Bakıda 10-cu Alman-Azərbaycan iqtisadi forumu keçirilib

Bakı:

10°C

93%

0m/s

Əlaqə

AZ RU EN

Ana səhifə / Siyasət / Bakıda 10-cu Alman-Azərbaycan iqtisadi forumu keçirilib

Bakıda 10-cu Alman-Azərbaycan iqtisadi forumu keçirilib

13.08.2009 [10:17]

Dünən “Park İNN-Azərbaycan” mehmanxanasında Alman-Azərbaycan İqtisadi Birliyinin (DAWF) təşkilatçılığı ilə 10-cu Alman-Azərbaycan iqtisadi forumu keçirilib. Tədbirdə Almaniyanın Baden-Vürtemberq əyaləti tərəfdən Baş nazir Günter Oettinger, eləcə də neft-qaz, tikinti, maşınqayırma, elektronika, kimyəvi məhsullar, ətraf mühitin mühafizəsi texnikası, metalın cilalanması, kənd təsərrüfatı və yüksək keyfiyyətli məhsulların istehsalı sahələrini təmsil edən müəssisələrdən 10-dan çox iş adamı, Azərbaycan tərəfdən isə müvafiq sahələrdə fəaliyyət göstərən 100-dək sahibkar iştirak edib. İqtisadi forumu DAWF-ın idarə heyətinin sədri Marko Qraff açaraq, Almaniya və Azərbaycan iş adamlarının son zamanlar tez-tez keçirilən görüşlərinin əhəmiyyətindən danışıb, dünyanı bürümüş iqtisadi və maliyyə böhranı şəraitində Azərbaycanın sürətli iqtisadi inkişafı, alman şirkətlərinin, eləcə də DAWF-ın ölkəmizdəki fəaliyyəti haqqında qısa məlumat verib.
Baden-Vürtemberq əyalətinin Baş naziri Günter Oettinger belə tədbirlərin iş adamları arasında əlaqələrin daha da genişləndirilməsində mühüm rol oynadığını diqqətə çatdırıb, Azərbaycan ilə Almaniya arasında iqtisadi əlaqələrin yüksələn xətlə inkişaf etməsindən məmnunluğunu bildirib. Əyalətlə respublikamız arasında iqtisadi əlaqələrdən danışan Baş nazir deyib ki, bizim ticarətimizdə enerji daşıyıcıları əsas yer tutur, Azərbaycan bu sahədə çox keyfiyyətli məhsullar təqdim edir.
Azərbaycanın iqtisadi inkişaf naziri Şahin Mustafayev Azərbaycanın xarici iqtisadi əlaqələrində Avropa İttifaqının, o cümlədən Almaniya ilə əməkdaşlığın genişləndirilməsinin mühüm yer tutduğunu və son illərdə bu əməkdaşlığın yüksələn xətt üzrə inkişaf etdiyini söyləyib. Bildirib ki, Prezident İlham Əliyevin Almaniyaya və Almaniyanın yüksək səviyyəli dövlət rəsmilərinin Azərbaycana səfərləri çərçivəsində indiyədək iqtisadi sahədə 27 sənəd imzalanıb və beləliklə, tam əsasla demək olar ki, əməkdaşlığımızın etibarlı hüquqi bazası yaradılıb. Təqdirəlayiq haldır ki, əlaqələrimiz yalnız ticarət əməliyyatları ilə məhdudlaşmır, investisiya, maliyyə-texniki əməkdaşlığı və digər sahələri əhatə edir.
Kənd təsərrüfatı naziri İsmət Abasov Almaniya hökumətinin, onun müxtəlif qurumlarının Azərbaycanda aparılan genişmiqyaslı iqtisadi islahatların, o cümlədən aqrar islahatların həyata keçirilməsində, mütərəqqi texnologiyaların aqrar-sənaye kompleksində tətbiqində yaxından iştirakını vurğulayıb. Bildirib ki, Almaniya Texniki Əməkdaşlıq Təşkilatının təşəbbüsü ilə respublikamızda “Kənd təsərrüfatında özəl təşəbbüslərin dəstəklənməsi”, “İnteqrə edilmiş ərzaq təhlükəsizliyi proqramı”, “Aqrar siyasət məsləhəti” və “Aqrar iqtisadiyyat sahəsində təlim və təkmilləşdirmənin, habelə Cənubi Qafqaz ölkələrində kənd yerlərinin inkişafının dəstəklənməsi” kimi layihələr həyata keçirilib. Son üç ildə Nazirliyin rəhbərliyi və mütəxəssisləri, həmçinin aqrar emal sahəsində fəaliyyət göstərən tanınmış iri şirkətlər Berlində keçirilmiş “Beynəlxalq Yaşıl Həftə” sərgisində, sərgi çərçivəsində təşkil olunmuş “dəyirmi masa”larda, konfranslarda, Alman-Azərbaycan aqrar forumunda iştirak ediblər. çıxışının sonunda İsmət Abasov bu mötəbər tədbirin Azərbaycanda aqrar istehsal və emal sənayesinə investisiya qoyuluşu imkanlarının genişləndirilməsinə, aqrobiznes sektorunun inkişaf etdirilməsinə təkan verəcəyinə əminliyini bildirib.
Sonra iqtisadi forum öz işini Azərbaycan və Baden-Vürtemberq iş adamlarının ikitərəfli görüşləri ilə davam etdirib.

Paylaş:

Baxılıb: 1122 dəfə