Cənubi Qafqazda söz sahibi Azərbaycandır

Bakı:

25 °C

60 %

1 m/s

Əlaqə

AZ RU EN

Ana səhifə / YAP xəbərləri / Cənubi Qafqazda söz sahibi Azərbaycandır

Cənubi Qafqazda söz sahibi Azərbaycandır

10.01.2025 [15:44]

Elçin Əliyev,

YAP Göygöl rayon təşkilatı üzrə Qırıqlı kənd ərazi partiya təşkilatının sədri

Məlum olduğu kimi, yanvarın 7-də yerli televiziya kanallarına veriyi müsahibəsində Ölkə Prezidenti cənab İlham Əliyev keçən ilin iqtisadi nəticələrinə dair açıqlama verərək bildirdi ki, Azərbaycanın 2024-cü ildə inkişaf templəri, bugünkü dünyanın mənzərəsinə nəzər salsaq, müsbət sayıla bilər. Konkret rəqəmlərə gəldikdə isə, ümumi daxili məhsul 4 faizdən çox artmışdır. Nəzərə almaq lazımdır ki, məhz qeyri-neft sənaye sektorunda artım daha yüksəkdir və bu, 7 faizdən çoxdur. Beləliklə, möhtərəm Prezidentimizin dediyi kimi, əgər biz dünya iqtisadiyyatının artım templərinə və inkişaf etmiş ölkələrin inkişafına, yaxud da ki, tənəzzülə nəzər salsaq, görərik ki, Azərbaycan iqtisadiyyatı həqiqətən də uğurla inkişaf edib. Birmənalı olaraq vurğulamaq lazımdır ki, bu nailiyyətin də təməlində cənab Prezident İlhm Əliyevin həyata keçirdiyi uğurlu, düşünülmüş siyasət dayanır.

Qeyd edək ki, Azərbaycanın keçən il beynəlxalq arenada əldə etdiyi mühüm uğurlardan biri də ölkəmizin D-8 təşkilatına üzv olmasıdır. Bu təşkilat 30 ilə yaxın bundan əvvəl Türkiyənin təşəbbüsü ilə yaranmışdı və səkkiz ölkədən ibarət idi. Bu illər ərzində əlavə üzv qəbul edilməmişdi. Birinci genişlənmə qərarından sonra qəbul edilən üzv məhz Azərbaycan oldu. Möhtərəm dövlət başçımızın qeyd etdiyi kimi, Azərbaycanın D-8 təşkilatına qəbul edilməsi ölkəmizin nüfuzunu bir daha göstərir. Ümumiyyətlə ölkımiz hər zaman müsəlman aləminin dəyərli üzvü olmuşdur. O cümlədən İslam Əməkdaşlıq Təşkilatı da bütün dövrlərdə Azərbaycanla bağlı çox müsbət fikirdə olub. Azərbaycan dövlətinin və şəxsən cənab Prezident İlham Əliyevin İslam həmrəyliyi ilə bağlı atdığı addımlar, ölkəmizdə İslam dininə olan hörmət, dinlərarası münasibətlər, müsəlman ölkələrinin xətti ilə bir çox tədbirlərin keçirilməsi, o cümlədən IV İslam Həmrəyliyi Oyunlarının keçirilməsi – bütün bunlar əlbəttə ki, Azərbaycanın İslam dünyasında da nüfuzunu yüksəldən addımlardır. Ölkəmiz bütün beynəlxalq təşkilatlarda, o cümlədən BMT-də daim müsəlman ölkələrinin maraqlarını müdafiə edir. Azərbaycan həmçinin bir çox müsəlman ölkələrinə yardımlar edir. İstər COVID dövründə, istərsə də yaranan müxtəlif digər hallarda. Ölkəmiz Fələstin xalqının üzləşdiyi bu fəlakətlə bağlı yenə də onlara yardım göstərilməsində ön sıralarda olmuşdur. Suriyada artıq Əsəd rejiminin çökməsindən, yeni hökumətin formalaşmasından sonra Türkiyənin ardınca ikinci ölkə Azərbaycan oldu ki, oraya humanitar yardım göstərdi və cənab Prezident xüsusi qeyd etdi ki, biz istənilən digər yardımları da göstərməyə hazırıq. Azərbaycan bütün müsəlman ölkələrinin maraqlarını öz maraqları kimi qəbul edir və məhz bu amil də D-8-in genişlənməsi siyasətindən sonra birinci seçimin Azərbaycan üzərinə düşməsində mühüm rol oynayıb. Artıq D-8 həm Qafqaz, həm də Xəzər regionuna genişlənib və cənab Prezident İlham Əliyevin dediyi kimi, coğrafiyamız nə qədər geniş olsa, imkanlarımız da o qədər geniş olacaq.

Yeri gəlmişkən, qeyd edək ki, Azərbaycan həm özünün, həm də ümumilikdə Cənubi Qafqazın tarixində müharibə səhifəsini birdəfəlik bağlamaq üçün əlindən gələni edir. Möhtərəm dövlət başçımızın dediyi kimi, biz sülh istəyirik. Ancaq görürük ki, Ermənistanın həm özü, həm də onun yeni havadarları bunu istəmirlər. Onlar revanşist fikirlərlə yaşayırlar və Ermənistan silahlandırılaraq, bölgə üçün yenidən real təhdid mənbəyinə çevrilir. Müstəqil Ermənistan dövləti, əslində, faşist dövlətdir. Çünki əgər bu ölkəyə 30 ilə yaxın faşist ideologiyasının daşıyıcıları rəhbərlik ediblərsə, bu ölkəni onlar elə özləri kimi də formalaşdırıblar. Ermənistanın birinci prezidenti etnik təmizləməni bir qürur mənbəyi kimi qələmə verir, azərbaycanlıların öz tarixi dədə-baba torpaqlarından qovulması ilə öyünür. Bu videomaterial yeni ictimailəşdirilib. Lakin, cənab Prezident İlham Əliyevin dediyi kimi, bunu Ermənistanda da bilirdilər, Ermənistanın müttəfiqləri, havadarları da təbii ki, bilirdilər və onlar bu fikirləri bölüşürdülər. Azərbaycana qarşı 30 illik işğalçılıq siyasəti, sadəcə olaraq, Ermənistan məhsulu deyil, onunla həmrəy olan islamofob, azərbaycanofob, irqçi, ksenofob dairələrin, xarici ölkələrin nümayəndələrinin birgə məhsuludur. Belə bir faşist dövlətlə biz qonşuyuq və faşizm təhlükəsi sovuşmur. Həm də bu təhlükə təkcə Azərbaycanı deyil, bütün region xalqlarını təhdid edir. Buna görə də faşizm məhv edilməlidir. Əgər Ermənistan hökuməti bunu etməsə, bu zaman Azərbaycan erməni faşizmini özü məhv etməli olacaq.

Paylaş:

Baxılıb: 479 dəfə