Azərbaycan-Türkiyə qardaşlığı əbədidir

Bakı:

26 °C

44 %

6 m/s

Əlaqə

AZ RU EN

Ana səhifə / YAP xəbərləri / Azərbaycan-Türkiyə qardaşlığı əbədidir

Azərbaycan-Türkiyə qardaşlığı əbədidir

12.06.2026 [14:04]

Şuşa Bəyannaməsinin imzalanmasından 5 il keçir. Bu sənədin imzalanmasının Milli Qurtuluş Gününə təsadüf etməsi rəmzi məna daşıyır. 15 iyun 1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycanı parçalanmaq və məhv olmaq təhlükəsindən xilas etdi. 2021-ci ildə məhz bu tarixdə imzalanan Şuşa Bəyannaməsi dövlət müstəqilliyimizin dönməzliyini və suverenliyimizin sarsılmazlığını bir daha rəsmiləşdirdi. Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın birgə imzaladığı bu Bəyannamə iki dost, qardaş ölkənin münasibətlərinin gələcək inkişafının yol xəritəsi oldu. Şuşa Bəyannaməsində yer alan günümüzün aktual məsələləri sırasında Azərbaycan və Türkiyə diaspor təşkilatlarının birgə fəaliyyətlərini, eyni zamanda, media sahəsində əməkdaşlığı xüsusi qeyd etməliyik. Azərbaycan-Türkiyə Media Platformasının yaradılması strateji qərar olmaqla hər iki dövlətin maraqları baxımından perspektivlərə hesablanıb. Reallıq budur ki, Ermənistan havadarlarının dəstəyi ilə Azərbaycana qarşı torpaq iddiası irəli sürməklə yanaşı, qardaş ölkəyə qondarma “erməni soyqırımı” məsələsi ilə çıxış edir. Türkiyə bu məsələnin həlli ilə bağlı tarixçilərdən ibarət Azərbaycan-Türkiyə birgə komissiyasının yaradılması və dünya arxivlərinin açılması təşəbbüsünü irəli sürsə də qarşı tərəf fakt qarşısında acizliyini dərk etdiyi üçün müxtəlif bəhanələrlə bu məsələdən yayındığını, bununla tarixçilərin deyil, siyasətçilərin məşğul olduğunu bəyan etməklə illərdir apardıqları təbliğatın saxtalığını təsdiqləyir. Beynəlxalq təşkilatlarda vahid mövqedən çıxış edərək dünyaya ədalət, beynəlxalq hüquq anlayışlarının mahiyyətini və mövcudluğunu çatdıran iki qardaş ölkə həm diaspor təşkilatlarının birgə fəaliyyətini genişləndirməklə, həm də yaratdıqları Media Platforması ilə həqiqətlərinin təbliğində uğurlara imza atırlar. Şuşa Bəyannaməsində tərəflər Ermənistanın Türkiyəyə qarşı əsassız iddialarının, tarixin təhrif olunması və tarixi faktların təhrif olunmaqla siyasiləşdirilməsi cəhdlərinin regionda sülhə və sabitliyə ziyan vurduğunu vurğulayaraq bu kontekstdə 1915-ci il hadisələri ilə bağlı olaraq öz arxivlərini açan Türkiyənin Ermənistandakı və digər ölkələrdəki arxivlərin açılması və bu mövzuda tarixçilər tərəfindən araşdırmaların aparılmasına yönəlmiş səylərini qətiyyətlə dəstəkləyirlər. Azərbaycan-Türkiyə Media Platformasının imkanları nəzərə alınmaqla, iki ölkənin aidiyyəti qurumları arasında informasiya, kommunikasiya və ictimai diplomatiya sahələrində əməkdaşlığı daha da gücləndirəcək və bu çərçivədə xarici işlər nazirlikləri arasında davamlı olaraq informasiya üzrə sıx məsləhətləşmələr və mübadilələr həyata keçiriləcək. Ümumilikdə Şuşa Bəyannaməsi Azərbaycan-Türkiyə dostluğunun, qardaşlığının, müttəfiqliyinin bütün istiqamətlərdə təsdiqi və bu birliyin sarsılmazlığının, hər iki ölkənin daim bir-birinin yanında olmasının, bundan sonra da birgə addımlayacaqlarının Qarabağdan, Şuşadan verilən mesajıdır: Biz bir yerdəyik, bir yerdə olacağıq, gücümüz də gündən-günə artacaq.

Türkiyə Prezidenti Rəcəb Tayyib Ərdoğan çıxışlarında bu məqamı xüsusi qeyd edir ki, enerjidən nəqliyyata, müdafiədən ticarətə, kənd təsərrüfatından təhsilə qədər hər sahədə Azərbaycanla güclü əməkdaşlıqlar qururuq. Prezident İlham Əliyevin bənzərsiz töhfələri sayəsində münasibətlərimizi hər gün təkcə bölgəyə deyil, bütün dünyaya nümunə olacaq səviyyəyə çatdırırıq. Dövlətimizin başçısı İlham Əliyev Şuşa Bəyannaməsinin imzalanmasından sonra mətbuata bəyanatında “Əziz qardaşım Azərbaycanda dəfələrlə olub, ancaq biz ilk dəfə Qarabağ torpağında - Şuşada bir yerdəyik. Bu səfərin tarixi əhəmiyyəti var. Çünki bu gün imzalanmış Birgə Bəyannamə - Müttəfiqlik haqqında Bəyannamə əlaqələrimizi ən yüksək zirvəyə qaldırır. Bəyannamənin adı Müttəfiqlik haqqında Bəyannamədir və bu ad özü-özlüyündə hər şeyi göstərir, hər şeyi deyir. Biz bu gün keyfiyyətcə yeni əlaqələr qurmuşuq və bu Bəyannamədə göstərilən bütün müddəalar bizim gələcək iş birliyimizin təminatçısıdır” söyləyərək iki dost, qardaş ölkənin münasibətlərinin dünəninə, bu gününə baxış əsasında qarşıdakı dövrün hədəflərini açıqladı. Azərbaycan-Türkiyə dostluğu, qardaşlığı əbədidir.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 67 dəfə