Ordubad rayonunda musiqi təhsilinin inkişafı da diqqət mərkəzindədir

Bakı:

17°C

82%

6m/s

Əlaqə

AZ RU EN

Ana səhifə / Siyasət / Ordubad rayonunda musiqi təhsilinin inkişafı da diqqət mərkəzindədir

Ordubad rayonunda musiqi təhsilinin inkişafı da diqqət mərkəzindədir

05.11.2009 [10:05]

Noyabrın 3-də Ordubad şəhər Uşaq Musiqi Məktəbi istifadəyə verilib. Açılışı mərasimində çıxış edən Ordubad Rayon İcra hakimiyyətinin başçısı Elşad Əliyev rayonda aparılan quruculuq işlərindən danışıb. Naxçıvan Muxtar Respublikası Ali Məclisinin Sədri Vasif Talıbov yeni musiqi məktəbinin istifadəyə verilməsi münasibətilə məktəbin müəllim və şagirdlərini təbrik edib, onlara ölkəmizin musiqi mədəniyyətinin inkişafındakı xidmətlərində uğurlar arzulayaraq deyib ki, Azərbaycan Respublikası Prezidentinin 2008-ci il 22 dekabr tarixli Sərəncamı ilə 2009-cu il ölkəmizdə “Uşaq ili” elan olunub: “İstifadəyə verilən uşaq musiqi məktəbi də “Uşaq ili”nə layiqli töhfələrdən biridir. Hər bir ölkənin gələcəyi onun gənclərindən asılıdır. Ona görə də ölkəmizdə gənclərə, uşaqlara dövlət tərəfindən xüsusi diqqət və qayğı göstərilir. Bu gün ölkəmizin qarşısında duran ən mühüm vəzifələrdən biri də hərtərəfli gənclərin yetişdirilməsindən ibarətdir. Orta məktəbdə təhsilini yaxşı başa vuran, lazımi peşəyə yiyələnmək üçün təhsilini davam etdirən, yaxud hansısa peşə sahibi olmaq üçün peşə məktəblərinə, sənət məktəblərinə üz tutan, asudə vaxtlarını idman komplekslərində, musiqi məktəblərində keçirən gənclər hərtərəfli gənclər hesab olunurlar. Onlar vətənpərvər gənc kimi yetişib ölkəmizin həyatında fəal iştirakçıya çevrilirlər. Gənclərin hərtərəfli yetişdirilməsi üçün isə ölkəmizdə hər cür şərait vardır. İdman kompleksləri qurulub gənclərin, uşaqların istifadəsinə verilir, məktəblər, musiqi məktəbləri tikilir, uşaqların dərsdən sonrakı asudə vaxtlarını səmərəli keçirməsi üçün məktəbdənkənar müəssisələr fəaliyyət göstərir. Hər birimizin qarşısında konkret vəzifələr durur. Dövlətin qarşısında duran vəzifə belə bir musiqi məktəbini inşa edib müəllim və şagirdlərin istifadəsinə verməkdən ibarətdir. Məktəbin müəllimlərinin qarşısında duran vəzifə isə burada musiqi təhsili alan gənclərimizə lazımi səviyyədə musiqinin öyrədilməsi, Azərbaycan milli musiqisinin təbliğ olunması, qorunması və gələcək nəsillərə ötürülməsidir”.
Açılışı bildirən lent kəsilib, uşaq musiqi məktəbinə baxış keçirilib. 4 mərtəbədən ibarət olan binada 49 sinif otağı, müəllimlər otağı, nəfəs alətləri orkestri, xor və xalq çalğı alətləri orkestri üçün zal, kitabxana yerləşir. Uşaq musiqi məktəbinin kitabxana fondunda 200 ədəd tədris vəsaiti və musiqi ədəbiyyatı mövcuddur.
Sara ƏZİMOVA,
ORDUBAD

Paylaş:

Baxılıb: 1080 dəfə