Vüqar Rəhimzadə: Cocuq Mərcanlı kəndinin bərpası Ali Baş Komandanımızın vədinə sadiqliyinin təsdiqidir

Bakı:

22 °C

59 %

5 m/s

AZ RU EN

Ana səhifə / Siyasət / Vüqar Rəhimzadə: Cocuq Mərcanlı kəndinin bərpası Ali Baş Komandanımızın vədinə sadiqliyinin təsdiqidir

Vüqar Rəhimzadə: Cocuq Mərcanlı kəndinin bərpası Ali Baş Komandanımızın vədinə sadiqliyinin təsdiqidir

26.01.2017 [09:56]

Ötən gün Azərbaycan Prezidentinin Cəbrayıl rayonunun işğaldan azad edilmiş Cocuq Mərcanlı kəndinin bərpası ilə bağlı tədbirlər haqqında imzaladığı Sərəncam ölkə ictimaiyyəti tərəfindən rəğbətlə qarşılandı. Sərəncamda qeyd edilir ki, ötən ilin aprel ayında Azərbaycan Ordusunun həyata keçirdiyi uğurlu əks-hücum hərbi əməliyyatı nəticəsində Cəbrayıl rayonunun erməni işğalından azad edilmiş Cocuq Mərcanlı kəndində insanların təhlükəsiz yaşaması mümkün olub. Bununla da tarixən burada yaşamış dinc əhalinin öz doğma yurdlarına qayıtması üçün Azərbaycan Silahlı Qüvvələrinin tam nəzarətinə keçmiş həmin ərazilərdə əsaslı yenidənqurma işlərinin başlanmasına şərait yaranıb.
Məsələyə münasibət bildirən Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru Vüqar Rəhimzadə qeyd edib ki, Cəbrayıl rayonunun düşmən işğalından azad edilmiş Cocuq Mərcanlı kəndinin bərpası ilə bağlı imzalanan Sərəncam Silahlı Qüvvələrimizin Ali Baş Komandanı, Prezident İlham Əliyevin xalq qarşısında verdiyi vədlərə hər zaman sadiqliyini nümayiş etdirir: “13 ildir ki, Azərbaycan cənab Prezidentimizin rəhbərliyi ilə sürətlə inkişaf edir. Ölkəmiz demək olar ki, qarşıya qoyulan bütün hədəflərə çatıb. Təbii ki, ölkə rəhbərliyinin həyata keçirdiyi siyasətin əsas istiqaməti məhz Dağlıq Qarabağ münaqişəsinin həllidir. Artıq uzun illərdir ki, bu istiqamətdə danışıqlar gedir, sülhün əldə olunması, münaqişənin Azərbaycanın ərazi bütövlüyü çərçivəsində həlli ilə bağlı mühüm işlər görülür. Lakin işğalçı Ermənistanın qeyri-konstruktiv mövqeyi və digər subyektiv səbəblərdən hələ də ciddi irəliləyiş əldə edilməyib. Ancaq Prezident İlham Əliyev bütün çıxışlarında qətiyyətlə bəyan edir ki, Azərbaycanın ərazi bütövlüyü bərpa ediləcək, qaçqın və məcburi köçkünlər öz doğma yurdlarına qayıdacaqlar. Hesab edirəm ki, Cocuq Mərcanlı kəndinin bərpası ilə bağlı imzalanan Sərəncam Ali Baş Komandanımızın qətiyyətli siyasətinin təsdiqidir”.
V.Rəhimzadə vurğulayıb ki, Prezident İlham Əliyevin Sərəncamı ilə qaçqın və məcburi köçkünlərin doğma torpaqlarına böyük qayıdışının əsası qoyuldu: “Bu qələbə Azərbaycan əsgərinin, xalqımızın qələbəsidir. Məhz güclü Ordumuzun cəsarəti, peşəkarlığı nəticəsində ötən ilin aprel ayında düşmən təxribatının qarşısı alındı və minlərlə hektar ərazi işğaldan azad edildi. Ali Baş Komandanımızın bəyan etdiyi kimi, aprel döyüşləri bizim şanlı tariximizdir, böyük qələbəmizdir. Sərəncamda qeyd edildiyi kimi, Cocuq Mərcanlı kəndinin bərpası ilə bağlı görüləcək işlər çərçivəsində birinci mərhələdə 50 fərdi yaşayış evinin, məktəb binasının və müvafiq infrastrukturun tikintisi üçün 2017-ci il dövlət büdcəsində nəzərdə tutulmuş Prezidentin ehtiyat fondundan Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4 milyon manat ayrılıb. Şübhəsiz ki, Cocuq Mərcanlı kəndi tezliklə bərpa ediləcək və illərdir torpaq həsrətində olan soydaşlarımız öz doğma yurdlarına qayıdacaqlar. Prezident İlham Əliyevin qətiyyətli və ardıcıl siyasəti hər birimizdə əminlik yaradır ki, işğal olunmuş torpaqlarımız son qarışına kimi düşmən tapdağından azad ediləcək. O gün uzaqda deyil...”.

Paylaş:

Baxılıb: 500 dəfə