Yeni Azərbaycan Partiyası ümumxalq partiyasıdır

Bakı:

11 °C

100 %

1 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası ümumxalq partiyasıdır

Yeni Azərbaycan Partiyası ümumxalq partiyasıdır

20.11.2015 [10:04]

1992-ci il noyabrın 21-də Naxçıvan şəhərində yaradılan Yeni Azərbaycan Partiyası (YAP) çox qısa bir müddətdə geniş xalq kütlələrinin böyük rəğbətini qazanaraq ümumxalq partiyasına çevrilib.
Naxçıvan Dövlət Universitetinin (NDU) mətbuat şöbəsindən AZƏRTAC-a bildirilib ki, bu fikir ali təhsil ocağında YAP-ın yaranmasının 23 illiyinə həsr olunmuş konfranslarda vurğulanıb.
Ali təhsil ocağının beynəlxalq münasibətlər və xarici dillər fakültəsində keçirilən konfransı NDU-nun informatika kafedrasının dosenti, riyaziyyat üzrə fəlsəfə doktoru Elşən Məmmədov açaraq qeyd edib ki, 23 il öncə Azərbaycandakı ağır vəziyyət yeni bir siyasi təşkilatın - YAP-ın yaranmasını zərurətə çevirib. Dünya şöhrətli siyasi xadim, Azərbaycan xalqının Ümummilli lideri Heydər Əliyevin yaratdığı partiya ölkəni bəlalardan qurtarıb və inkişaf yoluna doğru istiqamətləndirib.
Konfransda beynəlxalq münasibətlər kafedrasının müdiri, dosent Yusif Hüseynovun “Yeni Azərbaycan Partiyası və Azərbaycanın yüksəlişi”, beynəlxalq münasibətlər ixtisasının III kurs tələbəsi Tuncay Salmanlının “Yeni Azərbaycan Partiyasının gənclər siyasəti”, ingilis dili müəllimliyi ixtisası üzrə I kurs tələbəsi Lalə Rzayevanın “Yeni Azərbaycan Partiyası: yaranması və keçdiyi şərəfli yol” mövzularında məruzələri dinlənilib.
Tibb fakültəsində keçirilən konfransı isə YAP universitet şəhərciyi ərazi ilk təşkilatının sədr müavini, tarix üzrə fəlsəfə doktoru, dosent Şamxal Məmmədov açıb. Natiq vurğulayıb ki, yarandığı gündən YAP-ın əsas məqsədi Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından, əmin-amanlıq, ictimai-siyasi sabitlik, milli həmrəylik, güclü və sosialyönümlü iqtisadiyyat yaratmaqdan ibarət olub. Partiya ötən müddət ərzində öz məqsədləri istiqamətində inamla fəaliyyət göstərib.
Sonra təməl tibb fənləri kafedrasının müdiri, biologiya üzrə fəlsəfə doktoru, dosent Elsevər Məmmədovun “Yeni Azərbaycan Partiyasının dünəni və bu günü”, Universitet YAP Gənclər Birliyinin sədri, II kurs magistr Elgün Tağıyevin “Ulu öndər Heydər Əliyev və Yeni Azərbaycan Partiyası”, müalicə işi ixtisası üzrə II kurs tələbəsi Bənövşə Qasımovanın “Yeni Azərbaycanın memarı” mövzularında məruzələri dinlənilib.
Növbəti tədbirdə isə NDU-nun informatika kafedrasının dosenti, riyaziyyat üzrə fəlsəfə doktoru Elşən Məmmədov memarlıq və mühəndislik fakültəsində YAP-ın yaranmasının 23 illiyinə həsr olunmuş konfransı açaraq, partiyanın yaranma tarixi haqqında iştirakçılara ətraflı məlumat verib.
Konfransda memarlıq və mühəndislik fakültəsinin dekan müavini, baş müəllim Məmməd Rəcəbovun “Yeni Azərbaycan Partiyasının dünəni və bu günü”, fakültə tələbə YAP gənclər birliyinin sədri, memarlıq ixtisası üzrə IV kurs tələbəsi Hüseynalı Novruzovun “Yeni Azərbaycan Partiyasının qurucusu və memarı”, memarlıq ixtisası üzrə II kurs tələbəsi Anar Sadiqovun “Heydər Əliyevin gənclər siyasəti” mövzularında məruzələri dinlənilib.
Məruzələrdə qeyd olunub ki, ümumxalq partiyasına çevrilən, 600 mindən çox üzvü olan YAP bu müddət ərzində ölkədə keçirilən prezident, parlament və bələdiyyə seçkilərində inamlı qələbələr qazanıb. Ulu öndərin YAP haqqında dediyi “dünənin, bu günün və gələcəyin partiyası” fikirləri bu gün də öz aktuallığını saxlamaqdadır.
Tədbirdə partiyanın keçdiyi tarixi yolu əks etdirən slaydlar nümayiş olunub.
Konfransların sonunda YAP-ın sıralarına yeni qəbul olunmuş tələbələrə üzvlük vəsiqələri təqdim edilib.

Paylaş:

Baxılıb: 889 dəfə