“Azadlıq” qəzeti islamofob dairələrin ruporu kimi...

Bakı:

23 °C

72 %

12 m/s

Əlaqə

AZ RU EN

Ana səhifə / Siyasət / “Azadlıq” qəzeti islamofob dairələrin ruporu kimi...

“Azadlıq” qəzeti islamofob dairələrin ruporu kimi...

08.09.2015 [10:03]

Azərbaycan dövlətinə qarşı “qara piar” kampaniyası aparan bu qəzet ermənipərəst, anti-azərbaycançı mərkəzlərlə sinxron hərəkət edir
Azərbaycan özünün çoxvektorlu və balanslaşdırılmış xarici siyasət strategiyası ilə həm ikitərəfli münasibətlər kontekstində, həm də çoxşaxəli əlaqələr fonunda regional miqyaslı, qlobal xarakterli əməkdaşlıqlar platformasının mərkəzi oyunçusu rolunu oynamaqdadır. Bu isə Azərbaycanın beynəlxalq mövqeyinin möhkəmlənməsinə, əməkdaşlığa əsaslanan tərəfdaşlıq münasibətlərinin inkişafına təkan verir, perspektiv nailiyyətlər üçün strateji zəmin rolunu oynayır. Bütün bunlar isə ölkəmizin milli maraqlarına uyğun olmaqla bərabər, Azərbaycanın suverenlik səviyyəsini, heç bir dövlətdən, təşkilatdan asılı olmadığını da təsdiq edir.
Eyni zamanda, Azərbaycan regionda sabitləşdirici aktor kimi fəaliyyət göstərməklə bölgədə və beynəlxalq səviyyədə əməkdaşlığa və təhlükəsizliyə mühüm töhfələr verir. Bu kontekstdə son dönəmlərdə ölkəmizin iştirakı ilə gerçəkləşdirilən enerji layihələrinin əhəmiyyəti deyilənləri təsdiq edir. Məhz bütün bunlara görə dünya siyasətinin aparıcı aktorları, həmçinin, mötəbər beynəlxalq təşkilatlar da Azərbaycanın mütərəqqi xarici siyasətini regional təhlükəsizlik və qlobal inkişafa mühüm töhfə kimi qiymətləndirirlər. Beləliklə, müstəqil siyasət yürütməsi, sivilizasiyalararası dialoqa mühüm töhfələr verməsi, regional və beynəlxalq təhlükəsizliyin təmin olunmasında strateji tərəfdaş qismində əhəmiyyətli rol oynaması Azərbaycanın beynəlxalq nüfuzunu artıran əhəmiyyətli faktorlar kimi çıxış edir.
Bütün bunlarla yanaşı, Azərbaycanın dinamik iqtisadi inkişafı, beynəlxalq münasibətlər sistemində öz mövqeyini ardıcıl olaraq möhkəmləndirməsi ölkəmizlə əməkdaşlıq münasibətlərinə malik olan dövlətlər tərəfindən müsbət qarşılansa da, bəzi dairələrdə narahatlıq hissi meydana gətirir. Buna görə də həmin anti-Azərbaycan dairələr dövlətimizə təzyiq etmək üçün nəinki Azərbaycana qarşı “qara piar” kampaniyası aparır, müxtəlif məsələlər ətrafında spekulyasiya yaratmağa çalışırlar.
“Azadlıq” ənənəvi ampluasında...
Xüsusilə də, anti-Azərbaycan dairələr bəzi transmilli media orqanları vasitəsilə Azərbaycana qarşı “qara piar” kampaniyasını davam etdirməyə çalışır, müxtəlif dezinformasiyalar vasitəsilə ölkəmiz haqqında yanlış ictimai rəy formalaşdırmağa yönəlik cəhdlər edirlər. Eyni zamanda, radikal müxalifət düşərgəsinin nəzarətində olan bəzi yerli media orqanları da bu prosesdə anti-Azərbaycan dairələr və erməni lobbisi ilə sinxron hərəkət edərək antimilli cəbhədə yer alırlar. Bu baxımdan, dağıdıcı ünsürlərin ruporu kimi çıxış edən “Azadlıq” qəzeti xüsusi olaraq fərqlənir.
Ümumiyyətlə, Azərbaycan daxilində nüfuzu və geniş oxucu kütləsi olmayan “Azadlıq” qəzetinin hansı imicə sahib olması və kimlərə xidmət etməsi ictimaiyyətə yaxşı bəllidir. O da məlumdur ki, bu qəzeti ölkədən xaricdə, beynəlxalq miqyasda əsasən erməni KİV-i, xüsusən də ermənilərə məxsus internet saytları kifayət qədər “ciddi” izləyir. Bu isə təsadüfi xarakter daşımır, çünki “Azadlıq” qəzetində əksini tapan qərəzli məlumatlar çox zaman erməni lobbisinin məqsəd və maraqlarına, anti-Azərbaycan dairələrin fəaliyyətinə uyğun gəlir.
“Azadlıq” qərəzli xarici qurumlardan, qeyri-hökumət təşkilatlarından maliyyə və ideoloji asılılıq şəraitində fəaliyyət göstərir
Beləliklə, öz səhifələrində daim antixalq ruhunda yazı və məlumatlara yer verən bu qəzet fəaliyyətini bütünlüklə kiçik bir dairənin, əsas etibarilə, islamofob qüvvələrin dağıdıcı, antimilli siyasi ambisiyalarını təmin etmək üçün qurur. Daha da dəqiq desək, islamofob dairələrlə sinxron hərəkət edən, onların direktivlərinə əməl edən “Azadlıq” qərəzli xarici qurumlardan, qeyri-hökumət təşkilatlarından maliyyə və ideoloji asılılıq şəraitində fəaliyyət göstərir. Təsadüfi deyil ki, ölkəmizin bir nömrəli problemi olan, ümumxalq əhəmiyyətli Dağlıq Qarabağ məsələsində belə, bu qəzet anti-Azərbaycan mövqeyi sərgiləyir, səhifələrini qərəzli dairələr və ermənilərin maraqlarına müvafiq informasiyalarla “bəzəyir”. Bütövlükdə isə, “Azadlıq” müxtəlif dairələrin, hegemon dövlət olmaq iddiası ilə çıxış edən geosiyasi subyektlərin, islamofob dairələrin Azərbaycana qarşı qərəzli münasibət və yanaşmasına tribuna verməklə anti-Azərbaycan mövqeyi sərgiləyir.
N.QƏLƏNDƏRLİ

Paylaş:

Baxılıb: 629 dəfə