AŞPA-nın nümayəndə heyəti ilə Milli Məclisdə görüş keçirilib

Bakı:

18 °C

94 %

4 m/s

Əlaqə

AZ RU EN

Ana səhifə / Siyasət / AŞPA-nın nümayəndə heyəti ilə Milli Məclisdə görüş keçirilib

AŞPA-nın nümayəndə heyəti ilə Milli Məclisdə görüş keçirilib

25.08.2015 [10:14]

Avropa Şurası Parlament Assambleyasının (AŞPA) Sosial işlər, sağlamlıq və davamlı inkişaf komitəsinin məruzəçisi Milica Markoviçin rəhbərlik etdiyi nümayəndə heyəti Azərbaycana səfəri çərçivəsində avqustun 24-də Milli Məclisdə olub.
AZƏRTAC xəbər verir ki, Azərbaycanın AŞPA-dakı nümayəndə heyətinin üzvləri ilə keçirilən görüşdə Ermənistanın işğalı altında olan Sərsəng su anbarının tənzimlənməyən fəaliyyətinin bölgənin ətraf mühitinə zərəri haqqında, eyni zamanda, bu anbarda baş verə biləcək qəzanın mümkün fəsadları, o cümlədən ATƏT-in Minsk qrupunun bu sahədə fəaliyyəti barədə müzakirələr aparılıb.
Azərbaycanın AŞPA-dakı nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov ölkəmizlə bağlı həqiqətlərin Avropaya çatdırılması istiqamətində görülən işlərdən danışıb. S.Seyidov AŞPA nümayəndə heyətinin ölkəmizə səfərinin əhəmiyyətinə toxunaraq bildirib ki, Azərbaycanın qapıları hər zaman AŞPA məruzəçilərinin üzünə açıqdır. Məqsədimiz odur ki, Sərsəng su anbarının regionda əhəmiyyətini və ondan ermənilərin terror amili kimi istifadə edə biləcəyi təhlükəsini Avropa ictimaiyyəti tam aydınlığı ilə dərk edə bilsin. “Biz heç nəyi gizlətmirik. İstəyirik ki, reallıqları görəsiniz və bu barədə Avropa Şurasının deputatları özləri qərar çıxarsınlar. Ona görə də, sizin Azərbaycana səfərinizi və bütün reallıqları öz gözlərinizlə görmək istəyinizi yüksək qiymətləndiririk. Təəssüf ki, Ermənistan hər yolla sizin səfərinizə maneə törətməyə çalışır. Hələ də bu problemlə bağlı bir dəfə də olsun o ölkəyə səfər edə bilməmisiniz. Danılmaz faktdır ki, ermənilər təqsirkar olduqları üçün həqiqətləri dünya ictimaiyyətindən gizlətməyə çalışırlar”, - deyə Səməd Seyidov bildirib. O vurğulayıb ki, Sərsəng su anbarı probleminin həll olunmamasının başlıca səbəbkarı Ermənistan hakimiyyətidir.
AŞPA-nın məruzəçisi Milica Markoviç Azərbaycana ikinci dəfə səfər etdiyini bildirib. O, AŞPA-nın Sosial məsələlər, səhiyyə və davamlı inkişaf komitəsi tərəfindən məsələ ilə bağlı Ermənistan hökumətinə rəsmi məktub göndərildiyini, hələ də müsbət cavab alınmadığını deyib.
Görüşdə çıxış edən Azərbaycanın AŞPA-dakı nümayəndə heyətinin üzvləri məruzənin obyektiv hazırlanacağına inandıqlarını bildiriblər. Həmçinin, vurğulanıb ki, Sərsəng su anbarı 1992-ci ildən Ermənistanın işğalı altındadır və hazırda texniki qurğuların baxımsızlığı nəticəsində qəza vəziyyətindədir. Bu da Azərbaycanın ətraf rayonlarının əhalisi üçün təhlükə vəziyyəti yaradır.

Paylaş:

Baxılıb: 574 dəfə