“Böyük qayıdış”ın müjdəçisi...

Bakı:

26 °C

52 %

2 m/s

Əlaqə

AZ RU EN

Ana səhifə / Analitik / “Böyük qayıdış”ın müjdəçisi...

“Böyük qayıdış”ın müjdəçisi...

19.07.2023 [11:04]

Ağalıya qayıdışın bir ili tamam olur

44 günlük Vətən müharibəsində əldə olunan qələbə böyük siyasi - hərbi əhəmiyyəti ilə yanaşı, mənəvi müstəvidə də əvəzolunmaz qürura çevrildi. Müzəffər Ali Baş Komandan İlham Əliyevin rəhbərliyi ilə şanlı qələbə nəticəsində 30 ilə yaxın işğal altında qalmış torpaqlara məcburi köçkünlərin qayıdışına imkan yarandı. Vaxtilə məcburən öz yurd - yuvasını tərk etmiş vətəndaşlarımız öz evlərinə, öz doğma kəndlərinə qayıtdılar. Bu qürurverici anlar bizə bir daha qələbənin böyüklüyünü və əhəmiyyətini anlatmış oldu.

Ağır dağıntılar və mina təhlükəsi...

Müharibədən sonrakı ilk günlərdə ağır mənzərə ilə qarşı-qarşıya idik. 30 illik işğal dövründə torpaqlarımızda miqyasagəlməz dağıntılar törədilmiş, vəhşiliklər həyata keçirilmişdi. Qarabağ və Şərqi Zəngəzurda həyata keçirilmiş dağıntıları, urbisiti, ekosidi və minalanma təhlükəsini nəzərə alaraq bir çox ekspertlər qayıdış üçün uzun illər tələb olunacağını qeyd edirdilər. Lakin cənab Prezidentin Qarabağ və Şərqi Zəngəzurdakı bərpa-quruculuq işlərinə diqqəti nəticəsində Zəngilanın Ağalı kəndinə qayıdış 44 günlük müharibədən cəmi il yarım sonra baş tutdu. Bu, ölkəmizdə vətəndaş-dövlət vəhdətinin ən mühüm uğurlarından biri kimi çıxış etdi. Prezident İlham Əliyev dəfələrlə qeyd edib ki, Azərbaycan dövlətin siyasətinin mərkəzində Azərbaycan vətəndaşının maraqları və onun rifahı durur. Məcburi köçkünlərin tezliklə evlərinə qayıtmaq istəkləri bərpa-quruculuq işlərinin sürətlə aparılmasını şərtləndirən vacib amillərdən oldu.

4 mərhələdə 41 ailə...

İşğaldan azad olunmuş ərazilərin sürətlə bərpa edilməsi, “Böyük qayıdış” proqramının uğurla reallaşdırılması birimənalı şəkildə Prezident İlham Əliyevin həyata keçirdiyi siyasətin, Azərbaycan dövlətinin gücünün və qüdrətinin əyani göstəricisidir. Artıq demək olar ki, işğaldan azad olunmuş bütün regionlarımızda böyük quruculuq-abadlıq işləri aparılır. Amma bu işdə ilk qaranquş, ilk abadlaşdırılan region Zəngilan rayonunun Ağalı kəndi oldu. 2021-ci ilin aprelində dövlətimizin başçısı tərəfindən qoyulan “Ağıllı kənd” layihəsinin təməli qısa zamanda yeni sakinlərin Ağalıya qovuşmasına böyük təkan verdi. Sürətli və planlaşdırılmış şəkildə aparılan fəaliyyət nəticəsində 2022-ci il iyulun 19-dan başlayaraq Ağalı kəndinə qayıdış çərçivəsində dörd mərhələdə 41 ailə köçürüldü. Bu, təxminən 200 nəfər demək idi.

Abad, yenidən qurulmuş Ağalı...

