vardanyanların məkrli planı rədd edildi

Bakı:

25 °C

41 %

6 m/s

Əlaqə

AZ RU EN

Ana səhifə / Xəbər lenti / vardanyanların məkrli planı rədd edildi

vardanyanların məkrli planı rədd edildi

14.12.2022 [10:36]

Erməni deputat AŞPA-nı aldada bilmədi

Nardar BAYRAMLI

Avropa Şurası Parlament Assambleyasının (AŞPA) Hüquq Komitəsinin iclasında Ermənistan parlamentinin deputatı Vladimir Vardanyan Azərbaycanın ünvanına əsassız ittihamlar irəli sürüb. Vladimir Vardanyan Azərbaycanın ekoloji sahə üzrə ixtisaslaşmış qeyri-hökumət təşkilatlarının Rusiya sülhməramlılarının müvəqqəti nəzarəti altında olan ərazilərdə faydalı qazıntı yataqlarının qanunsuz istismarı əleyhinə Şuşa-Xankəndi yolunda etiraz aksiyasının guya rəsmi Bakının Laçın dəhlizini bağlamaqla Xankəndindəki ermənilərin Ermənistanla əlaqəsini kəsmək, erməniləri o ərazilərdən çıxarmaq məqsədinə “xidmət etdiyini” söyləyib. Erməni deputat öz yalanlarının miqyasını daha da şişirdərək hətta heç bir arqument gətirmədən Azərbaycanı “soyqırımı” təhlükəsi yaratmaqda günahlandırmağa, Ukraynadakı proseslərlə paralellər aparmağa cəhd edib.

İclasda iştirak edən Azərbaycanın AŞPA-dakı nümayəndə heyətinin üzvü, millət vəkili Kamal Cəfərov çıxışında Kollektiv Təhlükəsizlik Müqaviləsi Təşkilatının, Avrasiya və Gömrük İttifaqlarının üzvü olan Ermənistanın nümayəndəsinin Ukrayna ilə paralellər aparmaq cəhdini ikiüzlülük adlandırıb. K. Cəfərov bildirib ki, Azərbaycanın aidiyyəti qurumları “Qızılbulaq” qızıl və “Dəmirli” mis-molibden yataqlarına yerində baxış, qanunsuz istismarın dayandırılması, müxtəlif istiqamətlər üzrə, o cümlədən ətraf mühitə dəyən zərərin monitorinqinin həyata keçirilməsi ilə bağlı həmin ərazidə müvəqqəti fəaliyyət göstərən Rusiya sülhməramlılarına bildiriş verib. Daha sonra monitorinq günü həmin ərazidə cinayətkar-oliqarx Ruben Vardanyan bir qrup erməni ilə təxribat törədib və monitorinqə mane olub. Rus sülhməramlıları bu təxribatın qarşısını ala bilməyib və ya almaq istəməyib. İndi isə Azərbaycan vətəndaşları, QHT nümayəndələri toplaşmaq azadlığından istifadə edərək Rusiya sülhməramlılarının komandanı Andrey Volkovu görüşə çağırırlar.

Kamal Cəfərov qeyd edib ki, nə qədər ki, Volkov görüşə gəlməyəcək, həmin yolda aksiya davam edəcək. Ona görə də yolun bağlı qalma səbəbi elə Volkovun özüdür.

Azərbaycanın AŞPA-dakı nümayəndə heyətinin üzvü, millət vəkili Erkin Qədirli isə çıxışında bildirib ki, Laçın-Xankəndi yolu yeganə yol deyil, ondan daha geniş və sürətli yeni tikilmiş magistral yol var. Onun sözlərinə görə, bu yolu Azərbaycan tərəfi tikib, ancaq bəzi ermənilər həmin yoldan istifadə etməkdən imtina edirlər. Qeyd edilib ki, həmin əraziyə rus sülhməramlıları nəzarət edir və hazırda nə təxribat baş verirsə, rus sülhməramlılarının məsuliyyətidir. Erkin Qədirli Rusiya sülhməramlılarının Azərbaycanın razılığını almadan həmin ərazilərə hər kəsin keçməsinə şərait yaratdıqlarını söyləyib. Buna misal olaraq Fransada prezident seçkilərində namizəd olmuş Paris şəhərinin merinin Azərbaycanın icazəsi olmadan Azərbaycan ərazisinə buraxıldığını xatırladıb. Millət vəkili qeyd edib ki, ermənilərin strategiyası Azərbaycanla barışmaq və rus qoşunlarını Ermənistan ərazisindən, rus sülhməramlılarını isə Qarabağdan çıxarmaq olmalıdır. Çünki sülhməramlılar Qarabağdan erməni təcavüzü nəticəsində məcburi köçkün vəziyyətinə düşmüş azərbaycanlıların geri qayıtmasına, iki icma arasında ünsiyyətin qurulmasına şərait yaratmırlar. Bütün bunları nəzərə alaraq Erkin Qədirli Ermənistan deputatının Azərbaycana qarşı son iddialarının tamamilə əsassız olduğunu vurğulayıb.

Onu da qeyd edək ki, Vladimir Vardanyan AŞPA Hüquq Komitəsində son hadisələrlə bağlı qətnamə layihəsinin hazırlanmasını təklif edib. Lakin prosedur qaydalarına zidd olduğu üçün bu təklif rədd olunub. Vladimir Vardanyanın daha sonra AŞPA Hüquq Komitəsinin sədrinin qərəzli bəyanat verməsi yönündə təklifi də qəbul olunmayıb. Beləliklə, ermənilərin AŞPA-da ölkəmizə qarşı daha bir məkrli planının qarşısı alınıb. Azərbaycan cəmiyyəti dəfələrlə şahid olub ki, ermənilər və erməni lobbisi müxtəlif beynəlxalq platformalarda, o cümlədən AŞPA-da dövlətimizə qarşı müxtəlif əsassız sənədlərin qəbul edilməsinə çalışıblar. Çox zaman bu planlar fiaskoya uğrayıb. Bütün bunlar göstərir ki, artıq ermənilər dünyanı öz yalanlarına inandıra bilmirlər.

Paylaş:

Baxılıb: 461 dəfə