“Demokratik cəmiyyətdə iqtidar-müxalifət münasibətlərinin işıqlandırılması”

Bakı:

16°C

72%

2m/s

Əlaqə

AZ RU EN

Ana səhifə / Sosial / “Demokratik cəmiyyətdə iqtidar-müxalifət münasibətlərinin işıqlandırılması”

“Demokratik cəmiyyətdə iqtidar-müxalifət münasibətlərinin işıqlandırılması”

29.01.2016 [09:49]

“Gənc Politoloqlar Mərkəzi”nin Azərbaycan Gənclər Fondunun maliyyə dəstəyi ilə həyata keçirdiyi “Gənc Jurnalistlərin ictimai-siyasi mövzular üzrə ixtisaslaşması” adlı layihənin növbəti seminarı dünən “SƏS” Media Qrupun ofisində baş tutub. Seminar-treninqin budəfəki moderatoru “SƏS” Media Qrupun rəhbəri, fəlsəfə elmləri üzrə fəlsəfə doktoru Bəhruz Quliyev olub.
Seminarı giriş sözü ilə açan Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri Qafar Əliyev Azərbaycan mətbuatında ictimai-siyasi mövzularda yazan jurnalistlərin ixtisaslaşmasının vacibliyini diqqətə çatdıraraq bildirib ki, gələcəyin qurucuları olan gənclər və həmin gənclərin hərbi vətənpərvərlik tərbiyəsinin gücləndirilməsi, cəmiyyətdə baş verən ictimai-siyasi proseslərin mahiyyətinin xalqa çatdırılması işində gənc jurnalistlərin peşə hazırlığı və ixtisaslarının artırılması mühüm əhəmiyyət kəsb edir: “Təcrübə göstərir ki, bəzən vətənpərvər, dövlətimizə və xalqımıza sədaqətli olan KİV nümayəndələrinin siyasi bilik və bacarığının, peşə hazırlığının kifayət qədər olmaması səbəbindən onlar lazımi səviyyədə fəaliyyət göstərə bilmirlər. Ona görə də bu mövzuda mütəmadi olaraq gənc jurnalistlərin ixtisasının artırılmasına ciddi ehtiyac duyulur. Düşünürəm ki, keçirilən seminarlar bu istiqamətdə gənclərimizə öz müsbət töhfəsini verəcəkdir”.
“Demokratik cəmiyyətdə iqtidar-müxalifət münasibətlərinin işıqlandırılması” mövzusunda çıxış edən “SƏS” Media Qrupun rəhbəri Bəhruz Quliyev bildirib ki, milli mətbuatımızın tarixi 140 il öncəyə söykənsə də, Azərbaycanda müstəqil jurnalistikanın formalaşması prosesi müasir dövrə təsadüf edir: “Azərbaycan ikinci dəfə müstəqillik əldə etdikdən sonra müstəqil media məkanında siyasi jurnalistika formalaşmağa başladı. Xarici ölkələrə nəzər salsaq, görərik ki, MDB dövlətləri siyasi jurnalistikanı daha çox qəbul edir, nəinki Avropa dövlətləri. Avropada, ümumiyyətlə, siyasi jurnalistika anlayışı mübahisəli məsələ olaraq qalır”.
“Prezident İlham Əliyev mətbuat nümayəndələri ilə görüşündə daim mətbuatı ictimai nəzarət mexanizminin formalaşmasında dövlətə yardımçı olmağa çağırıb. Eyni zamanda, dövlət başçısı siyasi mövqeyimizdən asılı olmayaraq dövlətçilik, ümumxalq məsələlərində birgə fəaliyyət göstərməyi bizlərə daim tövsiyə edir. Mətbuat da ümumxalq məsələlərində doğru münasibəti sərgiləməyə borcludur”.
Bəhruz Quliyev onu da qeyd edib ki, Azərbaycanda radikal müxalifət jurnalistikasını çıxmaq şərti ilə, ehtiyac duyulduqda iqtidar və müxalifət jurnalistikası birlikdə öz sözünü deyə bilir: “Jurnalistin ixtisaslaşmasında, eyni zamanda, siyasi təfəkkürünün formalaşmasında həm cəmiyyətin, həm də redaksiya mühitinin rolu danılmazdır. Yəni ictimai fikir, cəmiyyət bu prosesə öz təsirini göstərir. Düşünürəm ki, cəmiyyəti düşündürən bütün məsələlərə jurnalistlər təmkinlə, ağılla yanaşmalıdırlar. Bəziləri müəyyən fürsətlərdən, hansısa boşluqdan istifadə edərək lazımsız addımlar atırlar. Belə bir məqamda sağlam jurnalistika maarifləndirmə işini gücləndirməli, dövlətin həyata keçirdiyi siyasəti xalqa təbliğ etməlidir”.
“Yeni Azərbaycan” qəzetinin baş redaktoru, millət vəkili Hikmət Babaoğlu çıxışında bildirib ki, bir yandan, Qərb siyasi jurnalistika anlayışını qəbul etmək istəmir, digər bir yandan isə, özlərini təkzib edirlər: “O mənada ki, jurnalistikanı dördüncü hakimiyyət adlandıran məhz Qərbdir. Bu, MDB, postsovet məkanının siyasi media fəlsəfəsi kimi ortaya çıxmayıb, elə Qərbin özündən gəlib. Əgər jurnalistikanı hakimiyyətin qolu kimi səciyyələndirə biliriksə, bu zaman hakimiyyət özü başdan-ayağa siyasi institutlaşmadır. Jurnalistika siyasiləşməmiş ola bilər, o halda ki, yalnız bir funksiya həyata keçirmiş olsun - xəbər ötürmə. Bu gün kim deyə bilər ki, dünyada jurnalistika yalnız xəbər ötürmə funksiyasından çıxış edir?! Jurnalistika siyasilərin tribunası olmaqla bərabər, həm də özünün siyasi dəst-xəttini göstərmiş olur. Deyə bilərəm ki, heç bir mətbu orqan bir siyasətçinin, şərhçinin fikirlərini olduğu kimi cəmiyyətə çatdırmır. Mütləq orada özünün şərhini əlavə edir. Bir halda biz siyasətçinin “xalis” çıxışı ilə tanış ola bilirik, o da həmin şəxsin fikirlərini öz dilindən eşitməklə. Bundan kənarda isə jurnalistin özünün əlavəsi olur ki, bunun özü də siyasi məzmun kəsb edir. Müasir jurnalistikanın bütün imkanlarını, potensialını nəzərə alaraq cənab Prezident haqlı olaraq jurnalistikanı dördüncü deyil, ikinci hakimiyyət adlandırıb. İndiki mərhələdə bu fikirlər jurnalistikanın mahiyyətini dəqiqliklə ifadə edir”.
Hikmət Babaoğlu qeyd edib ki, milli mediamız ictimai şüurun formalaşmasında həmişə yaxından iştirak edib. Millət vəkili onu da əlavə edib ki, maarifləndirmə missiyasi yerinə yetirən jurnalistlərin özlərinin maariflənməsi olduqca vacib məsələdir: “Jurnalistikada siyasi aspektlərin öyrənilməsi vacibdir. Bu işdə uğurların əldə olunacağına inanırıq”.
Seminar mövzu ətrafında diskussiya ilə davam etdirilib.

Paylaş:

Baxılıb: 734 dəfə