Lavrovun Ankara səfəri...

Bakı:

14°C

82%

3m/s

Əlaqə

AZ RU EN

Ana səhifə / Analitik / Lavrovun Ankara səfəri...

Lavrovun Ankara səfəri...

08.04.2023 [10:50]

XİN rəhbərləri birgə mətbuat konfransı keçirdi...

Rusiyanın xarici işlər naziri Sergey Lavrov Türkiyəyə səfər edib. Səfər çərçivəsində Ankarada Türkiyənin xarici işlər naziri Mövlud Çavuşoğlu ilə rusiyalı nazir arasında görüş baş tutub. Görüşdə bir sıra məsələlər, o cümlədən, Cənubi Qafqazdakı durum barədə fikir mübadiləsi aparılıb. Xarici işlər nazirləri görüşdən sonra birgə mətbuat konfransı keçiriblər. “Milliyyət” qəzetinin məlumatına görə, mətbuat konfransında çıxış edən nazir Çavuşoğlu bildirib ki, iki ölkə arasında daimi əlaqələr mövcuddur. Eyni zamanda iki dövlətin ortaq gündəmləri də mövcuddur: “Biz əsasən regional məsələləri müzakirə etdik. Xüsusilə, Ukrayna mövzusu görüşümüzün dominant mövzusu idi. Təəssüf ki, davam edən müharibə bütün dünyaya, xüsusən də Rusiya və Ukraynaya ziyan vurur. Vurğuladıq ki, müharibə danışıqlar yolu ilə bitməlidir. Türkiyə Prezidenti Rəcəb Tayyib Ərdoğan həm cənab Putinlə, həm də cənab Zelenski ilə daim təmasdadır”.

Rusiyalı nazirlə taxıl koridoru məsələsini də müzakirə etdiklərini deyən Çavuşoğlu sazişin davamlı olmasına önəm verdiklərini diqqətə çatıdırıb və bu razılığı danışıqların uğurlu nəticəsi kimi qeyd edib. Nazir deyib ki, bu, həm də dünya ərzaq böhranının aradan qalxması üçün vacib şərtdir. “NATO Xarici İşlər Nazirləri toplantısı çərçivəsində Böyük Britaniya və ABŞ xarici işlər nazirləri ilə görüşdük. Taxıl müqaviləsinin davam etməsi üçün məsələlər həll edilməlidir”.

Çavuşoğlu: Cənubi Qafqazda daimi sabitlik və sülh üçün addımlar atılmalıdır

Sergey Lavrovla regional məsələləri də müzakirə etdiklərini bildirən Çavuşoğlu Suriya və Liviya məsələlərinə də toxunulduğunu diqqətə çatdırıb. Nazir deyib ki, Cənubi Qafqaz da müzakirələrin əsas predmetlərindən olub: “Biz Cənubi Qafqazı da dəyərləndirdik. Azərbaycanla Ermənistan arasındakı prosesi, Türkiyə ilə Ermənistan arasındakı normallaşma prosesini qiymətləndirdik. Cənubi Qafqazda daimi sabitlik və sülh üçün addımlar atılmalıdır”.

AKKUYU Atom Elektrik Stansiyası aprelin 27-də fəaliyyətə başlayacaq...

Nazir Çavuşoğlu AKKUYU Atom Elektrik Stansiyasının açılış tarixini də açıqlayıb. Belə ki, aprelin 27-də Akkuyu Atom Elektrik Stansiyasının birinci mərhələsinin açılışı olacaq. Eyni zamanda, ikitərəfli əlaqələrin inkişafı da nazirlərin əsas müzakirə predmetlərindən olub: “İkitərəfli əlaqələrimizi müxtəlif ölçülərlə qiymətləndirmək imkanımız oldu. İqtisadi və ticari əlaqələrimizi yaxşılaşdırmaq üçün nələr edə biləcəyimizi müzakirə etdik. Digər tərəfdən, turizm hər zaman əməkdaşlığımızın mühüm elementi olub. Təbii ki, qarşıdakı dövrdə Rusiyadan Türkiyəyə daha çox turistin gələcəyini gözləyirik”.

Səfər mart ayına planlaşdırılsa da...

Rusiyanın XİN rəhbəri Sergey Lavrov isə bildirib ki, bu səfər mart ayına planlaşdırılsa da, Türkiyədə baş verən zəlzələ ilə bağlı təxirə salınmışdı. İkitərəfli görüşdə əsas məsələləri nəzərdən keçirdiklərini deyən rusiyalı nazir münasibətlərdəki yüksək tempin iki ölkə liderləri arasındakı səmimiyyətdən irəli gəldiyini vurğulayıb. May ayında keçirilməsi nəzərdə tutulan Qara Dəniz Əməkdaşlıq Təşkilatı Parlament Baş Assambleyasının iclası çərçivəsində də hökumətlər səviyyəsində müxtəlif təmasların olacağı vurğulanıb: “Münasibətlərimizdə hərəkətverici qüvvə olan layihələrdən danışdıq. Xüsusilə, Atom Elektrik Stansiyasını müzakirə etdik. Aprelin 27-də biz stansiyanın açılışına nüvə enerjisini göndərmiş olacağıq. Türkiyədə qaz mərkəzi yaradılacaq. Keçən il rəhbərlərimiz bu qaz mərkəzi ilə bağlı qərar verdilər və biz bu qərarın əhəmiyyətini indidən görürük”.

Lavrov: Cənubi Qafqazda əməkdaşlığa ehtiyac var

Rusiya XİN rəhbəri də öz növbəsində danışıqlarda Cənubi Qafqaz məsələsinə toxunulduğunu deyib. Bildirib ki, Cənubi Qafqazda əməkdaşlığa ehtiyac var. O vurğulayıb ki, Rusiya Ermənistanla Türkiyə arasında münasibətlərin normallaşmasının tərəfdarıdır: “Ümid edirəm ki, regionda olmayan ölkələr bizim əməkdaşlığımıza müdaxilə etməzlər”. S.Lavrov söyləyib ki, Azərbaycan, Rusiya və Ermənistan liderləri arasında 2020-ci il noyabrın 10-da imzalanan üçtərəfli sazişin şərtləri yerinə yetirilməlidir.

Kasıb və ehtiyacı olan ölkələr taxılın yalnız 3 faizini ala bilir...

Danışıqlarda Ukrayna məsələsinin də müzakirə olunduğunu deyən Lavrov BMT-nin baş katibi Quterreşlə taxıl sazişinin müzakirə edildiyini söyləyib. Onun fikrincə, taxıl daşınması ədalətli şəkildə aparılmır: “Bu taxılların əsas hissəsi Avropaya göndərilir. Kasıb və ehtiyacı olan ölkələr isə bu taxılın yalnız 3 faizini ala bilir. BMT-nin baş katibi Quterreş də davamlı olaraq Qərb ölkələrinə çağırışlar edir, lakin nəticəsiz qalır. Bu vəziyyəti türkiyəli həmkarlarımızla hər aspektdə dəyərləndirməyə davam edəcəyik”.

SADİQ

Paylaş:

Baxılıb: 531 dəfə