KİVDF-də Lefke Avropa Universitetinin nümayəndələri ilə görüş keçirilib

Bakı:

15 °C

94 %

3 m/s

Əlaqə

AZ RU EN

Ana səhifə / Siyasət / KİVDF-də Lefke Avropa Universitetinin nümayəndələri ilə görüş keçirilib

KİVDF-də Lefke Avropa Universitetinin nümayəndələri ilə görüş keçirilib

26.02.2016 [10:25]

Mehmet Ali Yükselen: Azərbaycanlı bacı və qardaşlarımızla birlikdə olmaq, acılarınızı paylaşmaq üçün səfərimizi bu tarixə saldıq
Dünən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) Şimali Kipr Türk Cümhuriyyətinin (ŞKTC) Lefke Avropa Universitetinin (LAU) nümayəndələri ilə görüş keçirilib. Xocalı soyqırımının 24-cü ildönümü ilə əlaqədar Bakıya gələn qonaqları KİVDF-nin icraçı direktoru Vüqar Səfərli salamlayıb. Tədbir iştirakçıları öncə Xocalı soyqırımı qurbanlarının xatirəsini bir dəqiqəlik sükutla yad ediblər.
Ölkənin aparıcı KİV rəhbərlərinin də qatıldığı görüşdə V.Səfərli qonaqlara bu faciə haqqında ətraflı məlumat verib. Bildirilib ki, 1992-ci il fevralın 25-dən 26-na keçən gecə Ermənistan silahlı qüvvələri tərəfindən keçmiş sovet ordusunun 366-cı motoatıcı alayının iştirakı ilə Xocalıda xalqımıza qarşı törədilmiş vəhşiliklər nəticəsində 2500 Xocalı sakinindən 613-ü düşmən gülləsinə tuş gələrək qətliamın qurbanı olub: “Onların 63-ü uşaq, 106-sı qadın, 70-i qoca olub, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsinə tuş gəlib yaralanan 487 nəfərdən 76-sı uşaq olub. 1275 xocalılı əsir götürülüb, 150 nəfər itkin düşüb”.
İcraçı direktor əlavə edib ki, Azərbaycan dövləti bu qanlı soyqırımı haqqında həqiqətlərin dünyaya çatdırılması istiqamətində sistemli iş aparır. Prezident İlham Əliyevin apardığı uğurlu xarici siyasət, həmçinin Heydər Əliyev Fondunun vitse-prezidenti, İslam Əməkdaşlıq Təşkilatının Dialoq və Əməkdaşlıq üzrə Gənclər Forumunun baş əlaqələndiricisi Leyla Əliyevanın təşəbbüsü ilə həyata keçirilən “Xocalıya ədalət!” (“Justice for Khojaly!”) beynəlxalq kampaniyası çərçivəsində görülən işlər nəticəsində dünyanın 10-a yaxın dövləti, ABŞ-ın isə 20 ştatı və bir sıra beynəlxalq təşkilatlar Xocalı soyqırımını rəsmən tanıyıb və bu soyqırımını pisləyən qətnamə qəbul ediblər.
Azərbaycanın bu ağrılı günündə LAU-nun nümayəndələrinin ölkəmizə səfərinin bir daha dostluq və qardaşlıq əlaqələrinin güclü olmasından xəbər verdiyini deyən V.Səfərli: “Biz Şimali Kiprdə olduğumuz zaman orda olan hadisələr barədə də məlumatlar verildi. Biz demək olar ki, eyni faciələri yaşamışıq. Bu isə bizim bu faciələr haqqında həqiqətlərin dünyaya çatdırılması üçün hər zaman bir olmağımızı şərtləndirir”, - sözlərini də əlavə edib.
Lefke Avropa Universitetinin rektoru, prof.dr. Mehmet Ali Yükselen isə bu səfərin tarixinin heç də təsadüfi seçilmədiyini bildirib: “Bu səfərimiz Xocalı faciəsinin 24-cü ildönümünə təsadüf edir. Bu anım günündə sizlərlə - azərbaycanlı bacı və qardaşlarımızla birlikdə olmaq, acılarınızı paylaşmaq üçün səfərimizi bu tarixə saldıq. Sabah (yəni bu gün - N.A) dövlət bayraqlarımızla “Xocalı harayı” abidəsinin qarşısına gedərək faciə qurbanlarının xatirəsinə öz ehtiramımızı bildirəcəyik”.
Rektor ŞKTC-nin təhsil sistemi barədə də məlumat verib və təhsil sahəsində əməkdaşlığın genişləndirilməsinin vacibliyini vurğulayıb.
Görüşdə çıxış edən “Yeni Azərbaycan” qəzetinin baş redaktoru, millət vəkili Hikmət Babaoğlu bildirib ki, Xocalı soyqırımı Azərbaycanın ən yeni tarixinin ən faciəvi səhifələrindən biridir. Xocalının miladdan öncə Azərbaycanda mövcud olmuş böyük bir mədəniyyətin, Xocalı-Gədəbəy mədəniyyətinin başlanğıc nöqtəsi olduğunu xatırladan millət vəkili əlavə edib ki, ermənilərin Xocalıya qarşı bu cür amansız qətliamı, soyqırımını həyata keçirməsinin bir səbəbi də budur: “Çünki ermənilər Qafqazda məskunlaşdıqları gündən bu günə kimi burada Azərbaycan mədəniyyətinin, türk mədəniyyətinin, türk tarixinin köklərini qazımağa çalışıblar”.
“SƏS” Media Qrupunun rəhbəri Bəhruz Quliyev isə bildirib ki, ŞKTC ilə Azərbaycanın çox gözəl münasibəti var. Bu münasibətlərin gələcəkdə daha da inkişaf edəcəyinə əminliyini bildirən B.Quliyev, “Biz Kipri özümüzdən ayırmırıq. Siz Bakıya bir ziyalı kimi səfər etmisiniz, amma çox təəssüf ki, bu səfər belə bir günə təsadüf edir. İnaşallah Qarabağda sevincimizi birlikdə qeyd edəcəyik. Çox şadıq ki, yanımızdasınız”, - deyə bildirib.
Sonra “Xalq cəbhəsi” qəzetinin baş redaktoru Elçin Mirzəbəyli, “Bakı xəbər” qəzetinin baş redaktoru Aydın Quliyev, LAU-nun prorektorları Carolina Smochina və Akın Cellatoğlu, jurnalist Hasan Hastürer, Mütəvəlli Heyəti başqanı Özgün Faruk və başqaları çıxış edərək bu cür səfərlərin əhəmiyyətini vurğulayıblar.
Nadir AZƏRİ

Paylaş:

Baxılıb: 784 dəfə