Beynəlxalq Multikulturalizm qış məktəbinin iştirakçıları Quba və Xaçmazda olublar

Bakı:

13 °C

76 %

14 m/s

Əlaqə

AZ RU EN

Ana səhifə / Sosial / Beynəlxalq Multikulturalizm qış məktəbinin iştirakçıları Quba və Xaçmazda olublar

Beynəlxalq Multikulturalizm qış məktəbinin iştirakçıları Quba və Xaçmazda olublar

12.02.2016 [09:59]

Bakı Beynəlxalq Multikulturalizm Mərkəzi, Azərbaycan Respublikasının Prezidenti yanında Bilik Fondu və Bakı Slavyan Universitetinin birgə təşkilatçılığı ilə fəaliyyətə başlayan “Multikulturalizm Azərbaycanda həyat tərzi kimi: öyrən, araşdır, paylaş-2016” adlı Beynəlxalq Multikulturalizm qış məktəbi fevralın 11-də Qubada öz işini davam etdirib.
AZƏRTAC xəbər verir ki, səhər saatlarında Qubaya gələn qış məktəbinin iştirakçıları burada yerli gənclərlə birgə Ümummilli lider Heydər Əliyevin abidəsini ziyarət ediblər.
Quba rayon İcra Hakimiyyətinin başçısı Yaşar Məmmədov Beynəlxalq Multikulturalizm qış məktəbinin iştirakçılarını salamlayaraq, rayondakı multikultural durum barədə tələbələrə məlumat verib: “Quba rayonunda 149 kənd (onlardan yeddisi qəsəbədir) və bir şəhər yerləşir. Əhalisi 160 min nəfərdən artıqdır. Bağçılıq və turizmin inkişaf etdiyi Quba alması və xalçaları ilə məşhurdur. Quba çoxmillətli rayondur, burada 20-dən artıq azsaylı xalq yaşayır. Onların 79 faizini azərbaycanlılar, 9 faizini tatlar, 6 faizini ləzgilər, 1,8 faizini yəhudilər, 1,4 faizini türklər, 1,4 faizini xınalıqlılar və 1,2 faizini digər xalqların nümayəndələri təşkil edir. Uzun əsrlərdir biz bu millətlərlə yanaşı, mehriban yaşayırıq. Qubadakı Qırmızı Qəsəbədə çayın bir sahilində sinaqoqlar, o biri sahilində məscidlər fəaliyyət göstərir. Bu fakt Azərbaycanda multikulturalizm və tolerantlıq ənənələrinin mövcudluğunun sübutudur. Prezident İlham Əliyevin Sərəncamı ilə 2016-cı ilin ölkəmizdə “Multikulturalizm ili” elan edilməsi multikulturalizmin Azərbaycan xalqının həyat tərzi olması ilə yanaşı, dövlət siyasətində prioritet istiqamət olduğunun göstəricisidir. Qubada qış məktəbinin iştirakçılarını 20-yə yaxın qubalı gənc də müşayiət edəcək. İnanıram ki, buradakı birgə səfərləriniz və görüşləriniz zamanı qubalı gənclərlə qış məktəbinin tələbələri arasında ömür boyu sürən dostluqlar yaranacaq”.
Quba Soyqırımı Memorial Kompleksinin ziyarətindən sonra tələbələr qubalı gənclərlə birgə Azərbaycandakı Dağ Yəhudiləri icmasının sədri Milix Yevdayevin müşayiəti ilə Qubadakı Qırmızı Qəsəbədə olub, sinaqoqlara baş çəkiblər. Quba Rayon İcra Hakimiyyəti başçısının Qırmızı qəsəbə inzibati ərazi dairəsi üzrə nümayəndəsi Pisax İsakov tələbələri salamlayaraq yəhudilərin adıçəkilən qəsəbədə, eləcə də Azərbaycanda məskunlaşması tarixindən, ölkəmizdəki multikultural mühitdən və tolerantlıq ənənələrindən söz açıb.
Sonra qış məktəbinin iştirakçıları ilə Qırmızı qəsəbənin yerli gəncləri birgə çay süfrəsi arxasında səmimi söhbət aparıblar. Quba rayon Gənclər Şurasının sədri Ramin Xudayev tələbələrlə əlaqələrin daha da intensiv və davamlı olması üçün təkliflə çıxış edib.
Həmin gün Xaçmaz rayonuna gələn gənclər Xaçmaz rayon Tarix-Diyarşünaslıq Muzeyi ilə də tanış olublar.
Litva Edukologiya Universitetinin professoru Vidas Kavalyiauskas və Millətlərarası, multikulturalizm və dini məsələlər üzrə Dövlət müşaviri xidmətinin baş məsləhətçisi, professor Etibar Nəcəfovun moderatorluğu ilə “Dünya təcrübəsində multikulturalizm modelləri” mövzusunda “dəyirmi masa” təşkil olunub. “Dəyirmi masa”da dünyanın müxtəlif multikulturalizm modelləri müzakirə edilib, multikulturalizmin Azərbaycan modelinin mahiyyətindən ətraflı söhbət açılıb.
Professor Etibar Nəcəfov Azərbaycan multikulturalizminin spesifik xüsusiyyətləri barədə tələbələrə məlumat verərək bildirib ki, Azərbaycan əhalisinin böyük əksəriyyətinin müsəlman olmasına baxmayaraq, Konstitusiya qarşısında bütün dinlər bərabərdir: “Azərbaycan multikulturalizmini fərqləndirən xüsusiyyətlərdən biri də odur ki, bu ali dəyər xalqımızın həyat tərzi olması ilə yanaşı, dövlət siyasətində də prioritet istiqamətlərdən biridir. Azərbaycan dövləti ərazisində müxtəlif dinlərə aid abidələr inşa və təmir olunur”.
Tədris gününün sonunda qış məktəbinin müdavimləri Xaçmaz Olimpiya İdman Kompleksində yerli gənclərin iştirakı ilə futbol, voleybol, üzgüçülük, şahmat, bilyard yarışları keçiriblər.
Qış məktəbinin dördüncü günü “Musiqi koleydeskopu” əyləncə proqramı ilə başa çatıb.

Paylaş:

Baxılıb: 748 dəfə