Sözün gücü....

Bakı:

17°C

77%

5m/s

Əlaqə

AZ RU EN

Ana səhifə / MEDİA / Sözün gücü....

Sözün gücü....

20.12.2023 [10:40]

İnformasiya müharibəsində qalibiyyətin əhəmiyyəti

Günel ABBASOVA

Azərbaycan 44 günlük Vətən müharibəsindəki tarixi qələbəsi ilə öz iradəsi və potensialını nümayiş etdirdi. Xalq Prezident İlham Əliyevin strateji baxışlarına güvənərək onun rəhbərliyi altında öz sözünü dedi, bütün dünyaya nümayiş etdirdi ki, heç bir halda torpaqlarının bir qarışından belə imtina etməyəcək. Həmin müddətdə Ermənistanın saxta təbliğat maşını artıq keçmişdə qalmış münaqişə vəziyyəti ilə bağlı həqiqətləri təhrif edirdi. Son illərdə ölkə Prezidenti bütün mötəbər tribunalardan Azərbaycanın ədalətli mövqeyini dünyaya çatdırmaqla yanaşı, həm də qəbul etdirməyi də bacardı.

Məsələ ilə bağlı filologiya elmləri doktoru, Bakı Dövlət Universitetinin Jurnalistika fakültəsinin dekanı Vüqar Zifəroğlu “Yeni Azərbaycan”a açıqlamasında bildirib ki, həm 44 günlük Vətən müharibəsindən əvvəl, həm müharibədən sonrakı dönəmdə Azərbaycan tərəfi öz həqiqətlərini dünya ictimaiyyətinə çatdırmaq üçün bütün kütləvi kommunikasiya vasitələrindən, həmçinin mümkün olan bütün vasitələrdən maksimum istifadə etməkdə idi.

“Ümumiyyətlə, onu qeyd etmək lazımdır ki, bu gün qlobal mediaya erməni lobbisinin təsir imkanları həddən artıq genişdir. 80-ci illərin ortalarından başlayaraq, onlar həmin beynəlxalq media qurumları vasitəsi ilə təəssüflər olsun ki, həm Azərbaycan əleyhinə, həm də Qarabağa qarşı müəyyən kampaniya qura bilmişdilər. Ermənilərin bizə qarşı apardığı əsas informasiya müharibəsi də məhz həqiqətlərimizin təhrif edilməsi, manipulyasiyalar və ümumiyyətlə, həm tarixi, həm müasir gerçəkliyi tamamən əks etdirməyən, onun əleyhinə olan informasiyalar yaratmaqdan ibarət idi. Lakin buna baxmayaraq, son illərdə bildiyimiz kimi digər media qurumlarında da bizimlə bağlı kifayət qədər informasiyalar gedir. Həqiqətləri əks etdirilən xəbərlər yer alır. Məsələn, elə 44 günlük Vətən müharibəsi ilə yanaşı, son bir ayda baş verən proseslər fonunda beynəlxalq mediada gedən kontentləti buna misal gətirə bilərik”,-deyə V.Zifəroğlu bildirib.

Müsahibimiz xüsusilə qeyd edib ki, Qərb mediasında kifayət qədər obyektiv informasiyalar olur. Müxtəlif televiziya kanallarında bununla əlaqədar müxtəlif verilişlər yayımlandı və ekspert rəyləri dinlənildi: “Bu sahədə əlbəttə ki, böyük işlər görülüb. Ancaq yenə də işlər davam etməlidir və qarşıda görməli olduğumuz işlər çoxdur. İndinin özündə də nə qədər “fake” xəbərlərdən, manipulyasiya edici xəbərlərdən istifadə edirlər. Buna da misal onu gətirə bilərik ki, yaxın keçmişdə yaşlı erməni qadına Azərbaycan polisi su verirdi. Həmin video görüntünü montaj edib ictimaiyyətə elə çatdırdılar ki, mövzudan tamamilə kənar qaldı. Tamamilə əks effekt verdi. Bunu da erməni tərəfi bütün kütləvi informasiya vasitələrində yanlış məlumat kimi yaymağa davam etdilər və çox ayıb bir davranış oldu”.

Vüqar Zifəroğlu sonda bildirib ki, ermənilərin “fake” və dezinformasiyalarının, manipulyasiyaedici xəbərlərinin qarışını almalıyıq. Baş verən proseslərlə bağlı doğru xəbərlərin yayılmasına şərait yaratmalıyıq: “Ermənilərin bu cür davranışlar sərgiləməsinə baxmayaraq, biz də öz mövqeyimizdən doğru xəbərləri dünya ictimaiyyətinə obyektiv və dəqiq çatdırmalıyıq”.

Milli Məclisin üzvü Tahir Rzayev qeyd edib ki, Vətən müharibəsinə qədər bizim qələbəmizin siyasi əsasları və elementləri artıq mövcud idi: “Azərbaycan onun ardınca da hərbi qələbə qazanaraq torpaqları işğaldan azad etdi. Təbii ki, bu vəziyyətdən beynəlxalq informasiya müstəvisində Ermənistanın təcavüzkar dövlət mahiyyətini, işğalçı dövlət olmasını dünyaya çatdırmaq vacib məsələlərdən biri idi. Bunu bizim tarixi qələbəmizi möhkəmləndirən element də hesab etmək olar.

Təsadüfi deyil ki, Prezident İlham Əliyev müharibə dövründə, elə ondan sonra da dünyanın ən mötəbər media orqanlarına müsahibələr verərək münaqişə vəziyyəti ilə bağlı həqiqətləri davamlı olaraq dünyaya çatdırırdı. Prezident müsahibələrində o qədər ciddi arqumentlərə istinad edirdi ki, onun söylədiklərini qəbul etməmək mümkün deyildi. Bu faktor Azərbaycanın informasiya mübarizəsində mövqelərini möhkəmləndirirdi. Azərbaycanın mühüm strateji addımlarından biri də ondan ibarət idi ki, dünyanın müxtəlif ölkələrindən olan jurnalistlər Azərbay?anda akkreditə olunmuş diplomatik korpusun nümayəndələri işğaldan azad olunmuş ərazilərə intensiv şəkildə səfərlər edirdilər. İnformasiya müharibəsində bu da çox mühüm rola malik idi. Yəni, dövlət başçısının atdığı hər addımında həm də informasiya müharibəsinin elementi var idi. Misal üçün, torpaqlarımız işğaldan azad edildikdən sonra Prezident dəfələrlə həmin ərazilərə səfərləri zamanı sükan arxasından erməni vandalizminin izlərini nümayiş etdirirdi. Təbii ki, Azərbaycan Prezidentinin hər bir səfəri, hər sözü dünya mediası tərəfindən yaxından izlənilir”, - deyə qeyd edib.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Müzəffər Ali Baş Komandanın rəhbərliyi ilə 44 günlük “Vətən Müharibəsi”ndə qazanılmış tarixi qələbə, Ermənistan tərəfindən törədilmiş sülh və insanlıq əleyhinə cinayətlər, habelə müharibə cinayətləri ilə bağlı həqiqətlərin dünya ictimaiyyətinə çatdırılması” istiqaməti üzrə hazırlanmışdır

Paylaş:

Baxılıb: 511 dəfə