Estoniyada Xocalı soyqırımına həsr olunmuş tədbir keçirilib

Bakı:

25 °C

73 %

3 m/s

Əlaqə

AZ RU EN

Ana səhifə / Xəbər lenti / Estoniyada Xocalı soyqırımına həsr olunmuş tədbir keçirilib

Estoniyada Xocalı soyqırımına həsr olunmuş tədbir keçirilib

26.02.2025 [19:36]

Estoniyanın paytaxtı Tallində Xocalı soyqırımının 33-cü ildönümü ilə əlaqədar anım tədbiri keçirilib.

Azərbaycanın Estoniyadakı səfirliyindən AZƏRTAC-a bildiriblər ki, əvvəlcə Xocalı soyqırımı qurbanlarının xatirəsi bir dəqiqəlik sükutla yad olunub.

Tədbirdə çıxış edən səfir Anar Məhərrəmov 1992-ci il fevralın 25-dən 26-na keçən gecə Ermənistan silahlı qüvvələrinin beynəlxalq hüququn norma və prinsiplərini kobud şəkildə pozaraq, Xocalı şəhərində yaşayan dinc və günahsız azərbaycanlılara qarşı xüsusi amansızlıqla hərbi cinayət törətdiyi barədə ətraflı məlumat verib. Diqqətə çatdırılıb ki, erməni quldur dəstələrinin Xocalıya hücumu zamanı 600-dən çox dinc sakin, o cümlədən çox sayda uşaq, qadın və qoca amansızcasına qətlə yetirilib.

A.Məhərrəmov qeyd edib ki, Azərbaycan dövləti, eyni zamanda, xaricdə yaşayan azərbaycanlılar, ictimai təşkilatlar Xocalı soyqırımını dünyaya tanıtdırmaq üçün çox böyük səylər göstəriblər. Bu baxımdan Heydər Əliyev Fondunun təşəbbüsü ilə həyata keçirilən “Xocalıya ədalət!” kampaniyası dünyanın müxtəlif yerlərində təsirli təbliğat vasitəsinə çevrilib.

Vurğulanıb ki, bəşəriyyətə qarşı törədilən bu dəhşətli cinayət cəzasız qalmamalı və dünya ictimaiyyəti tərəfindən pislənməlidir. Bir çox ölkələr tərəfindən artıq dövlət və ya parlament səviyyəsində Xocalı faciəsinin soyqırımı kimi tanındığı, bu qanlı cinayətin pislənildiyi iştirakçıların diqqətinə çatdırılıb. Bu baxımdan Estoniya-Azərbaycan parlamentlərarası dostluq qrupu tərəfindən bu soyqırımını qınayan Bəyanatın hər il qəbul edilməsinin önəmindən bəhs edilib.

Bu gün Xocalı şəhərinin işğaldan azad ediləndən sonra yenidən bərpa olunaraq dirçəldiyi diqqətə çatdırılıb.

Anım mərasimində çıxış edən Estoniya-Azərbaycan parlamentlərarası dostluq qrupunun sədri Riina Solman Xocalıda törədilmiş bu qətliamı insanlığa qarşı qanlı cinayət kimi qiymətləndirib, Xocalı soyqırımının 33-cü ildönümü ilə bağlı dostluq qrupu tərəfindən qəbul edilən Bəyanatın vacibliyini və önəmini vurğulayıb.

Estoniya ilə Azərbaycan arasında siyasi müstəvidə mövcud münasibətləri yüksək qiymətləndirən Riina Solman Prezident İlham Əliyevin Estoniya Prezidenti Alar Karisə bu ölkənin milli bayramı münasibətilə ünvanladığı təbrik məktubunun bunun bariz nümunəsi olduğunu bildirib.

Sonra litvalı kinorejissorlar Aleksandras Brokas və Mindauqas Urbonaviçiusun “Xocalıya ədalət!” təbliğat kampaniyası çərçivəsində hazırlanmış “Sonsuz Dəhliz” sənədli filmi və Xocalı soyqırımının dəhşətlərini əks etdirən fotosərgi nümayiş olunub.

Daha sonra Heydər Əliyev Fondu tərəfindən Xocalı soyqırımı haqqında hazırlanmış kitablar, broşürlər və nəşrlər tədbir iştirakçılara paylanılıb.

Qeyd edək ki, anım tədbirində Estoniya parlamentinin (Riigikogu) üzvləri, Estoniyanın sabiq xarici işlər naziri Kristiina Oyuland, Türkiyə, Qazaxıstan, Braziliya, Şimali Makedoniya, Moldova və Ukraynanın bu ölkədəki diplomatik nümayəndəliklərinin rəhbərləri və təmsilçiləri, ictimai xadimlər, elm adamları, Azərbaycan və tatar icmalarının nümayəndələri, həmçinin Tallin şəhərində təhsil alan gənc soydaşlarımız iştirak ediblər.

Paylaş:

Baxılıb: 626 dəfə