Azərbaycan COP29-a ev sahibliyi etməklə...

Bakı:

23 °C

61 %

5 m/s

Əlaqə

AZ RU EN

Ana səhifə / MEDİA / Azərbaycan COP29-a ev sahibliyi etməklə...

Azərbaycan COP29-a ev sahibliyi etməklə...

02.08.2024 [10:30]

Müxtəlif ölkələr arasında körpü rolunu oynayacaq!

Yeganə BAYRAMOVA

Azərbaycan qlobal tədbirə ciddi hazırlıq mərhələsindədir. Söhbət noyabrda paytaxtda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasından (COP29) gedir. Azərbaycanda ekologiyanın qorunması, təbiətə qayğı, yaşıl dünyanın inkişaf etdirilməsi istiqamətində atılan addımlar dünyaya real nümunədir. Bu baxımdan COP29 dünyada baş verən təbii fəlakətlərin, iqlim dəyişikliklərinə səbəb olan amillərin aradan qaldırılması yollarını müzakirə edəcək.

Ekologiyamıza vurulan “yaralar” sağalır...

Məlumdur ki, Azərbaycan ekoloji terrordan daha çox əziyyət çəkən ölkələrdən biridir. Məsələn, mühüm bir fakta nəzər yetirək: Erməni işğalçıları Qubadlı, Füzuli və Cəbrayıl rayonlarının ərazisində yaşı 1600, 900 və 500 il olan Şərq çinarlarını məhv ediblər. Həmin ağacların yerində bitən 2 metrə qədər pöhrələr bu qədim çinarların son illərdə kəsildiyini təsdiqləyir.

Ancaq Qarabağın ekologiyasına vurulan “yaralar” sağalmağa başlayır. Oğurlanan, talan olunan sərvətlərin yerini doldurmaq istiqamətində böyük işlər görülür. Təkcə ötən il ərzində Zəngilan rayonunda 14,4 min ədəd müxtəlif cinsli ağacdan doldurma-bərpa əkinlərində istifadə olunub. Füzuli, Zəngilan və Ağdam rayonları ərazilərində əsasən, Şərq çinarı olmaqla minlərlə müxtəlif növ ağac əkilib, palıd və digər meşə ağaclarının toxumları səpilib. Ağacəkmə aksiyaları Qubadlıda, Cəbrayılda da aparılır. İşğaldan azad olunmuş bütün ərazilər minalardan təmizlənib təhlükəsiz vəziyyətə gətirildikcə ağacəkmə tədbirləri də davam edir.

“Yaşıl gələcək naminə toxum ək”

İyulun 31-də COP29 könüllüləri paytaxtda “Yaşıl gələcək naminə toxum ək” şüarlı aksiya keçiriblər. Aksiya Bakının mərkəzi ərazilərində əhalinin ekoloji fəallığının artırılması və ətraf mühitin mühafizəsi istiqamətində maarifləndirilməsi məqsədilə baş tutub. COP29 Azərbaycan Əməliyyat Şirkətinin mətbuat xidmətindən bildirilib ki, ekoloji dayanıqlılığın, yaşıl həyat tərzinin təşviqinə yönələn aksiyaya qatılan 50 könüllü yerli sakinləri də kampaniyaya cəlb ediblər.

Tədbir “Zirə Gülçülük” kompleksində start götürüb. Burada könüllülər kompleksin fəaliyyəti ilə tanış olub, müxtəlif bitki növləri və dayanıqlı bağçılıq təcrübələri haqqında məlumat əldə ediblər. Tur başa çatdıqdan sonra könüllülər şəhər sakinlərinə əvvəlcədən hazırlanmış toxum torbalarının paylanılması və dayanıqlı bağçılıq vərdişlərinin təşviqi üçün Hüseyn Cavid parkı, Sahil bağı, İçərişəhər, eləcə də dənizkənarı bulvar ərazisində yerləşən COP29 Məlumat Mərkəzi kimi müxtəlif məkanlara baş çəkiblər. Aksiya çərçivəsində əhali ilə məlumatlandırıcı söhbətlər və sorğular aparan könüllülər paytaxt sakinlərinə ekoloji öhdəlikləri yerinə yetirmək üçün atdıqları addımlar və digər təşəbbüslər barədə suallar ünvanlayıb, müvafiq sahələrdə praktiki məsləhətləri bölüşüblər.

Dünya mediasının diqqəti Azərbaycanda...

Qeyd edək ki, ölkəmizin ev sahibliyi edəcəyi COP29 dünya mediasının da diqqətindədir. Belə ki, mötəbər tədbirlə bağlı müxtəlif ölkələrin tanınmış media orqanlarında məqalələr dərc olunur. Azərbaycanın ekologiya və ətraf mühitin mühafizəsi, qlobal ekoloji böhranlarla bağlı ölkəmizin yürütdüyü siyasətindən söz açılır.

Bu günlərdə Birləşmiş Ərəb Əmirliklərinin “The National News” nəşrində ölkəmizin COP29-a ev sahibliyi etməyə hazırlaşmasına dair məqalə yayımlanıb. Məqalədə qeyd olunub ki, Azərbaycan bu ilin noyabrında COP29-a ev sahibliyi etməklə dünyanın müxtəlif bölgələri arasında növbəti dəfə körpü rolu oynayacaq. Azərbaycan Prezidentinin “Bizim üçün bu, misilsiz bir şansdır ki, ən yüksək liqaya daxil oluruq”, - sözlərini xüsusi vurğulayan müəllif qeyd edib ki, İlham Əliyev Azərbaycanın Qlobal Cənub və Qlobal Şimal arasında körpülər qurur.

Yazıda Azərbaycanın neft sənayesinin tarixindən geniş bəhs olunub, dünyada sənaye üsulu ilə ilk neft quyusunun ölkəmizdə qazıldığı, Bakının bir vaxtlar dünyanın neftə olan tələbatının yarısını ödədiyi vurğulanıb. Bildirilib ki, həm də buna görə Azərbaycan qədim dövrlərdən “Odlar yurdu” adlandırılır.

Müəllif qeyd edib ki, zəngin qazıntı yanacağı resurslarına malik ölkə hazırda iqlim dəyişikliyi məsələlərinin müzakirə olunduğu COP29 kimi mötəbər tədbirə ev sahibliyi etməyə hazırlaşır. Təxminən üç aydan sonra 200-ə yaxın ölkədən nümayəndələr Bakıda bir araya gələrək iqlim dəyişikliyi məsələsini həll etməyə çalışacaqlar. Azərbaycanın iqlim dəyişikliyindən əziyyət çəkən ölkələrin problemlərinə xüsusi həssaslıq göstərdiyi vurğulanıb. Prezident İlham Əliyevin iqlim dəyişikliyi məsələsində hələ də qeyri-müəyyənliklərin olması, xüsusilə Qərbin bu məsələdə qeyri-obyektiv mövqeyi barədə fikirləri diqqətə çatdırılıb.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Ekologiya və ətraf mühitin mühafizəsi” istiqaməti üzrə hazırlanmışdır

Paylaş:

Baxılıb: 705 dəfə