XV Azərbaycan Beynəlxalq Səhiyyə Sərgisi keçirilir

Bakı:

20°C

60%

6m/s

Əlaqə

AZ RU EN

Ana səhifə / Siyasət / XV Azərbaycan Beynəlxalq Səhiyyə Sərgisi keçirilir

XV Azərbaycan Beynəlxalq Səhiyyə Sərgisi keçirilir

14.10.2009 [09:42]

Sərgidə dünyanın 13 ölkəsindən 74 şirkət iştirak edir
Dünən Bakıda Heydər Əliyev adına İdman-Konsert kompleksində XV Azərbaycan Beynəlxalq Səhiyyə Sərgisi (BINE-2009) öz işinə başlayıb. “Iteca Caspian LTD” şirkəti tərəfindən təşkil olunan sərgiyə Azərbaycan Respublikasının Səhiyyə Nazirliyi, Azərbaycan Sənaye və Ticarət Palatası və Azərbaycan Stomatoloqlar Assosiasiyası tərəfindən dəstək verilib. 3 gün davam edəcək sərgidə yerli tibb müəssisələri ilə yanaşı, Türkiyə, ABŞ, Almaniya, Rusiya, Belarus, Litva, Ukrayna, İran, Hindistan və digər ölkələrdən gələn 74 şirkət iştirak edir.
Sərginin rəsmi açılış mərasimində çıxış edən səhiyyə nazirinin müavini Elsevər Ağayev 15 ildən bəri ənənəvi olaraq keçirilən BINE sərgisinin nəinki Cənubi Qafqazda, eyni zamanda, Xəzər dənizi hövzəsi regionunda lider sərgiyə çevrildiyini və bu sərgiyə olan marağın getdikcə artdığını bildirdi. Onun sözlərinə görə, dünyanı bürüyən maliyyə böhranı sosial sahələrə də öz zərbəsini vurmaqdadır. Bir sıra ölkələrdə keçirilməsi nəzərdə tutulan müxtəlif təyinatlı beynəlxalq sərgilər təxirə salınıb. Sərgilərin keçirilməsinin ölkə iqtisadiyyatı ilə sıx bağlı olduğunu qeyd edən natiq, maliyyə böhranının Azərbaycandan yan keçdiyini və ölkə iqtisadiyyatına hər hansı bir şəkildə təsir etmədiyini vurğuladı. Nazir müavini qeyd etdi ki, ötən 6 ayda ölkədə ümumi daxili məhsulun (üDM) həcmi 4 faiz artıb ki, bu da Azərbaycanda iqtisadi inkişafın göstəricisidir.
Dövlət büdcəsi gəlirlərinin ilbəil artdığını diqqətə çatdıran E.Ağayev, buna uyğun olaraq səhiyyə sektoruna ayrılan maliyyə vəsaitlərinin də hər il yüksəldiyini bildirdi.
Son 2 ildə respublikada 300 tibb müəssisəsinin tikildiyini və rekonstruksiyadan sonra təhvil verildiyini qeyd edən natiq, bu müəssisələrdə tibb sənayesinin ən müasir avadanlıqlarının quraşdırıldığını dedi. Səhiyyə sektorunun inkişafının daim dövlətin diqqət mərkəzində olduğunu qeyd edən E.Ağayev yeni istifadəyə verilən tibb müəssisələrinin əksəriyyətinin rəsmi açılış mərasimində Prezident İlham Əliyevin, Azərbaycanın birinci xanımı, Heydər Əliyev Fondunun prezidenti, YUNESKO VƏ İSESKO-nun xoşməramlı səfiri, Milli Məclisin deputatı Mehriban Əliyevanın iştirak etdiyini xatırlatdı.
Nazir müavini, həmçinin, uzun illərdən bəri tikintisi yarımçıq qalmış iki mühüm səhiyyə ocağının-Azərbaycan Elmi-Tədqiqat Oftalmologiya İnstitutu və Milli Onkologiya Mərkəzlərinin istifadəyə verilməsini dövlətin vətəndaşlarımızın sağlamlığının qayğısına qalmasının bariz nümunəsi kimi qiymətləndirdi. ölkədə peşəkar tibbi kadrların hazırlanmasına xüsusi diqqət yetirildiyini qeyd edən natiq, buna misal kimi, Azərbaycan Dövlət Tibb Universiteti üçün Prezidentin Ehtiyat Fondundan ayrılmış vəsaitlər hesabına iki klinikanın - cərrahiyyə və terapiya tədris korpuslarının tikildiyini qeyd etdi. Tədbirin əhəmiyyətindən danışan Elsevər Ağayev, sərginin yerli şirkətlərimizin özlərinə yeni tərəfdaşlar tapmaq üçün gözəl imkan yaratdığını söylədi və onlara işlərində müvəffəqiyyətlər arzuladı.
Son illərdə respublikada səhiyyə sektorunda çox böyük irəliləyişlərə nail olunduğunu və ciddi addımlar atıldığını qeyd edən Azərbaycan Sənaye və Ticarət Palatasının vitse-prezidenti Mehman Əhmədov daha sonra BINE-nin yubiley sərgisinin fəaliyyətə başlamasını əlamətdar hadisə adlandırdı. O, sərginin Azərbaycan şirkətləri üçün əməkdaşlıq baxımından yeni-yeni imkanlar açacağına əminliyini vurğuladı.
“Iteca Caspian LTD” şirkətinin prezidenti Fərid Məmmədov isə ötən 15 il ərzində keçirilən sərgilərə dünyanın 25 ölkəsindən 1200-dən artıq şirkətin qatıldığını vurğuladı. F.Məmmədov dedi ki, keçirilən bu sərgilər nəticəsində yerli şirkətlərimiz xarici şirkətlərlə bir sıra müqavilələr imzalayıb, müştərək müəssisələr təsis edilib, səhiyyə sahəsində müasir texnologiyalar və avadanlıqlar ölkəmizə gətirilib. Onun sözlərinə görə, artıq 3 ildir ki, BINE sərgisi “UFİ”-ümumdünya Sərgi Sənayesi Assosiasiyasının keyfiyyət nişanına layiq görülüb ki, bu da Azərbaycanda keçirilən səhiyyə sərgilərinin yüksək səviyyədə təşkil olunmasından xəbər verir.
Qeyd edək ki, BINE sərgisi ilə yanaşı, IV Azərbaycan Beynəlxalq Stomatologiya Sərgisi və III Azərbaycan Beynəlxalq Gözəllik və Estetik Tibb Sərgisi də öz işinə başlayıb. Stomatologiya sərgisində ziyarətçilərə stendlərdə ağız boşluğunun gigiyenası vasitələri, stomatologiya avadanlıqları və birdəfəlik istehlak malları təqdim olunur.
Sonuncu sərgidə isə peşəkar kosmetika, “solyarilər”, dərinin qaralması üçün kosmetika, estetik klinikalar, SPA və gözəllik salonları üçün avadanlıqlar, bədən quruluşunun korreksiya edilməsi üçün avadanlıqlar, tibb müəssisələri və otellər üçün birdəfəlik gigiyenik istifadə məhsulları və s. malar ziyarətçilərə təqdim olunur.
Sərgi öz işini oktyabrın 15-də başa vuracaq.
Səlim LOÄžMANOÄžLU

Paylaş:

Baxılıb: 1046 dəfə