1969-cu ildən Azərbaycanın bütün sahələrində sürətli inkişaf və yüksəliş dövrü başlanıb

Bakı:

22 °C

63 %

7 m/s

Əlaqə

AZ RU EN

Ana səhifə / Siyasət / 1969-cu ildən Azərbaycanın bütün sahələrində sürətli inkişaf və yüksəliş dövrü başlanıb

1969-cu ildən Azərbaycanın bütün sahələrində sürətli inkişaf və yüksəliş dövrü başlanıb

15.07.2009 [10:11]

ümummilli lider Heydər Əliyevin Azərbaycanda ilk dəfə hakimiyyətə gəlməsinin 40 illiyi münasibətilə dünən Nizami rayon İcra Hakimiyyətində “Heydər Əliyev və Azərbaycan” mövzusunda ümumrayon toplantısı keçirilib. İştirakçılar əvvəlcə Ulu öndərin foyedəki büstü önünə gül-çiçək dəstələri düzüblər.
İcra Hakimiyyətinin başçısı Mehbalı Əliyev çıxışında deyib ki, müstəqil Azərbaycanın dövlətçilik tarixinin ən parlaq səhifəsi məhz Heydər Əliyev tərəfindən yazılıb. Heydər Əliyev hakimiyyətə gəlişi ilə həm yeni dövlət qurub, həm də bu dövlətin ideoloqu, nəzəriyyəçisi, yolgöstərəni olub.
Milli Məclisin İqtisadi siyasət komitəsinin sədri Ziyad Səmədzadə çıxışında bildirib ki, 1960-cı illərin axırlarında Azərbaycan iqtisadi və mənəvi tənəzzül dövrünü yaşayırdı. 1969-cu ildə Heydər Əliyevin respublikanın siyası rəhbəri seçilməsi ilə cəmiyyətin həyatının bütün sahələrində sürətli inkişaf və yüksəliş dövrü başlanıb. 1970-1982-ci illərdə Azərbaycanda 200-dən çox yeni müəssisə tikilib, neftayırma və neft maşınqayırması müəssisələri tamamilə yenidən qurulub. İri elektron, elektrotexnika, radiotexnika və cihazqayırma sənayesi zavodları inşa edilib, həmin illərdə Azərbaycanda sənaye istehsalı 2 dəfədən çox artıb.
Heydər Əliyevin Azərbaycana rəhbərlik etdiyi illərin ən böyük nailiyyətlərindən biri də yüksək ixtisaslı kadrların hazırlanması ilə əlaqədar görülmüş uzaqgörən tədbirlər idi. YAP İcra katibinin müavini, deputat Siyavuş Novruzov çıxışında bu məsələdən ətraflı danışaraq deyib ki, məhz Heydər Əliyev Azərbaycanın gələcəyini düşünərək, azərbaycanlı gəncləri mükəmməl təhsil almaq üçün keçmiş ittifaqın ən nüfuzlu ali məktəblərinə göndərib. C.Naxçıvanski adına ixtisaslaşdırılmış məktəbin açılması isə gələcəkdə ordu quruculuğunda mühüm rol oynayıb.
Milli Məclis sədrinin birinci müavini Ziyafət Əsgərov da ümummilli liderlə bağlı xatirələrindən danışıb. O deyib ki, məhz Heydər Əliyevin gərgin əməyi, zəngin dövlətçilik təcrübəsi nəticəsində milli mənəvi dəyərlərin qorunub saxlanılmasına və ana dilinin inkişafına zəmin yaradılıb. Bir sözlə, 1969-1982-ci illər Azərbaycanın tarixinə böyük quruculuq və iqtisadi tərəqqi dövrü kimi daxil olub.
Heydər Əliyevin 1993-cü ildə Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, elmi-mədəni həyatında, beynəlxalq əlaqələrində dönüş yaranıb, müstəqil dövlət quruculuğu prosesi başlanıb. Ulu öndərin rəhbərliyi altında ölkəmizdə müstəqil dövlət təsisatlarının yaranması və dövlət quruculuğu prosesi böyük vüsət alıb. Bunun da əsasını müstəqil Azərbaycanın ilk Konstitusiyası təşkil edirdi. Sonrakı dövrdə Azərbaycanda dövlətçiliyin möhkəmlənməsi və demokratik prinsiplərin bərqərar olması, hüquqi, dünyəvi dövlət quruculuğu prosesinin uğurla, sürətlə həyata keçirilməsi şəxsən Heydər Əliyevin adı ilə bağlıdır. Onun apardığı daxili siyasət Azərbaycanın hər bir vətəndaşına azad, sərbəst yaşamaq hüquqlarını təmin etməkdən və öz rifahını yaxşılaşdırmaq imkanları yaratmaqdan ibarət idi. Heydər Əliyev demokratik, hüquqi dövlət quruculuğu istiqamətində davamlı siyasət yeridərək, ölkədə insan hüquq və azadlıqlarının başlıca prinsiplərinin bərqərar olması üçün əsaslı zəmin yaradıb.
çıxışlarda bir fikir xüsusi vurğulanıb ki, Heydər Əliyevin siyasi varisi, onun ideyalarının ən layiqli davamçısı Prezident İlham Əliyevin rəhbərliyi ilə Azərbaycan gündən-günə inkişaf edir, möhkəmlənir.
Sonra “SPACE” Müstəqil Teleradio MMC-nin prezidenti, görkəmli rejissor Vaqif Mustafayevin ümummilli lider Heydər Əliyevə həsr olunmuş “Patriot” filmi nümayiş etdirilib.

Paylaş:

Baxılıb: 1234 dəfə