Sevinc Fətəliyeva: Reallıqdan kənar Avropa institutları dünyada gedən proseslərin fərqinə varmır və böhran yaşayırlar

Bakı:

17 °C

82 %

7 m/s

AZ RU EN

Ana səhifə / Siyasət / Sevinc Fətəliyeva: Reallıqdan kənar Avropa institutları dünyada gedən proseslərin fərqinə varmır və böhran yaşayırlar

Sevinc Fətəliyeva: Reallıqdan kənar Avropa institutları dünyada gedən proseslərin fərqinə varmır və böhran yaşayırlar

25.06.2015 [09:49]

Hazırkı durumda bir müsəlman ölkəsinin bu qədər inkişafı, bütün dünya dövlətləri ilə əməkdaşlıq etməsi, inamla irəliyə doğru addımlaması Avropanın müəyyən dairələrini narahat edir. Avropa əsassız ambisiyalarından keçə bilmir.
Bu fikirləri Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, Azərbaycanın AŞPA-dakı nümayəndə heyətinin üzvü Sevinc Fətəliyeva qurumun yay sessiyasında “Azərbaycanda demokratik institutların fəaliyyəti” mövzusunda keçirilən müzakirə ilə bağlı açıqlamasında söyləyib.
S.Fətəliyeva deyib: “Biz həmişə Avropaya açıq olmuşuq. Çox təəssüf ki, bizə münasibətdə bunun əksi sərgilənir, əsas məsələlər kənara qoyularaq uydurulmuş, qeyri-real məsələlər müzakirə olunur. İndi isə Avropa ilk növbədə özü-özündə təhlil aparmalıdır. Əgər Avropa Şurası Avropa Məhkəməsinin qərarını inkar edirsə bu təşkilatı necə ciddi qəbul etmək olar?! Bu, onu göstərir ki, reallıqdan kənar Avropa institutları dünyada gedən proseslərin fərqinə varmır və böhran yaşayırlar.
Bu gün Azərbaycan cəmiyyətini daha bir problem narahat edir. Tez -tez müşahidə edirik ki, bəzi insanlar ayrı-ayrı ölkələrdən ideal demokratiya tələb edərək öz ölkələrindəki duruma və orada gedən proseslərə heç də fikir vermirlər. Bu zaman bir neçə sual meydana çıxır: “siyasi məhbus” adı verilən bir qrup şəxsin taleyi bir milyondan artıq qaçqın və məcburi köçkünün taleyindən daha önəmlidirmi?! Nəyə görə Avropada icazəsiz nümayişlərin dağılması asayişin qorunması kimi qələmə verilir, Azərbaycana gəlincə insan haqlarının pozulması kimi qiymətləndirilir?! Ümumiyyətlə, Avropa iflasa uğramasını yenidən göstərdi. Bu gün Avropadakı böhran artıq siyasətdə də baş verir. Cinsi azlıqların vəziyyəti bugünkü Avropada insan haqları mövzusunda ən ali amil kimi qəbul edilir. Dəyərlərin tamamilə dəyişməsi, demokratiya anlayışının mənasını itirməsi, ikili standartlar, qərarlarında, düşüncələrində, atdığı addımlarda tam uyğunsuzluq və məntiqsizlik müşahidə olunur. Necə olur ki, Azərbaycanda vəziyyət müzakirəyə çıxarılır, lakin Dağlıq Qarabağ münaqişəsi ilə bağlı mövzu kənarda qalır?! Azərbaycana dair müzakirə olunan bütün məsələlər bilavasitə Dağlıq Qarabağ münaqişəsi ilə bağlıdır. Torpaqlarımızın işğal altında olduğu hazırkı vəziyyətdə biz əlimizdən gələni edirik ki, təşkilatın tələblərinə cavab verək. Çox təəssüf ki, bizə münasibətdə bunun əksi nümayiş etdirilir.
Təcrübə göstərir ki, AŞPA-nın qəbul etdiyi qərarlar və qətnamələr heç bir gücə malik deyil, heç bir əhəmiyyət daşımır. Biz öz müstəqil siyasətimizi davam etdirərək, milli maraqlarımızı qoruyaraq və heç kimə baxmayaraq irəli getməliyik və gedirik də. İlk növbədə, beynəlxalq səyləri Dağlıq Qarabağ münaqişəsinin həll olunmasına, Ermənistanın beynəlxalq hüquq normalarına hörmətlə yanaşmasına və həqiqətin etiraf edilməsinə çalışmalıyıq. Bu günün gündəmində ədalətin bərpa edilməsi, haqsızlığın aradan qaldırılması olmalıdır. Digər məsələlər isə Azərbaycanın ərazi bütövlüyünün bərpası, bir milyondan çox qaçqın və məcburi köçkünün doğma torpaqlarına qayıtmasından sonra müzakirə oluna bilər”.

Paylaş:

Baxılıb: 812 dəfə