Şuşadan verilən mesaj: strateji tərəfdaşlıq yeni məzmun qazanır

Bakı:

26 °C

72 %

14 m/s

Əlaqə

AZ RU EN

Ana səhifə / Xəbər lenti / Şuşadan verilən mesaj: strateji tərəfdaşlıq yeni məzmun qazanır

Şuşadan verilən mesaj: strateji tərəfdaşlıq yeni məzmun qazanır

15.07.2026 [17:17]

Prezident İlham Əliyevlə Slovakiya Respublikasının Prezidenti Peter Pelleqrinin Şuşada keçirdikləri görüş və mətbuata bəyanatları təkcə iki ölkə arasında münasibətlərin cari vəziyyətini deyil, həm də gələcək inkişaf istiqamətlərini aydın şəkildə ortaya qoydu. Verilən mesajlar göstərdi ki, Azərbaycan–Slovakiya əməkdaşlığı artıq yeni mərhələyə qədəm qoyur və bu münasibətlər qarşılıqlı etimad, praqmatik yanaşma və ortaq maraqlar üzərində inkişaf edir.

Azərbaycan işğaldan azad edilmiş ərazilərdə misilsiz bərpa və yenidənqurma proqramı həyata keçirir. Bu proses yalnız ölkənin daxili inkişaf strategiyasının tərkib hissəsi deyil, eyni zamanda beynəlxalq əməkdaşlıq üçün yeni imkanlar yaradır. Dost və tərəfdaş ölkələrin bu layihələrdə iştirakı Qarabağın qısa müddətdə regionun inkişaf və əməkdaşlıq mərkəzlərindən birinə çevrilməsinə xidmət edir.

Slovakiya şirkətinin Ağdam rayonunun Baş Qərvənd kəndində həyata keçirdiyi layihə də bu baxımdan xüsusi diqqət çəkir. Bu iştirak iqtisadi tərəfdaşlıqla yanaşı, iki ölkə arasında formalaşmış etibarlı münasibətlərin praktik ifadəsidir. Belə təşəbbüslər gələcəkdə əməkdaşlığın daha geniş sahələri əhatə etməsinə zəmin yaradır.

Prezident İlham Əliyevin çıxışında səsləndirdiyi fikirlərdən aydın görünür ki, Azərbaycan beynəlxalq tərəfdaşlarla münasibətlərini uzunmüddətli strateji baxış əsasında qurur. Qarabağın bərpasında xarici şirkətlərin iştirakı, yeni investisiya imkanlarının yaradılması və müasir infrastrukturun formalaşdırılması ölkəmizin açıq əməkdaşlıq siyasətinin real nəticələridir.

Bu gün Şuşa yalnız Azərbaycanın mədəniyyət paytaxtı deyil, eyni zamanda beynəlxalq siyasi dialoqun və əməkdaşlığın mühüm ünvanlarından birinə çevrilib. Burada keçirilən yüksək səviyyəli görüşlər və verilən mesajlar Azərbaycanın regionda sülhün, inkişafın və qarşılıqlı faydalı əməkdaşlığın təşəbbüskarı olduğunu bir daha təsdiqləyir.

Azərbaycan–Slovakiya münasibətlərinin gələcək inkişafı hər iki ölkə üçün yeni perspektivlər vəd edir. Əminliklə demək olar ki, qarşılıqlı etimada əsaslanan bu tərəfdaşlıq siyasi, iqtisadi və humanitar sahələrdə daha da genişlənəcək, Qarabağın bərpası və regionun davamlı inkişafı istiqamətində mühüm nəticələr verəcək.

Vüqar Cəfərov

Siyəzən RİHB-nın Dağ Quşçu kənd üzrə nümayəndəliyinin baş məsləhətçisi

Paylaş:

Baxılıb: 42 dəfə