"Gallup" təşkilatının sorğusu reallığı əks etdirir

Bakı:

11 °C

93 %

3 m/s

Əlaqə

AZ RU EN

Ana səhifə / Siyasət / "Gallup" təşkilatının sorğusu reallığı əks etdirir

"Gallup" təşkilatının sorğusu reallığı əks etdirir

06.08.2009 [01:45]

Xəbər verdiyimiz kimi, ABŞ-da yerləşən, dünya üzrə insan resurslarını öyrənən və statistik araşdırma xidmətləri göstərən nüfuzlu “Gallup” təşkilatı iyulun 31-də keçmiş Sovet respublikaları üzrə yeni sorğusunun nəticələrini elan edib. Hər ölkədə 1000 respondent arasında keçirilən sorğuda bildirilir ki, Azərbaycanın sürətli sosial-iqtisadi inkişafı, ölkəmizdə vətəndaşların rifah halının yüksəldilməsi, genişmiqyaslı quruculuq işləri, insan hüquq və azadlıqlarının təmin olunması istiqamətində həyata keçirilmiş tədbirlər əhali tərəfindən yüksək qiymətləndirilir. “Sizcə, ölkə rəhbərliyi işinin öhdəsindən necə gəlir” sualına cavab olaraq Azərbaycanda rəyi soruşulanların 77 faizi hakimiyyətin fəaliyyətindən razılığını ifadə edib. Bu, postsovet ölkələri arasında ən yüksək göstəricidir.
Xatırladaq ki, “Gallup”un sorğusunun nəticələrinə görə, Ukraynada rəyi soruşulanların cəmi 4 faizi hakimiyyətin işindən razıdır. Litvada respondentlərin 13 faizi, Gürcüstanda 21 faizi, Moldovada isə 25 faizi hakimiyyətin fəaliyyətini bəyənib.
“Gallup” təşkilatının sorğusuna münasibət bildirən Milli Məclisin Mədəniyyət komitəsinin sədri, Atatürk Mərkəzinin rəhbəri Nizami Cəfərov hesab edir ki, bu sorğu tamamilə obyektivdir. Onun sözlərinə görə, bu gün Azərbaycanda görülən işləri miqyası və keyfiyyəti baxımından keçmiş sovet respublikaları ilə müqayisə etmək mümkün deyil: “Biz sovet dövrünü yaşamışıq, müstəqil dövlətin qurulması prosesini də izləmişik. Müstəqil dövlətin qurulması möhkəm əsaslara söykənərək milli və ümumdünya standartlarına uyğun şəkildə gedib. Dövlət quruculuğunda insan hüquqları amili böyük üstünlük təşkil edir. Eyni zamanda, mükəmməl dövlət idarəçiliyi sistemi yaranıb. ümumiyyətlə, bu prosesdə ən modern dəyərlər öz əksini tapıb”.
N.Cəfərovun fikrincə, bütün bunların nəticəsində də xalqla, cəmiyyətlə iqtidar arasında münasibətlər səmimidir. Millət vəkili qeyd edib ki, bu cür münasibətlər keçmiş sovet respublikalarında yoxdur. Bu baxımdan, ABŞ-ın nüfuzlu təşkilatının sorğusunun nəticələri real faktlara əsaslanır.
Sözügedən sorğunun nəticələrinə münasibət bildirən tarixçi alim, professor Musa Qasımlı deyib ki, nüfuzlu “Gallup” təşkilatının keçirdiyi rəy sorğuları bütün dünyada ən mötəbər, inanılmış nəticələr olaraq qəbul edilir: “Rəy sorğularının nəticələrinə görə, Azərbaycanın birinci yerdə olması reallığı əks etdirir və mənsubiyyətindən, mövqeyindən asılı olmayaraq hər bir azərbaycanlı üçün qürurvericidir. Diqqət yetirsək digər postsovet məkanı ölkələri ilə Azərbaycanı inkişaf baxımından müqayisə etmək doğru olmazdı. Cənubi Qafqaz ölkələri Gürcüstan və Ermənistan həm ayrılıqda, həm də bəlkə ikisi birlikdə sosial-iqtisadi, siyasi və mədəni baxımdan Azərbaycandan xeyli geri qalırlar. Bugünkü Azərbaycan nəinki son 15 ilin, hətta son 5 ilin Azərbaycanı deyil. Bəzən 1 