Siyavuş Novruzov: Dünyada mürəkkəb proseslərin baş verdiyi şəraitdə ölkəmizdə iqtisadi sahədə müsbət nəticələr əldə olunur

Bakı:

24 °C

59 %

2 m/s

AZ RU EN

Ana səhifə / Siyasət / Siyavuş Novruzov: Dünyada mürəkkəb proseslərin baş verdiyi şəraitdə ölkəmizdə iqtisadi sahədə müsbət nəticələr əldə olunur

Siyavuş Novruzov: Dünyada mürəkkəb proseslərin baş verdiyi şəraitdə ölkəmizdə iqtisadi sahədə müsbət nəticələr əldə olunur

01.06.2017 [10:07]

“Dünyada mürəkkəb proseslərin baş verdiyi şəraitdə ölkəmizdə iqtisadi sahədə müsbət nəticələr əldə olunur. Bu da həyata keçirilən düzgün siyasətin nəticəsidir”. Bu fikirləri YAP İcra katibinin müavini, Milli Məclisin İctimai birliklər və dini qurumlar komitəsinin sədri Siyavuş Novruzov parlamentin dünən keçirilən iclasında “Azərbaycan Respublikasının 2016-cı ilin dövlət büdcəsinin icrası haqqında” qanun layihəsinin müzakirəsi zamanı deyib.
S.Novruzov bildirib ki, bu ilin mart ayında 2016-cı ilin dövlət büdcəsinin hesabatı qiymətləndirilib. Onun sözlərinə görə, bu, bir daha dövlətin şəffaf işləməsinə nümunədir. Müzakirələr zamanı bəzi deputatların ölkədə devalvasiyadan sonra banklarda yaranan problemlərlə bağlı fikirlərinə münasibət bildirən S.Novruzov qeyd edib ki, Azərbaycandan qat-qat böyük dövlətlər var ki, onlarda da devalvasiya, eləcə də ÜDM-in aşağı düşməsi halları baş verir: “Dünyada cərəyan edən hadisələr təbii ki, Azərbaycana da müəyyən mənada təsir edir. Ara-sıra nöqsanlar, hansısa bankların kreditləri verməsi ilə bağlı problemlər ola bilər. Amma bu kommersiya bankıdır. Vətəndaşlar kredit götürdüyü zaman imza atdıqları sənədləri diqqətli oxumalı, problem olduqda da məhkəməyə müraciət etməlidirlər. Ümumilikdə isə kredit götürəndə vətəndaşlar onu qaytarmağı da düşünməlidirlər. Evi, maşını və digər əşyaları girov qoyub sonradan çox böyük problem yaşamağa ehtiyac yoxdur”.
Bu gün ölkəmizdə ən böyük tədbirlər keçirildiyini deyən millət vəkili Azərbaycanda tikinti sektorunun canlandığını da xatırladıb. “Bu günlərdə Azərbaycanın I vitse-prezidenti Mehriban xanım Əliyeva tərəfindən qaçqın və məcburi köçkünlər üçün Qaradağ rayonunda yeni binanın tikintisinin təməlinin qoyulduğuna şahidlik etdik. Bundan əlavə, Nərimanov rayonunda da binaların tikilməsi prosesinə başlanılıb, Nəsimi rayonunda böyük mikrorayon köçürülür. Bütün bunlar həm yeni iş yerlərinin açılması, həm də vətəndaşlarımızın güzəştli şəkildə mənzilə sahib olmasına imkan yaradacaq. Bu proses Nizami və digər rayonlarda gedir. Təkcə Bakı şəhərində 300-ə yaxın binanın tikilməsi nəzərdə tutulur. Bu işlər dövlət tərəfindən Azərbaycan Prezidentinin rəhbərliyi ilə həyata keçirilir”, - deyə S.Novruzov vurğulayıb.

Paylaş:

Baxılıb: 502 dəfə