"Heydər Əliyev. Müstəqilliyimiz əbədidir" kitabının 27-ci cildi çapdan çıxıb

Bakı:

25 °C

57 %

0 m/s

Əlaqə

AZ RU EN

Ana səhifə / Siyasət / "Heydər Əliyev. Müstəqilliyimiz əbədidir" kitabının 27-ci cildi çapdan çıxıb

"Heydər Əliyev. Müstəqilliyimiz əbədidir" kitabının 27-ci cildi çapdan çıxıb

19.09.2009 [20:49]

“Hamı - həm Qafqazda, o cümlədən Cənubi Qafqazda marağı olan ölkələr, həm də Xəzər hövzəsində marağı olan ölkələr bilməlidir ki, Ermənistan-Azərbaycan münaqişəsi qurtarmayana qədər, Ermənistanla Azərbaycan arasında sülh yaranmayana qədər, burada təhlükəsizliyin, əmin-amanlığın təmin edilməsinə nail olunmayana qədər Qafqazda vəziyyət gərgin olacaqdır. Bu, təkcə bizim üçün deyil, həm də Qafqaz bölgəsinə, Xəzər dənizi bölgəsinə maraq göstərən ölkələr üçündür. Ona görə biz istəyirik ki, sülh olsun, Ermənistanla Azərbaycan arasında sülh yaransın. Mən əminəm ki, sülh yaranandan sonra Qafqazda, xüsusən Cənubi Qafqazda böyük canlanma başlayacaqdır. O insanlar ki, indiyə qədər sülhün yaranmasına mane olurlar, onlar özləri bunun şahidi olacaqlar və biz bunun şahidi olacağıq, biz buna nail olacağıq”.
Bu sətirlər “Heydər Əliyev. Müstəqilliyimiz əbədidir” çoxcildliyinin “Azərnəşr” tərəfindən yenicə çapdan buraxılmış 27-ci cildindən - Ulu öndər Heydər Əliyevin 2000-ci il mayın 27-də Respublika sarayında 28 May - Respublika Gününə həsr olunmuş təntənəli mərasimdəki nitqindən götürülüb. Nəşrin buraxılışına məsul Azərbaycan Prezidenti Administrasiyasının rəhbəri akademik Ramiz Mehdiyevdir.
Müstəqil Azərbaycan dövlətinin banisi, xalqımızın ümummilli lideri Heydər Əliyevin 2000-ci il aprelin 28-də Binəqədi rayonu ərazisində akademik Zərifə Əliyeva adına istirahət parkının açılışı mərasimindəki nitqi ilə başlayan cilddə 2000-ci il iyunun 2-dək dövrü əhatə edən materiallar - dahi dövlət xadiminin bir sıra xarici dövlət və hökumət nümayəndələri ilə danışıqları və söhbətləri verilib, Azərbaycanın beynəlxalq münasibətlər sistemində yeri və rolundan, Dağlıq Qarabağ probleminin həlli və münaqişənin nizama salınması ilə əlaqədar ölkəmizin prinsipial mövqeyindən, dost və qonşu ölkələr arasında ənənəvi qarşılıqlı faydalı əlaqələrin daha da möhkəmləndirilməsi və genişləndirilməsindən bəhs edən materiallar öz əksini tapıb.
Bu cilddə, eyni zamanda, Heydər Əliyevin Gəncəyə səfəri zamanı, Yenikənd SES-in açılışı mərasimindəki, “N” hərbi hissəsinin şəxsi heyəti və şəhər sakinləri ilə görüşlərdəki nitq və çıxışları, informasiya vasitələrinə müsahibələri, bəyanatları və s. verilib.
Bütün cildlərdə olduğu kimi, bu cilddə də Ulu öndərin Azərbaycanın sürətli iqtisadi yüksəlişinə, xalqımızın rifahı və tərəqqisi naminə aparılan geniş islahatlara, eləcə də ictimai-siyasi həyatın mühüm məsələlərinə həsr olunmuş nitqləri, çıxışları və digər materiallar toplanıb.
AzərTAc-ın materialları əsasında hazırlanmış çoxcildliyin bu kitabında oxucular ümummilli lider Heydər Əliyevin Azərbaycanın pravoslav xristianlarına, yəhudi icmasına, Türkiyə Respublikasının Prezidenti Əhməd Necdət Sezərə müraciət və məktubları, Yeni Azərbaycan Partiyası Siyasi Şurasının iclasında, Böyük Vətən müharibəsində, İkinci Dünya müharibəsində faşizm üzərində qələbənin 55-ci ildönümü - Qələbə bayramı münasibətilə keçirilən mərasimdəki nitqləri, müxtəlif ölkələrin dövlət və hökumət rəhbərləri ilə görüşlərindən hesabatlar və s. ilə də tanış ola biləcəklər.

Paylaş:

Baxılıb: 1248 dəfə