2024-cü ilin sonunadək

Bakı:

14°C

88%

3m/s

Əlaqə

AZ RU EN

Ana səhifə / MEDİA / 2024-cü ilin sonunadək

2024-cü ilin sonunadək

21.05.2024 [11:00]

Şuşaya...“Böyük Qayıdış” sürətlə davam edir

İkinci Qarabağ müharibəsində qazanılan möhtəşəm qələbədən sonra dövlətimizin qarşısında dayanan ən mühüm hədəflərdən biri işğaldan azad edilmiş ərazilərimizin bərpasını və keçmiş məcburi köçkünləri doğma yurdlarına qayıdışının təmin edilməsidir. Döyüş meydanında düşməni diz çökdürən və kapitulyasiyaya məruz qoyan qalib Azərbaycan dövləti tikinti meydanında də yüksək ruhla işlər həyata keçirir. Ötən dövrdə reallaşdırılan layihələr onu deməyə əsas verir ki, respublikamız işğaldan azad olunmuş ərazilərin bərpası, soydaşlarımızın məskunlaşdırılması ilə bağlı qarşıya qoyulan vəzifələrin öhdəsindən layiqincə gəlir.

Prezident İlham Əliyevin müvafiq Sərəncamı ilə təsdiq edilən “Böyük Qayıdış”la bağlı 2022-2026-cı illəri əhatə edən Dövlət Proqramı işğaldan azad edilmiş torpaqlarımıza yenidən həyatın qaytarılmasında mühüm rola malikdir. Dövlətimiz tərəfindən “Böyük Qayıdış” planına uyğun olaraq məcburi köçkünlərin doğma yurd-yuvalarına qısa zamanda qayıtması üçün bütün imkanlar səfərbər edilib. Həmin ərazilərdə yeni yaşayış məntəqələrinin salınması, infrasturukturun bərpası, yolların çəkilişi, məktəb, xəstəxana tikintisi sürətlə davam edir. Bir zamanlar dədə-baba yurdlarını tərk etməyə məcbur qalan soydaşlarımız indi doğma torpaqlarına ləyaqət və böyük fəxrlər qayıdırlar.

Hansı ərazilərə köç baş tutub?

İndiyə qədər beş yaşayış məntəqəsinə - Zəngilan rayonunun Ağalı kəndi, Tərtər rayonunun Talış kəndi, Laçın şəhəri və rayonun Zabux kəndi, Füzuli şəhərinə keçmiş məcburi köçkünlərin köçürülməsi yekunlaşıb.

Bu ilin sonunadək Cəbrayıl, Kəlbəcər, Xankəndi, Xocalı, Şuşa şəhərlərinə təxminən 20 min nəfərin qayıdacağı planlaşdırılır. Ağdam, Zəngilan, Qubadlı şəhərlərinə qayıdış isə 2025-ci ildə nəzərdə tutulur.

Bundan başqa, hazırda yüzdən çox şəhər və kəndin baş planı təsdiqlənib, bir çox şəhər və kənddə inşaat işləri aparılır, rəsmi məlumatlarda bildirilir.

Türk və İslam dünyası üçün əziz şəhər...

Mövzu barədə fikirlərini “Yeni Azərbaycan”la bölüşən millət vəkili Elman Məmmədov bildirib ki, 2024-cu ilin may ayı xalqımız üçün əlamətdar tarixlərdən biridir. Çünki məhz bu ayda “Qarabağın döyünən ürəyi” adlanan Şuşa şəhərinə yüzə yaxın ailə köçürüldü: “Bildiyiniz kimi, Prezident İlham Əliyevin 10 may 2024-cü il tarixində Şuşa şəhərinə növbəti tarixi səfəri baş tutdu. 32 ildən sonra Qarabağa həyat qayıdır və bu tarix Şuşanın yeni tarixinin başlanğıcıdır. Şuşa şəhəri ilə bərabər Qarabağın bütün bölgəsində yenidənqurma, abadlıq-quruculuq işləri bu gün yüksək səviyyədə davam edir. 10 may tarixini Şuşa sakinləri üçün xüsusi və əlamətdar gün hesab etmək olar. Uzun illər ata-baba yurdlarından didərgin düşmüş sakinlər artıq ölkə başçısının uğurlu siyasəti nəticəsində öz torpaqlarında məskunlaşırlar.

Şuşa bütün azərbaycanlıların qürur mənbəyi, mədəniyyət paytaxtıdır. Şuşa həm də türk və İslam dünyası üçün əziz şəhərdir. Ona görə də Vətən müharibəsində Şuşanın işğaldan azad edilməsi xalqımızın ləyaqətinin özünə qaytarılması və müharibədə zəfərimizin təntənəsi idi. Şuşanı işğaldan azad edən mərd oğullarımız dünya hərb tarixinə yazılan böyük igidlik göstəriblər. Ümumiyyətlə, Azərbaycan Ordusu Qarabağ və Şərqi Zəngəzurun azad edilməsində xalqımızın sarsılmaz ruhunu və əzəmətini nümayiş etdirib”.

Qarabağ dünyanın ən gözəl məkanına çevrilir

Deputatın sözlərinə görə, son 20 ildə vətənpərvər ruhda böyüyən və formalaşan oğullarımız olmasaydı, bu qələbəni qazanmaq mümkünsüz olardı: “Məhz bu qələbənin təməli onların qəhrəmanlığı, igidliyi və şücaəti sayəsində oldu. Bu gün bütün dünyada bizim qəhrəmanlarımızın göstərdiyi şücaət, cəsarət və vətənpərvərlik ruhundan danışılır. Bu da dövlət və millət olaraq hər birimiz üçün qürur, fəxr, sevinc mənbəyimizdir. 44 günlük Vətən müharibəsi və antiterror əməliyyatları zamanı rəşadətli, müzəffər ordumuz xüsusi qəhrəmanlıq göstərmişdi. Şuşa şəhəri öz əvvəlki tarixi memarlıq görkəmini saxlamaqla bərabər ən müasir formada yenidən qurulur. Şuşada yeni yaşayış kompleksləri inşa edilir, ermənilərin təhqir etdiyi məscidlərimiz bərpa edilərək təmir olunur. Doğma ata-baba yurdlarına qayıdan Şuşa sakinlərinin məşğulluq məsələləridə öz həllini tapır. Qarabağ və Şərqi Zəngəzur dünyanın ən gözəl məkanına çevrilir bu da dünyada Azərbaycanın siyasi və iqtisadi cəhətdən güclü dövlət olmasının bariz nümunəsidir”.

Məqalə Azərbaycan Respublikasının Medianın İnkişafı Agentliyinin maliyyə dəstəyi ilə “İşğaldan azad olunmuş ərazilərə “Böyük Qayıdış” “ istiqaməti üzrə hazırlanmışdır.

Yeganə BAYRAMOVA

Paylaş:

Baxılıb: 614 dəfə