“Qorunma tədbirlərinin davam etdirilməsi ilə yanaşı, vaksinasiyada aktiv iştirak da vacibdir”

Bakı:

18 °C

88 %

3 m/s

Əlaqə

AZ RU EN

Ana səhifə / Sosial / “Qorunma tədbirlərinin davam etdirilməsi ilə yanaşı, vaksinasiyada aktiv iştirak da vacibdir”

“Qorunma tədbirlərinin davam etdirilməsi ilə yanaşı, vaksinasiyada aktiv iştirak da vacibdir”

22.04.2021 [08:29]

Bu gün bəşəriyyəti cənginə alan koronavirus pandemiyası çox təhlükəli bəlaya çevrilib. Dövlətimiz pandemiyaya qarşı mübarizədə olduqca önəmli tədbirlər həyata keçirir. Əhalinin peyvənd olunması prosesi də kifayət qədər effektiv təşkil olunub. Yeri gəlmişkən, TƏBİB bu məsələdə əsas hədəfin ölkəmizdə əhalinin 80 faizinin vaksinasiya edilməsindən ibarət olduğunu bəyan edib.
Öz növbəsində TƏBİB-in İdarə Heyəti yanında Tibbi-elmi Komitənin sədri, professor Akif Qurbanov qəzetimizə açıqlamasında deyib ki, görülən tədbirlər yaxın zamanlarda yoluxma saylarının kəskin artımının qarşısını ala bilər. Bu, rahatlıq versə də, arxayınlaşmaq olmaz, qorunma tədbirlərinin davam etdirilməsi ilə yanaşı, vaksinasiyada aktiv iştirak da vacibdir. Vaksinasiya yüksək templə aparılır və peyvəndlərin gətirilməsi davam edir.
Onun sözlərinə görə, artıq 40 yaşdan yuxarı vətəndaşların peyvəndlənməsi aparılır ki, bu da bizi çox böyük fəsadlardan qoruyacaq: “Vaksin COVID-19-dan xilas olmaq üçün yeganə vasitədir. Vaksinin əhəmiyyəti odur ki, peyvəndlənən vətəndaşlar yoluxsalar, xəstəliyi yüngül keçirəcəklər, ağırlaşmalar, demək olar ki, olmayacaq. Əksəriyyətdə isə ümumiyyətlə yoluxma olmayacaq. Hazırda istifadə edilən vaksinin ikinci dozasının vurulmasından iki həftə keçdikdən sonra peyvənd tam qorumağa başlayır. Vaksinin birinci dozasından sonra arxayınlaşıb qorunma tədbirlərinə əməl etməmək düzgün deyil. Ona görə də pandemiya dövründə istər peyvənd olunsun, istərsə də yox, hər kəsin qorunması zəruridir”.
Həkim-pulmonoloq Ayşə Əliyeva isə bildirib ki, yeni nov koronavirus (COVID-19) infeksiyasından güclü immunitet və gigiyenik qaydalara düzgün əməl etməklə qorunmaq mümkündür. Onun sözlərinə görə, virusla mübarizədə istifadə olunan tibbi maska və əlcəklər ən vacib qoruyucu vasitələrdən biridir: “Lakin onların qoruyucu gücü fərqli olduğundan seçim edərkən yanılmamaq lazımdır. Viruslar tibbi maska və əlcəklərdə toplandığı üçün onların təkrar istifadə edilməsi tövsiyə olunmur. Bəzən sterilizasiya ediləndən sonra qoruyucu maskalar qurudub təkrar istifadə olunsa da, mütəxəssislər bunu düzgün saymırlar. Əlcəklərin də təkrar istifadəsi yolverilməzdir. Onları soyunarkən tərs üzünə çevirərək çıxarmaq və atmaq lazımdır”.
Mütəxəssis, xüsusilə müqəddəs Ramazan ayında insanları daha da diqqətli olmağa və kollektiv toplaşmamağa səsləyib: “Virusun geniş yayılmaması üçün, o cümlədən xalqımızın sağlamlığı naminə kütləvi toplaşmaq olmaz. Hamı bir nəfər kimi xəstəlikdən qorunmaq üçün əlindən gələni etməlidir. Düşünürəm ki, hər bir kəs özünü təcrid etməyi bacarsa, yoluxma halı tezliklə aradan qalxar, hamımız əvvəlki xoşbəxt, firavan həyatımıza qayıdarıq. Gəlin, koronavirus infeksiyasına qarşı mübarizədə birləşək, özümüzü, xalqımızı və dövlətimizi qoruyaq”.
MÜŞFİQƏ

Paylaş:

Baxılıb: 758 dəfə