Rimanın yalanları...

AZ RU EN

Ana səhifə / Analitik / Rimanın yalanları...

Rimanın yalanları...

28.10.2023 [10:53]

Tarixi, mədəni və dini abidələri məhv edən Azərbaycan yox, Ermənistandır

Nardar BAYRAMLI

Ermənistanın 30 illik işğalçılıq siyasəti nəticəsində Azərbaycan xalqına məxsus qədim tarixi, mədəni və dini abidələr dağıdılaraq yerlə-yeksan edilib, onların bir qismi isə saxtalaşdırılıb. Təcavüzkar dövlətin bu cür vandal əməllərə əl atmaqda əsas məqsədi xalqımızın minilliklər boyu yaşadığı torpaqlarda həm tarixi keçmişimizi, həm də mənəvi yaddaşımızı məhv etmək olub. Bütövlükdə, 200 il ərzində Azərbaycan xalqına qarşı davam etmiş erməni təcavüzünün qurbanları həm də tarixi-dini abidələr, müqəddəs ocaqlar və məbədlər olub.

Azərbaycan öz torpaqlarını işğaldan azad etdikdən sonra ermənilərin törətdiyi bu cinayətləri əyani şəkildə dünya ictimaiyyətinin diqqətinə çatdırır. Lakin beynəlxalq birlik, xüsusilə Qərb və Avropa dövlətləri Ermənistanın bu cinayətlərinə adekvat reaksiya vermir, erməni vandalizminə səssiz qalırlar. Dövlətimizin öz ərazi bütövlüyünü və suverenliyini bərpa etməsi isə həmin ölkələri ciddi narahat edir. Son zamanlar Avropa qitəsindən müxtəlif ölkələrin nazirlərinin Ermənistana səfərlərinin ardı-arası kəsilmir. Onlar İrəvana səfər edərək Ermənistana dəstək verdiklərini, onun yanında olduqlarını və s. bəyan edirlər. Sanki 30 il ərzində Azərbaycanın 20 faiz ərazisini işğal edən, həmin ərazilərdə hər şeyi məhv edən Ermənistan deyilmiş... Bəlkə həmin ölkələrin bütün bunlardan xəbərləri yox idi? Əlbəttə, var idi və bu gün də bütün proseslərdən xəbərdardırlar. Sadəcə olaraq, türk-müsəlman dövləti olan Azərbaycanın güclənməsini istəmirlər. Ermənistanın işğalçı siyasəti onların maraqlarına uyğun imiş. Vəziyyət dəyişdikdən sonra, ciddi narahatlıq keçirirlər.

Bu prosesdə isə Fransa digərlərini geridə qoyur. Digər nazirlərin ardınca oktyabrın 26-da mədəniyyət naziri Rima Əbdül Mələk Ermənistana səfər edib. O səfəri zamanı Qarabağ bölgəsindəki tarixi və mədəni abidələrin təhlükə altına düşməsi ilə bağlı əsassız iddialar səsləndirib və onları qorumaq üçün müxtəlif mexanizmlərin yaradılmasına “çağırış” edib.

Azərbaycan Xarici İşlər Nazirliyinin mətbuat katibi Ayxan Hacızadə Fransanın mədəniyyət nazirinin bu iddialarına cavab verib. A.Hacızadə bildirib ki, sözügedən səfər və Azərbaycanın Qarabağ bölgəsində mədəni irslə bağlı iddialar Fransa tərəfinin növbəti zəifliyi və qərəzinin nümunəsidir. Onun sözlərinə görə, Azərbaycan öz ərazilərindəki bütün mədəni və tarixi abidələrin mühafizəsinin vacibliyini və bu xüsusda, öhdəliklərini çox gözəl dərk edir: “Fransanın başqa xalqlara məxsus tarixi və mədəniyyət sərvətlərini müsadirə etmiş ölkə kimi belə iddialar qaldırmağa heç bir mənəvi haqqı yoxdur. Azərbaycanın antiterror tədbirlərindən sonra mədəniyyət və tarixi abidələrin təhlükə altında olması ilə bağlı iddialar əsassızdır və bu, BMT-nin regiona reallaşdırılan iki missiyası tərəfindən də təsdiqlənib. Təəssüflər olsun ki, Fransa nə keçmiş Ermənistan-Azərbaycan münaqişəsində vasitəçi kimi, nə də UNESCO çərçivəsində nüfuzlu ölkə kimi heç vaxt Ermənistan tərəfindən istər Azərbaycan, istərsə də Ermənistan ərazilərində mövcud tarixi, mədəni və dini abidələrin tamamilə dağıdılmasından narahatlığını ifadə etməyib”.

Bundan başqa, məhz Azərbaycan 30 ilə yaxındır ki, Azərbaycanın keçmiş işğal olunmuş ərazilərində və Ermənistanda mədəni irsimizin qəsdən dağıdılması, mənimsənilməsi, dəyişdirilməsi, habelə qanunsuz başqa yerə aparılması ilə bağlı qiymətləndirmə missiyalarının reallaşdırılması çağırışları ilə beynəlxalq təşkilatlara israrla müraciət edib. Təəssüf ki, bu Ermənistan tərəfinin əngəlləri nəticəsində mümkün olmayıb. UNESCO-nun özü də 2005-ci il hesabatında bu faktı təsdiqləyib. Azərbaycan Respublikasının ərazisində yerləşən mədəni irs mənşəyindən, dünyəvi və ya dini mənsubiyyətindən asılı olmayaraq Azərbaycanın dəyər verdiyi və qoruduğu Azərbaycan xalqının mədəni müxtəlifliyini təcəssüm etdirir. XİN rəsmisi bir daha Fransa tərəfini Azərbaycanın daxili işlərinə qarışmamağa və bu cür təxribat xarakterli bəyanatlara son qoymağa çağırıb.

Göründüyü kimi, Fransa kimi ölkələr beynəlxalq hüquq normalarını, ədalət prinsiplərini və real faktları görməzdən gəlir. Rəsmi Paris özünün kiçik bacısı Ermənistanla bağlı hər cür yalan və böhtan səsləndirməkdən çəkinmir. Amma bu cür vasitələrlə heç nəyə nail ola bilməyəcək.

Paylaş:

Baxılıb: 502 dəfə