Qazaxıstan yeni dəyişikliklər mərhələsində

Bakı:

9 °C

93 %

2 m/s

Əlaqə

AZ RU EN

Ana səhifə / Analitik / Qazaxıstan yeni dəyişikliklər mərhələsində

Qazaxıstan yeni dəyişikliklər mərhələsində

23.11.2022 [10:28]

Prezident seçkisi xalqın hökumətə etimadını dəqiqləşdirdi

Qazaxıstanda keçirilən prezident seçkisinin ilkin nəticələri bəlli olub. Belə ki, ilkin nəticəyə əsasən hazırkı dövlət başçısı Kasım-Jomart Tokayev 81,31 faizi səs toplayıb. Qazaxıstan KİV-lərinin yaydığı məlumata görə, bunu ölkənin Mərkəzi Seçki Komissiyasının sədri Nurlan Abdirov bildirib. Onun sözlərinə görə, səsvermədə iştirak edən 6 546 392 seçici Kasım-Jomart Tokayevə səs verib.

Xatırladaq ki, prezidentlik uğrunda yarışan digər namizədlərə - Karakat Abdenə 206 206 (2,6 faiz), Nurlana Auesbayevaya 176 116 (2,22 faiz), Jiqulu Dayrabayeva 271 641 (3,42 faiz) və Saltanat Tursınbekoya isə 168 731 (2,12 faiz) seçici səs verib. Səsvermədə iştirak edən seçicilərin 5,8 faizi, yaxud 460 484-ü bütün namizədlərin əleyhinə səs verib. Ümumilikdə ölkə üzrə 10 mindən çox seçki məntəqəsi fəaliyyət göstərib. Bu seçki məntəqələrində Qazaxıstanın 15 regionunda yerləşən seçicilər öz münasibətlərini açıqlayıblar.

Qeyd edək ki, Prezident Kasım-Jomart Tokayev seçkisonrası bəyanatında bildirib ki, Qazaxıstan siyasi quruluşun yeni formasına keçir, konstitusiya islahatı ardıcıl və aydın şəkildə aparılacaq. Kasım-Jomart Tokayev ölkə iqtisadiyyatında köklü dəyişikliklərin olacağını da açıqlayıb: “Biz vətəndaşların rifahını yaxşılaşdıracağıq”.

Onun sözlərinə görə, bütün bu məqsədləri həyata keçirmək üçün birlik lazımdır: “Ona görə də hamınızı birliyə səsləyirəm”.

Növbədənkənar prezident seçkisi yeni dəyişikliklərin anonsudur

Prezident Tokayevin bəhs etdiyi yeni siyasi quruluşa keçid və konstitusiya islahatları Qazaxıstan üçün yeni imkanlar yaradır. Belə ki, bu ilin yanvar ayında baş verən hadisələrdən sonra ölkədə mühüm dəyişikliklərin zəruri olduğu meydana çıxmışdı. Bu səbəbdən də iyun ayında keçirilən referendumla mövcud konstitusiyaya əlavə və dəyişiklik edilmişdi. Nəticədə, sonuncu dəfə 1995-ci ildə qəbul edilmiş mövcud konstitusiyanın 33 əsas maddəsinin dəyişdirilməsi və bununla da cari il yanvar ayının əvvəlində kütləvi hadisələrdən sonra ölkədə inzibati sistemin yenidən qurulması ilə bağlı hədəf müəyyənləşdirilmişdi. Dəyişikliklərə əsasən, Qazaxıstanda parlamentin və yerli nümayəndəlik orqanlarının rolu əhəmiyyətli dərəcədə gücləndirilib, Konstitusiya Məhkəməsi yaradılıb.

Həmin dövrdə də bildirilmişdi ki, bu referendum ölkədə olan narahat ictimai-siyasi vəziyyəti sabitləşdirmək baxımından əhəmiyyət daşıyır. Konstitusiyaya dəyişiklik həm də yanvar hadisələrindən sonra Qazaxıstanda demokratikləşmə ilə bağlı proqnozların tərkib hissəsi kimi dəyərləndirilmişdi.

Eyni zamanda Tokayevin Konstitusiya dəyişikliyinin ardından növbədənkənar prezident seçkisinin keçirilməsi ilə bağlı qərarı da mövcud hakimiyyətin xalqdan etimad və dəstək almasını şərtləndirib. Xatırladaq ki, 2019-cu ildə keçirilən sayca 9-cu prezident seçkisində qələbə qazanan Tokayevin hələ 2 illik prezidentlik müddəti vardı. Bununla belə, qarşıdakı dövrdə Qazaxıstanın yeni inkişaf mərhələsinə qədəm qoyması üçün xalqın dövlət başçısına etimadı mühüm şərt idi. İndiki halda mövcud dəyişikliklər Qazaxıstanın beynəlxalq arenada tutduğu mövqenin də güclənəcəyini deməyə əsas verir. Belə ki, yeni hökumətin istər Qərb dünyası, istərsə də Türk dövlətləri ilə əlaqələri günü-gündən güclənməkdədir. Bu isə Qazaxıstanın yeni dünya nizamında özü üçün mühüm yer müəyyənləşdirməsini şərtləndirir. Yeni şərtlər isə yeni dəyişiklikləri zəruri edir...

P.İSMAYILOV

Paylaş:

Baxılıb: 971 dəfə