Ağalı kəndinin bərpası Azərbaycanın Vətən müharibəsindəki qələbəsinin növbəti təntənəsinə çevrildi. Qeyd edək ki, kəndin qısa müddətdə sakinlərin ixtiyarına verilməsinə baxmayaraq, bütün zəruri infrastrukturlar yüksək səviyyədə idi. Kənddə innovativ tikinti materiallarından istifadə olunmaqla tam izolyasiya olunmuş 200 fərdi ekoloji ev, ikimərtəbəli 4 qeyri-yaşayış binası, 360 şagird yerlik məktəb və 60 yerlik uşaq bağçası tikilib. Növbəti mərhələ çərçivəsində 150 evin tikilməsi nəzərdə tutulur. Kənddə enerjiyə tələbat alternativ enerji mənbələri vasitəsi ilə təmin olunur.

Eyni zamanda, Ağalıda Smart DOST, ASAN, Azərpoçt, Kiçik və orta biznesin inkişafı mərkəzləri fəaliyyət göstərir. Xüsusilə vurğulanmalıdır ki, kəndin aqrar sektorunun inkişafına xüsusi önəm verilib. Ağalının kənarında yerləşən böyük əkin sahəsində pilot sistemlər quraşdırılıb. Bu sistemlərlə 157 hektar sahənin suvarılması nəzərdə tutulub. Eyni zamanda, kənd ərazisində iqlim stansiyalarının da tikilməsi planlaşdırılıb.

Hədəf ilk beşillikdə 34 min 500 ailənin köçürülməsidir

Ümumiyyətlə, işğaldan azad edilmiş ərazilərin bərpası və “Böyük Qayıdış”ın təmin olunması yeni strateji mərhələdə Azərbaycanın əsas prioritetləri sırasında yer alır. Söhbət bütünlüklə dağıdılmış ərazilərin minalardan təmizlənməsindən, şəhər və kəndlərin bərpasından, zəruri infrastruktur qurulmasından gedir. Azərbaycan dövləti bu kimi amilləri nəzərə alaraq işğaldan azad edilmiş ərazilərin ölkənin digər bölgələri kimi yüksək inkişaf yolun qədəm qoyması üçün güclü siyasi iradə sərgiləyir. Prezident İlham Əliyevin imzaladığı müvafiq sənədə əsasən, Qarabağ və Şərqi Zəngəzur iqtisadi rayonlarının yaradılması həm bu ərazilərin iqtisadi potensialından səmərəli şəkildə istifadə edilməsi, həm də reinteqrasiya proseslərinin sürətləndirilməsi baxımından xüsusi önəm daşıyır.

Ötən il Prezident İlham Əliyevin müvafiq Sərəncamı ilə təsdiq edilən “Böyük Qayıdış”la bağlı 2022-2026-cı illəri əhatə edən Dövlət Proqramı işğaldan azad edilmiş torpaqlarımıza yenidən həyatın qaytarılmasında mühüm rola malikdir. Proqramın əsas hədəfi ilk beşillikdə 34 min 500 ailəni azad edilmiş ərazilərə köçürməkdir. Bu istiqamətdə sistemli tədbirlər həyata keçirilməkdədir.

Uğurlu dövlət siyasətinin təntənəsi...

Ölkəmizin ərazisinin 20%-də (Livan dövləti miqyasında ərazi) dağıdılmış şəhər, kənd və qəsəbələri bərpa etmək, yeni şəhər və kəndlər tikmək hətta böyük, iqtisadi cəhətdən güclü dövlətlər üçün də ciddi çağırış hesab olunur. ?mummilli lider Heydər Əliyev tərəfindən əsası qoyulmuş və Prezident İlham Əliyev tərəfindən yeni dövrün tələblərinə uyğun şəkldə davam etdirilən irnkişaf strategiyası Azərbaycan dövlətinin siyasi və iqtisadi baxımdan müstəqilliyini təmin edib. Bu isə özlüyündə işğaldan azad olunmuş ərazilərdə də bərpa və yenidənqurma işlərini yüksək səviyyədə və sürətlə aparmağa imkan verir. Azərbaycan dövləti kənardan heç bir yardım olmadan, öz gücünə işğaldan azad olunmuş əraziləri yenidən qurur, nəhəng infrastruktur layihələri reallaşdırır

P.İSMAYILOV

Paylaş:

Baxılıb: 791 dəfə