“Türküstan” qəzetinin baş redaktoru : Bu seçkilərin həm siyasi, həm də simvolik mənası var

Bakı:

2 °C

93 %

10 m/s

Əlaqə

AZ RU EN

Ana səhifə / Xəbər lenti / “Türküstan” qəzetinin baş redaktoru : Bu seçkilərin həm siyasi, həm də simvolik mənası var

“Türküstan” qəzetinin baş redaktoru : Bu seçkilərin həm siyasi, həm də simvolik mənası var

17.08.2024 [10:32]

“Türküstan” qəzetinin baş redaktoru, “Ortaq Dəyərlər” İctimai Birliyinin sədri Aqil Camal Azərbaycanda keçiriləcək parlament seçkiləri ilə bağlı “Seçki 2024” Müstəqil Media Mərkəzinin suallarını cavablandırıb. Aqil Camalın müsahibəsini təqdim edirik.

- Qarşıdan gələn parlament seçkilərinin ölkəmiz və region üçün hansı əhəmiyyəti var?

- Növbədənkənar parlament seçkilərində siyasi partiyalar aktiv iştirak edirlər. Eyni zamanda, müstəqil namizədlər də seçkilərdə iştirak edirlər. Növbədənkənar parlament seçkilərinin yeni dövr üçün Azərbaycanın istər siyasi mühitinə, istərsə də dövlət idarəetməsində aparıcı rola malik olan qanunverici orqanın fəaliyyətinə müsbət təsir göstərəcəyini ümid etmək olar.

Bu gün dünyada, eyni zamanda Azərbaycanın yerləşdiyi regionda və regiona qonşu olan ölkələrdə çox kritik proseslər getməkdədir. Bu baxımdan Azərbaycanda seçkilərin keçirilməsi zamanı xüsusilə xarici qüvvələrin seçki prosesinə müdaxiləsinin minimum olması mühüm şərtdir. Çünki Azərbaycanda fərqli siyasi görüşlərə və ya mövqeyə malik olan siyasi qüvvələr var. Amma sevindirici haldır ki, bu hal hazırda seçki prosesinə qoşulmuş partiyaların və namizədlərin Azərbaycanın bu gününə və gələcəyinə yanaşmada hansısa fərqli fikirləri olsa da, bütövlükdə öz ölkələrinə, dövlətinə bağlı olan qüvvələr və namizədlərdir.

- Suverenliyini tam bərpa etmiş Azərbaycanda parlament seçkilərinin keçirilməsini necə dəyərləndirsiniz?

- 44 günlük Vətən müharibəsindən, eyni zamanda ötən il Qarabağda keçirilən antiterror tədbirlərindən sonra Azərbaycanda separatizmin kökü kəsildi. Azərbaycan 30 ildən sonra öz ərazi bütövlüyünə və tam suverenliyinə nail oldu. Bu baxımdan artıq Azərbaycan öz tarixinin yeni mərhələsinə qədəm qoyur. Suverenliyi tam təmin olunmuş Azərbaycanda hakimiyyət qollarının da yenidən formalaşdırılması önəmlidir və bu baxımdan da simvolik xarakter daşıyır. Bir müddət əvvəl suverenliyini tam təmin etmiş Azərbaycanda Prezident seçkiləri keçirildi. Hazırda parlament seçkiləri ilə bağlı azad olunmuş ərazilərimizdə artıq seçki məntəqələri qurulub, hətta namizədlərin təbliğat, təşviqat plakatları da azad olunmuş ərazilərimizdə yayımlanır. Bu baxımdan dediyim kimi, bu seçkilərin həm siyasi, həm də simvolik mənası var.

- Bu seçkilər Azərbaycanın gələcəyi, siyasi mənzərəsi və iqtisadi inkişafı baxımından hansı önəmə malikdir?

- Budəfəki seçkilərdə namizədlərin sırasına baxsaq görərik ki, gənc namizədlərin iştirak faizi çox yüksəkdir. Bunun özü də dəyişiklik üçün çox önəmlidir. Yaxşı olar ki, yeni mərhələdə, yeni dönəmdə qanunverici orqanda daha çox simalar dəyişsin, gənclər gəlsin, mütəxəssislər cəlb olunsun. Çünki Azərbaycanın qarşısında yeni çağırışlar, hədəflər var. Eyni zamanda, Azərbaycana qarşı ən müxtəlif istiqamətlərdən təhdidlər də davam etməkdədir və gözlənilir ki, qarşıdakı dövrdə dünyadakı mürəkkəb geosiyasi şəraitdə bu cür təhdidlərin arealı genişlənə bilər. Ona görə yeni formalaşacaq parlament ölkəmizə qarşı təhdidlərin qarşısını almaq istiqamətində önəmli rol oynayacaq. Ümid edirik ki, siyasi qüvvələr və ayrı-ayrı namizədlər parlamentdə təmsil olunarkən bu məsələlərə həssas yanaşacaqlar.

Paylaş:

Baxılıb: 486 dəfə