Akademik Zərifə Əliyeva həyatını elmə və xeyirxahlığa həsr etmişdi

Bakı:

13 °C

54 %

7 m/s

Əlaqə

AZ RU EN

Ana səhifə / YAP xəbərləri / Akademik Zərifə Əliyeva həyatını elmə və xeyirxahlığa həsr etmişdi

Akademik Zərifə Əliyeva həyatını elmə və xeyirxahlığa həsr etmişdi

14.04.2026 [15:59]

Azərbaycan tibb elminin inkişafında müstəsna xidmətləri olan Zərifə xanım Əliyeva, xüsusilə Azərbaycan Dövlət Həkimləri Təkmilləşdirmə İnstitutundakı fəaliyyəti ilə milli səhiyyə sisteminin elmi və kadr potensialının gücləndirilməsində mühüm rol oynamışdır. Onun bu institutda apardığı çoxşaxəli elmi və pedaqoji fəaliyyət yalnız oftalmologiya sahəsinin inkişafına deyil, bütövlükdə tibbi təhsilin keyfiyyətinin yüksəldilməsinə yönəlmişdir.

Zərifə xanım Əliyevanın institutdakı fəaliyyəti sistemli yanaşma və elmi yenilikçilik prinsipləri ilə səciyyələnirdi. O, həkimlərin ixtisasartırma prosesinin müasir tələblərə uyğunlaşdırılması istiqamətində mühüm addımlar atmış, tədris prosesində praktik biliklərin önəmini xüsusi vurğulamışdır. Onun təşəbbüsü ilə təşkil olunan kurslar və elmi seminarlar həkimlərin klinik təcrübəsinin artırılmasına və yeni tibbi texnologiyalarla tanışlığına şərait yaratmışdır.

Alimin elmi maraq dairəsi əsasən peşə patologiyası və oftalmoloji xəstəliklərin istehsalat mühiti ilə əlaqəli xüsusiyyətlərinin öyrənilməsini əhatə edirdi. Bu istiqamətdə apardığı tədqiqatlar nəticəsində sənaye müəssisələrində çalışan işçilərin görmə orqanlarına təsir edən zərərli amillər sistemli şəkildə araşdırılmış, onların qarşısının alınması və erkən diaqnostikası üçün effektiv metodlar təklif olunmuşdur. Bu tədqiqatlar yalnız nəzəri əhəmiyyət daşımamış, eyni zamanda praktik səhiyyə sistemində geniş tətbiq olunaraq profilaktik tədbirlərin təkmilləşdirilməsinə səbəb olmuşdur.

Zərifə xanım Əliyevanın pedaqoji fəaliyyəti onun elmi fəaliyyətinin ayrılmaz tərkib hissəsi idi. O, gənc mütəxəssislərin yetişdirilməsinə xüsusi diqqət yetirir, onların elmi düşüncə tərzinin formalaşdırılmasına və tədqiqat bacarıqlarının inkişafına istiqamət verirdi..Onun rəhbərliyi altında hazırlanmış elmi işlər və metodik vəsaitlər uzun müddət tibb təhsilində əsas mənbələrdən biri kimi istifadə olunmuşdur. Çoxsaylı məqalələri, çıxışları məhz bu məsələyə həsr olunmuş, «Yüksək etimad» kitabı isə cəmiyyətdə həkimin şəxsiyyət kimi formalaşması prosesinə dəyərli töhfə vermişdir .Bu baxımdan, o, yalnız alim kimi deyil, həm də güclü pedaqoq kimi tanınmışdır.

Zərifə xanım Əliyevanın fəaliyyəti institutun elmi nüfuzunun yüksəlməsinə də mühüm təsir göstərmişdir. Onun beynəlxalq elmi əlaqələrin qurulmasına verdiyi töhfə, xarici ölkələrin tibb müəssisələri ilə əməkdaşlığın inkişafına şərait yaratmışdır. Bu isə Azərbaycan tibb elminin qlobal elmi mühitə inteqrasiyasını sürətləndirmişdir.

Zərifə xanım Əliyevanın Azərbaycan Dövlət Həkimləri Təkmilləşdirmə İnstitutundakı fəaliyyəti Azərbaycan səhiyyəsinin elmi əsaslar üzərində inkişafında mühüm mərhələ təşkil edir. Onun irsi bu gün də tibbi təhsilin və elmi tədqiqatların inkişafında öz aktuallığını qoruyur və müasir tibb mütəxəssisləri üçün nümunəvi fəaliyyət modeli kimi çıxış edir.

Nicat Əsədli

YAP Ordubad rayon təşkilatının əməkdaşı

Paylaş:

Baxılıb: 132 dəfə