XIV Beynəlxalq Multikulturalizm Qış Məktəbi Quba və Qusarda davam edir

Bakı:

10 °C

81 %

8 m/s

Əlaqə

AZ RU EN

Ana səhifə / Xəbər lenti / XIV Beynəlxalq Multikulturalizm Qış Məktəbi Quba və Qusarda davam edir

XIV Beynəlxalq Multikulturalizm Qış Məktəbi Quba və Qusarda davam edir

15.03.2024 [14:13]

Bakı Beynəlxalq Multikulturalizm Mərkəzinin təşkil etdiyi “Sabahın liderləri: Gənclər sivilizasiyaların toqquşmasına qarşı” adlı XIV Beynəlxalq Multikulturalizm Qış Məktəbi Quba və Qusarda davam etdir.

Qış məktəbinin iştirakçıları “Multikulturalizmin Azərbaycan modeli sivilizasiyaların toqquşmasına cavab kimi” mövzusunda mühazirə dinləyiblər. Mühazirəni Azərbaycan Dillər Universitetinin dosenti Afət Musayeva oxuyub. O, qeyd edib ki, Azərbaycan müxtəlif dəyərləri bir-biri ilə birləşdirən körpüdür. Tarixi faktlar da sübut edir ki, fərqli dünyagörüşünə, milli-mənəvi dəyərlər sisteminə, dini baxışlara sahib olan xalqların bir-biri ilə dialoq qurmaq, ortaq dil tapmağa çalışmaq kimi nəcib təşəbbüsləri bir çox hallarda bəşəriyyəti fəlakətlərdən, müharibə və toqquşmalardan xilas etmişdir. Tarixən başqa millətlərə, dinlərə, fərqli mədəniyyətlərə dözümlü yanaşması ilə seçilən Azərbaycanda müşahidə edilən tolerantlıq xalqımızın milli-mənəvi dəyərlər sistemindən, düşüncə tərzindən qaynaqlanır. Geostrateji mövqeyinə görə müxtəlif dünyagörüşlərin, milli-mənəvi dəyərlərin qovuşduğu bu torpaqlarda yaşayan insanlar birgəyaşayışın təkcə coğrafi deyil, həm də mənəvi təzahürünü, fərqli mədəniyyətlərin dialoqunu gündəlik həyatında hiss edir.

Qış məktəbinin iştirakçıları “Şahdağ” Qış-Yay Turizm Kompleksində olublar. Bakı Beynəlxalq Multikulturalizm Mərkəzinin Layihələr şöbəsinin müdiri İrina Kuninanın “Sivilizasiyaların toqquşması, yoxsa dialoqu?” mövzusunda mühazirəsini dinləyiblər. Mühazirədə vurğulanıb ki, hazırda dünya birliyində dialoq qlobal problemlərin həlli yoludur. Bu gün mədəniyyətlərin dialoqu anlayışı geniş məna kəsb edir, o cümlədən təkcə müxtəlif mədəniyyətlər tərəfindən inkişaf etdirilən mədəni dəyərlərin dialoqu deyil, həm də qloballaşma məkanında xalqların qarşılıqlı əlaqəsi və qarşılıqlı anlaşma forması kimi dialoq, sərhədlərin kəsildiyi məkandır. Sivilizasiyalararası dialoq, dünyada tolerantlığın və multikulturalizmin inkişafına təkan verir. Çünki, məhz dialoq dünya xalqlarının yaxınlaşması və qarşılıqlı olaraq bir-birini tanıması üçün şərait yaradır. Məruzəçi diqqətə çatdırıb ki, bu gün Azərbaycan təkcə Şərqdən Qərbə və Qərbdən Şərqə gedən yolların keçidi deyil, həmçinin siyasi və iqtisadi maraqların, dinlərin, mədəniyyətlərin, sivilizasiyaların da qovuşduğu məkana, qarşılıqlı tamamlanma və vəhdət rəmzinə çevrilib.

Mühazirədən sonra qış məktəbinin iştirakçıları Qubada dağ yəhudilərinin kompakt yaşadığı Qırmızı Qəsəbədə olublar, yerli əhali ilə görüşüblər. Məscid, kilsə və sinaqoqları, Quba Soyqırımı Memorial Kompleksini ziyarət ediblər.

Qış məktəbi çərçivəsində təşkil olunan “Öz xalqını təqdim et” musiqili axşamlarda iştirakçı tələbələr öz xalqlarının mədəniyyəti, adət ənənələri ilə bağlı məlumat verib.

Qeyd edək ki, martın 17-dək davam edəcək qış məktəbində Türkiyə, Braziliya, Rumıniya, Rusiya, Amerika Birləşmiş Ştatları, Gürcüstan, Bolqarıstan, Yaponiya, Əfqanıstan, Çin, Özbəkistan, Qazaxıstan və Azərbaycandan 20-dən artıq tələbə iştirak edir.

Xatırladaq ki, Yay və Qış məktəbləri layihəsi BBMM-in “Azərbaycan multikulturalizmi fənninin xaricdə və ölkə universitetlərində tədrisi” layihəsinin məntiqi davamıdır. Tədris layihəsi çərçivəsində dünyanın və Azərbaycanın ali təhsil müəssisələrində Azərbaycan multikulturalizmini öyrənən tələbələr üçün yay və qış məktəbləri təşkil olunur. Burada məqsəd tələbə gənclərin nəzəri biliklərinin multikultural və tolerant dəyərlərin qorunub yaşandığı ölkəmizdə şahid olmalarına şərait yaratmaqdır. Artıq dəyərli ənənəyə çevrilən multikulturalizm yay və qış məktəblərinin nəticəsi olaraq xaricdə Azərbaycanın gənc dostlarının və onların yaxın çevrəsinin timsalında ölkəmizin haqq işini dəstəkləyən intellektual gənclərdən ibarət ünsiyyət platforması və güclü lobbisi formalaşıb. İntensiv şəkildə davam edən bu proses sübut edir ki, Prezident İlham Əliyevin Azərbaycanın dünyada tanıdılması istiqamətində müəyyənləşdirdiyi hədəflər uğurla reallaşmaqdadır.

Paylaş:

Baxılıb: 601 dəfə