsahibimizin özündən soruşaq:

- Samirə müəllim, neçənci ildən Qaravəlli kəndində işləyirsiniz?

- 2020 - ci ildən bu məktəbdə işləyirəm.

- Hansı fənni tədris edirsiniz?

- Fizika fənnini.

- Müəllim kimi təyinatı Ağcabədiyə alarkən nə hisslər keçirdiniz? Çətin olacağını düşündünüzmü?

- İşimi sevdiyim üçün əlbəttə ki, çox sevindim. Eyni zamanda yol uzaq olduğu üçün bəzi çətinliklərlə qarşılaşacağımı bilirdim.

- Demək ki, burada yaşamırsınız. Yəni hər gün Mingəçevirdən Ağcabədiyə gəlirsiniz. Necə çatdırırsınız, işlərinizi necə nizamlaya bilirsiniz?

- Həftənin 4 günü, hər gün səhər saat yeddiyə qalmış Mingəçevirdən çıxıram, günortadan sonra saat dördə işləmiş, bəzən avtobusa gecikəndə isə beşə işləmiş evə gəlib çatıram. Çünki qayıtmağa birbaşa avtobus olmadığı üçün, bəzən Bərdə avtovağzalına gedib, oradan Mingəçevir avtobusu ilə gəlirəm. Bəzən də Lənkəran - Gəncə avtobusu ilə Yevlax avtovağzalına gedib, oradan Mingəçevir avtobusu ilə gəlirəm. Bir sözlə, demək olar ki, gün ərzində 200 km yol qət edirəm. Düzdür, evə çatanda yoruluram, amma şükür ki, həm övladlarımın dərsini hazırlamağa yardımçı oluram, həm də digər işlərimi görürəm. Amma bir şeyi də deməliyəm ki, mənə ana əvəzi olan qayınanam çox böyük dəstək olur. Çünki bu qədər uzun vaxt ərzində uşaqları tək qoymaq olmaz.

- Ağcabədidə işləyəcəyinizi biləndə ailənizin münasibəti necə oldu?

- Sağ olsunlar, hamısı dəstək oldular. Məhz buna görə də işimə gedib-gələ bilirəm.

- Şagirdlərinizdən razısınızmı? Yoxsa bir sıra kənd məktəblərində olduğu kimi burada da təhsilə maraq azdır?

- Mən şagirdlərimi öz övladım kimi görürəm. Çox şükür, mən onları çox istədiyim kimi, onlar da məni çox istəyir. Ümumiyyətlə, bizim məktəbimiz ən qabaqcıl məktəblərdəndir. Həmişə təhsildə yüksək nailiyyətlər əldə etmişik. Məsələn, ötən tədris ilində 19 şagirdimiz ali məktəbə qəbul olub. Onlardan 2 nəfəri 600 - dən çox bal toplayıb. 5 məzunumuz isə təhsil almaq üçün Türkiyəyə gedib.

- Ötən tədris ilində neçə məzununuz olub ki?

- Cəmi 39 nəfər

- Reallıqla razılaşsaq, kənd məktəbi üçün pis göstərici deyil.

- Bəli. Bundan əlavə, 2022-2023 - cü tədris ilinin sonunda Qarabağ Regional İdarəsi məktəbimizi Fəxri Fərmanla təltif edib. Müəllimlərdən də təltif olunan var. Həmçinin, siniflərdə özümüz bilik yarışları keçiririk...

- İşlədiyiniz məktəbdə sizdən başqa digər bölgədən gəlib işləyənlər varmı?

- Bəli, təsviri incəsənət müəllimi Kəmalə xanım da həftənin 2 günü Bərdədən gəlir.

- Ağcabədidə, işlədiyiniz kənddə ümumi mənzərəyə baxanda, istər insanlar arasında, istərsə də adətlərdə diqqətinizi çəkən, sizə maraqlı görünən nə var?

- Burada fərqli adət görməmişəm. Ləhcələri bir az fərqlidir. Amma çox mehriban, qonaqpərvərdirlər. Hər dəfə həm müəllim yoldaşlarım, həm də şagirdlərim məni evlərinə qonaq dəvət edirlər. Amma dərsdən çıxanda avtobusa çatmağa tələsirəm. Bütün müəllim, şagird kollektivimiz sanki çoxdan tanıyırmış kimi hər zaman mənə öz doğmaları kimi davranıblar.

- Fikrinizcə, əsl müəllim necə olmalıdır?

- Məncə, əsl müəllim birinci növbədə öz işini sevməlidir, şagirdlərini övladı gözündə görməli, həmişə onlara eyni gözlə baxmalıdır. İşinə məsuliyyətli olmalı, daim öz üzərində işləməlidir. Yeri gəldikdə, şagirdlərinə həm də ana, xala, bir sözlə, onların doğması kimi olmalıdır.

- İşinizi nə qədər sevsəniz də, bunun bir maddi tərəfi də var. Hər dəfə Mingəçevirdən Ağcabədiyə gəlmək əlbəttə ki, o qədər də sərfəli görünmür.

- Bəli, ayda təxminən 200-250 manat yolpulu lazım olur. Çünki Ağcabədiyə gələndə 2-3, Mingəçevir qayıdanda da 2-3 avtobus dəyişirəm. Amma işimi sevdiyim üçün böyük həvəslə gəlirəm.

- Ucqar rayonlara təyinat alan müəllimlərə nə demək istərdiniz?

- Ucqar rayonlarda işləyən müəllimlərə demək istəyirəm ki, çalışsınlar işlərinə sevgiylə, həvəslə yanaşsınlar. Onda çətinliklərə asan sinə gərmək olur. Şagirdlərimizi övladımız bilək. Yəqin ki, bir gün biz də fəaliyyətimizi öz doğma şəhərlərimizdə davam etdirərik.

Söhbətləşdi: Məhsəti Musa

Paylaş:

Baxılıb: 775 dəfə