Bölgələrin infrastruktur təminatı yaxşılaşmaqdadır

Bakı:

18°C

72%

5m/s

Əlaqə

AZ RU EN

Ana səhifə / Siyasət / Bölgələrin infrastruktur təminatı yaxşılaşmaqdadır

Bölgələrin infrastruktur təminatı yaxşılaşmaqdadır

04.11.2009 [10:43]

Prezident İlham Əliyev: Gələn il və sonrakı illərdə bölgələrdə daha da böyük işlər görüləcək
Prezident İlham Əliyevin regionlara davamlı xarakter alan səfərləri yeni iş yerlərinin yaradılmasını təmin edən müəssisələrin istifadəyə verilməsi, onlarla yeni obyektin təməlinin qoyulması ilə müşayiət olunmaqdadır. Dövlət başçısı 2009-cu il başlayandan indiyədək Mingəçevir, Yevlax, Bərdə, Gədəbəy, Şəmkir, Gəncə, Göygöl, Naxçıvan, Hacıqabul, Quba, Qusar, İsmayıllı, Ağsu rayonlarına səfərlər edib və ən mühüm infrastruktur obyektlərinin, sosial, təhsil, mədəniyyət, səhiyyə, idman və digər bölmələrdə inşa olunan müəssisələrin tikintisinin vəziyyəti ilə yaxından tanış olub.
Prezident İlham Əliyevin hər bir bölgəyə səfəri zamanı müşahidə olunan dinamizm və iqtisadi artım tempi rayonların ildən-ilə inkişafını səciyyələndirən faktor kimi diqqəti cəlb etməkdədir. Belə ki, rayonlarda milli məhsulun artım tempi, yeni iş yerlərinin yaradılması, infrastrukturun yaxşılaşdırılması, əhalinin sosial vəziyyətinin yüksəldilməsi və digər müsbət tendensiyalar ümumilikdə bölgələrin davamlı inkişafının əyani təzahürləri kimi qiymətləndirilə bilər. Son 9 ayda yolların təmiri, yeni magistral yolların çəkilişi, beynəlxalq tələblərə cavab verən hava limanlarının tikintisi, elektrik stansiyalarının, məktəb və xəstəxanaların, mədəniyyət obyektlərinin tikintisi və bərpası, yüzlərlə infrastruktur layihələrinin həyata keçirilməsi investisiya siyasətinin əsas istiqamətlərini təşkil edib və bu, Azərbaycan hökumətinin məqsədyönlü siyasətinin uğurlarını şərtləndirmiş olur.
Regionlarda müşahidə olunan digər bir amil-böhran dövründə rayonların inkişafının təmin edilməsi faktoru iqtisadi siyasətin mühüm təntənəsi kimi xüsusilə diqqəti cəlb edir. Belə ki, 2009-cu ildə bütün dövlətlərin ən mühüm iqtisadi rayonlarında böhranla bağlı real sektorun bir çox sahələri iflasa uğrayaraq fəaliyyətini dayandırdığı halda Azərbaycanın rayonlarında belə bir hal nəzərə çarpmayıb. Bütün rayonlarda iş fəallığı əvvəlkitək yüksək olub, məşğulluğun səviyyəsi artıb və ümumilikdə real gəlirlərin həcmində pozitivlik müşayiət olunub. Bununla yanaşı, respublikamızın bölgələrində infrastruktur, sənaye, nəqliyyat, rabitə, tikinti, kənd təsərrüfatının inkişafında əhəmiyyətli dəyişikliklər baş verib, rayonlara xarici investorların axını geniş miqyas alıb. Yerli istehsalın həcmi əhəmiyyətli dərəcədə artıb və ölkə sahibkarlarının xarici bazarlara çıxışı stimullaşıb. Yol və infrastrukturun yeniləşməsi sahibkarların yeni müəssisələr yaratmasında və istehsal olunan məhsulun bazarlara ixracında əhəmiyyətli rol oynayıb. Rayonlarda soyuducu anbarların inşası və taxıl anbarlarının yaradılması istiqamətində işlərin sürətlənməsi isə iqtisadi inkişafa təkan verməklə yanaşı, əhalinin etibarlı şəkildə ərzaq məhsulları ilə təmin olunmasına dərin baza yaradıb. 2009-cu ilin ötən dövrü ərzində bölgələrdə onlarla istehsal və emal müəssisəsi yaradılıb. Həmin müəssisələrdə on minlərlə yeni iş yerinin açılması gözlənilir və bu istiqamətdə tədbirlərin davam etdirilməsi ümumilikdə yaradılan iş yerlərinin sayının milyonu ötməsinə imkan verəcək.
Hökumətin hər bir regionun mövcud imkanları, təbii resursları, insan potensialı, əhalinin məşğulluq qabiliyyəti, infrastruktur vəziyyəti, onun gələcək inkişafına təsir göstərən amilləri və perspektiv layihələrin həyata keçirilməsi ilə bağlı təfərrüatları dərindən təhlil edərək buna müvafiq şəkildə tədbirləri reallaşdırması əldə olunan uğurlu nəticələri şərtləndirmiş olur. ümumiyyətlə, ən ucqar rayonlarda belə infrastrukturun yaradılması əcnəbi sərmayəçilərin ölkəmizə cəlb olunmasını sürətləndirib və Azərbaycan istehsalçılarının xarici bazarlara çıxışını asanlaşdırıb. Eyni zamanda, ölkəmizdə istehsalın əhəmiyyətli dərəcədə çoxalması ixrac potensialının artmasına imkan verib.
Prezident İlham Əliyev İsmayıllı və Ağsu rayonlarına səfəri zamanı bildirib ki, bölgələrdə infrastruktur layihələri uğurla davam etdirilir və tədbirlər davamlı olacaq. ölkədə yeni iş yerlərinin açılması bölgələrin inkişafı və yeni müəssisələrin yaradılması üçün də çox vacib amildir: “Bu il, gələn il və ondan sonrakı illərdə bölgələrdəki mövcud problemlərin həlli üçün daha da böyük işlər görüləcəkdir. Gələn ilin dövlət büdcəsində bütün bu məsələlər öz əksini tapıbdır”.
Dövlət başçısı əlavə edib ki, infrastruktur layihələrinin reallaşması rayonların inkişafı üçün başlıca şərtlərdəndir: “Əgər bu infrastruktur layihələrini biz icra etməsəydik, bu gün regional inkişafdan, ümumiyyətlə, söhbət gedə bilməzdi. Bu infrastruktur sosial obyektlərin tikintisinə yönəldilibdir, son illər ərzində 1800-ə qədər məktəb tikilibdir, yüzlərlə tibb məntəqələri, tibb ocaqları, xəstəxanalar tikilibdir. Bu proses davam etdirilməlidir və gələn ilin büdcəsində bu məsələlər üçün vəsait nəzərdə tutulur. Bununla bərabər, yolların, su, qaz və elektrik xətlərinin, elektrik stansiyalarının, su anbarlarının tikintisinə qoyulan bütün bu investisiyalar bir məqsədi güdür ki, Azərbaycan iqtisadiyyatı daha da güclü olsun və biz daxili imkanlardan maksimum dərəcədə səmərəli şəkildə istifadə edə bilək”.
ELBRUS CƏFƏRLİ

Paylaş:

Baxılıb: 1118 dəfə