il əvvəl Bakıdan ayrılan şəxslər geri qayıtdıqda, Azərbaycan rayonlarına səfərə çıxdıqda tamam başqa bir mənzərinin şahidi olurlar. Demək olar ki, son illərdə Azərbaycanda quruculuq işlərinin aparılması, işsizlərinin sayının azaldılması, yoxsulluğun həddinin aşağı salınması, Azərbaycan cəmiyyətində milli birliyə nail olunması, xalqla iqtidar arasında birliyin daha da möhkəmləndirilməsi prosesi gedib. Burada heç şübhəsiz cənab Prezident İlham Əliyevin yüksək dövlət idarəçilik bacarığı, xalq adamı olması, sadəliyi, daim xalqın içərisində olması, dövlət başçısının Azərbaycanın güclü dövlətə çevrilməsi, həmçinin, xalqının daha da yaxşı yaşaması niyyətləri və bu istiqamətdə həyata keçirdiyi praktik addımlar müstəsna rol oynayıb. Bu gün heç şübhəsiz cənab Prezidentin Azərbaycan cəmiyyətində alternativi yoxdur və dövlət başçısı xalqın mütləq əksəriyyəti tərəfindən dəstəklənir”.
Musa Qasımlı hesab edir ki, bu sorğunun nəticələri başqa bir cəhətdən də əhəmiyyətlidir: “Bu Azərbaycan haqqında obyektiv məlumatın yayılmasında müstəsna rol oynayacaq. Hesab edirəm ki, sözügedən rəy sorğusu reallığın, həmçinin, Azərbaycan xalqının qarşıdakı illərdə və gələcəkdə arzu və istəklərinin ifadəsi kimi də qəbul oluna bilər”.
Məsələyə münasibət bildirən politoloq Elşad Mirbəşiroğlu deyib ki, dünyada demokratiyanın beşiyi sayılan ABŞ kimi bir ölkədə fəaliyyət göstərən nüfuzlu “Gallup” təşkilatının sorğusunun bu cür nəticələnməsi bir azərbaycanlı kimi onu çox sevindirir: “Onu da qeyd etmək istəyirəm ki, bu tamamilə obyektiv göstəricilərdir. çünki ölkədə gedən proseslər, hərtərəfli islahatlar bir daha təsdiq edir ki, Azərbaycan iqtidarı xalqa kifayət qədər yaxın olan bir iqtidardır. Nəzərinizə çatdırım ki, bu sorğu keçmiş Sovet respublikaları ərazisində keçirilib. Hətta rəngli inqilabların baş verdiyi Gürcüstan və Ukraynada müqayisəyəgəlməz dərəcədə aşağı faizlə ölkə hökumətlərinə etimad göstərilib. Təsəvvür edin ki, Ukraynada cəmi 4 faiz, Gürcüstanda isə 21 faiz respondent hökumətə etimad göstərdiyini bildirib. Əslində, bu hökumətlə yanaşı prezidentlərə etimad sorğusu sayıla bilər. Yəni bu sorğunun mahiyyəti xalqın Prezidentə etimadını müəyyən etməkdən ibarətdir. Məhz bu baxımdan da, Azərbaycandan sorğuda iştirak edənlərin hökumətə yüksək faizlə etimad göstərməsi, əslində, xalqın Prezident İlham Əliyevə olan inamının nəticəsi sayıla bilər. Bu isə onu deməyə əsas verir ki, ölkədə gedən tikinti-quruculuq işləri, yüksək sosial rifah, infrastruktur quruculuğu xalq-iqtidar birliyinin təməlini təşkil edir”.
Elşad Mirbəşiroğlunun sözlərinə görə, məhz aparılan quruculuq-abadlıq işlərinin, o cümlədən, xalqın hakimiyyətə olan inamının nəticəsidir ki, artıq dünyanın bir çox nüfuzlu təşkilatları Azərbaycana qarşı ikili standartlardan əl çəkir və ölkədəki etimad mühitini düzgün şəkildə əks etdirirlər: “Bu sorğular bir daha təsdiqləyir ki, cənab İlham Əliyev həqiqətən də hər bir azərbaycanlının Prezidentidir. Və dövlət başçısının həyata keçirdiyi siyasətdən hər bir azərbaycanlıya pay düşüb”.
N.BAYRAMLI

Paylaş:

Baxılıb: 1284 dəfə