Dünyanın sonu...

Bakı:

24 °C

73 %

12 m/s

Əlaqə

AZ RU EN

Ana səhifə / Xəbər lenti / Dünyanın sonu...

Dünyanın sonu...

22.11.2022 [10:44]

Qlobal istiləşmənin qarşısı alınmazsa, 2050-ci ildə nələr olacaq?

Səidə RƏHİMLİ

Bir anlıq təsəvvür edək ki, 2050-ci ilə son bir neçə ilimiz qalıb. Qlobal istiləşmə kritik vəziyyətdədir, su ehtiyatımız tükənib, məhsuldarlıq azaldığı üçün qida ehtiyatları da tükənmək üzrədir. İnsanların əksəriyyəti evlərindən uzaq düşüb. Yer üzündəki 8 milyard insanın yarısından çoxu artıq yoxdur. Hər kəs yaşamaq üçün mübarizə aparır. Nəfəs almaq belə çətinləşib. Ağır xəstəliklər insanları bir-bir öldürür. Biz dönüb geriyə baxırıq və bu günlərə qayıdıb bu qaçılmaz sonu dəyişdirə bilmək üçün şans istəyirik. Bu gün o şans bizlərə verilib və bu ssenarini dəyişdirmək hər birimizin əlindədir. “Tək mənimlə nə olacaq ki?!” düşüncəsi sizi çaşdırmasın, hər şey elə bir tək sizinlə başlayacaq! Heç nə etməsək, bütün bunların həqiqətən yaşanacağını göstərən proqnozlara baxaq.

Hər kəsin gülərək xatırladığı 12.12.2012 tarixindən sonra yenə dünyanın sonu müəyyənləşdirildi. Budəfəki fərq isə bununla bağlı elmi sübutların olmasıdır. Bəşəri sivilizasiyanın gələcəyini praqnozlaşdıran “World One” superkompüteri bizə bəşəriyyətin qaçılmaz sonunun 2050-ci il tarixində olacağını xəbər verir: “Təxminən 2040-cı ildən 2050-ci ilə qədər bu planetdə sivil həyat öz mövcudluğunu dayandıracaq”. Bu kompüter hesablamaları doğum nisbətini və ətraf mühitin çirklənmə səviyyəsini nəzərə alan mürəkkəb alqoritmə əsaslanır. Superkompüterin təbii ehtiyatların və həyati vacib mineralların əlçatanlılığının azalması ilə bağlı bir neçə proqnozları artıq özünü doğruldub.

Proqnozlara əsasən, iqlim dəyişikliklərinin qarşısı alınmazsa, üç onillik ərzində sivilizasiyanın sonu gələcək. 2050-ci ilə qədər:

* dünya əhalisinin yarıdan çoxu ildə 20 gün ölümcül istilərlə üzləşəcək;

* məhsuldarlıq qlobal miqyasda beşdə bir azalacaq;

* Amazon meşələrinin ekosistemi dağılacaq;

* Arktikanın buzlaqları yayda tamamilə əriyəcək;

* İtaliya, ABŞ və Tanzaniyadakı bəzi buzlaqlar yox olacaq;

* dəniz səviyyəsi yüksələcək və s.

Hesablamalara görə, bir milyard insan dəniz səviyyəsinin yüksəlməsi nəticəsində su basa biləcək ərazilərdə yaşayır, bu da bir milyard iqlim miqrantı deməkdir.

Bir çox digər dünya ölkələrində və bizim ölkəmizdə bütün bunların qarşısını almaq yolunda müəyyən işlər görülür: tullantıların azaldılması, enerjiyə qənaət, havanın çirkləndirilməsinin qarşısını almaq üçün müəyyən tədbirlər və s. İqlim dəyişikliyinə qarşı mübarizəyə biz də qatılmalıyıq. Aşağıda sadalananlara əməl etməliyik ki, insanların yaşaması üçün əlverişli olan dünyamızı qoruya bilək:

* lazımsız su israfı edilməməlidir;

* enerjiyə maksimum dərəcədə qənaət edilməlidir;

* ətraf mühit çirkləndirilməməlidir;

* plastik tullantılar azaldılmalı və hətta plastik vasitələrdən heç istifadə olunmamalıdır;

* şəxsi nəqliyyat vasitələri yerinə ictimai nəqliyyatlardan istifadəyə üstünlük verilməlidir;

* ağacların kəsilməsi ilə istehsal edilən heç bir vasitə israf edilməməlidir;

* kürklər üçün və ya zövq uğruna heyvanlar, xüsusilə də nəsli tükənməkdə olan canlılar ovlanmamalıdır;

* dənizlər, okeanlar, çaylar təmiz saxlanmalı və çirkləndirilməməlidir.

Bütün bunlar bizə bir oyun kimi gəlməsin. Əgər indi bizə verilən bu şansı dəyərləndirə bilməsək, gələcəkdə təkrar keçmişə qayıtmaq şansımız olmayacaq. Dünyamızı, havamızı, həyatımızı qoruyaq!

Paylaş:

Baxılıb: 833 dəfə