Tariximizin canlı şahidləri danışdı

Bakı:

14 °C

77 %

9 m/s

Əlaqə

AZ RU EN

Ana səhifə / Siyasət / Tariximizin canlı şahidləri danışdı

Tariximizin canlı şahidləri danışdı

31.03.2010 [10:44]

“Soyqırım” sənədli filminin təqdimatı maraqla qarşılandı
Dünən Hökumət Evinin Kino Zalında 1918-ci ilin martında azərbaycanlıların məruz qaldıqları soyqırımına həsr edilmiş “Soyqırım” adlı sənədli filmin təqdimatı keçirilib. Filmin baş məsləhətçisi millət vəkili Qənirə Paşayeva tədbiri giriş sözü ilə açaraq bildirib ki, ermənilərin bu vaxta qədər apardıqları siyasətin-uydurma “soyqırımı” faktının qarşısına yalnız öz həqiqətlərimizlə çıxmalıyıq: “Bu həqiqətlər nədən ibarətdir? Həyatda olan, hələ yaşayan və 1918-ci il soyqırımının şahidləri olan insanların söylədikləri. Biz bu insanları axtarıb tapmalı, onların ifadələrini ekranlara gətirməliyik. Dünya ictimaiyyəti bizim tarixi faktlarımızla, arxivlərdən axtarıb tapdığımız rəqəmlərlə bəlkə maraqlanmaz. Amma taleləri məhv olmuş, ailəsini, yerini-yurdunu itirmiş bu adamlarla maraqlanmaya bilməzlər. Bu insanlar doğmalarını itiriblər, dəhşətlər yaşayıblar və bütün bu əzablara ona görə məruz qalıblar ki, onlar azərbaycanlıdırlar”.
Həmin insanların həyatlarının ekranlaşdırılmasının vacibliyini söyləyən millət vəkili bu işdə ona müraciət edən hər kəsə dəstək verməyə hazır olduğunu da vurğulayıb.
Millət vəkili, tarixçi professor Yaqub Mahmudov da öz çıxışında son bir əsrdə millətimizin başına gətirilən faciələrin şahidi olmuş insanların dünyaya təqdim edilməsi, tanıdılması istiqamətində fəaliyyət göstərilməsinin zərurətə çevrildiyini deyib. Onun fikrincə, biz yalnız bu yolla dünya ictimaiyyətini öz yalanları ilə çaş-baş qoyan erməni fitnəsini alt-üst edə bilərik.
Qeyd edək ki, film Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə hazırlanıb. “Avrasiya Beynəlxalq Araşdırmalar İnstitutu” İctimai Birliyi tərəfindən ekranlaşdırılan əsərdə 1918-ci il martın 31-də Qubada erməni daşnaklarının törətdiyi soyqırımı zamanı valideynlərini, doğmalarını, yaxınlarını itirmiş və həmin dəhşətli hadisələrin canlı şahidi olmuş insanların taleyindən bəhs edilir. Ermənilərin törətdiyi həmin soyqırımı zamanı əziyyətlərin, işgəncələrin şahidi olan, lakin təsadüfən sağ qalan soydaşlarımız doğmalarının məzarlarını belə tapa bilmirlər. Bu insanların uzun illər ərzində çəkdikləri ağrılar filmdə öz əksini tapır. 2007-ci ildə Quba şəhərində aşkara çıxan kütləvi məzarlıq erməni daşnaklarının dinc insanları hansı işgəncələrlə qətlə yetirdiyini, soyqırımına məruz qoyduğunu bütün dünyaya göstərməklə yanaşı, həmin hadisələrdən möcüzə nəticəsində sağ çıxa bilmiş şəxslərin üz tutduğu məkana çevrilib. Erməni daşnakları tərəfindən valideynləri, yaxınları, doğmaları qətlə yetirilən, uzun illər onların qəbirlərini axtaran, hazırda isə əzizlərini yad etmək üçün Quba məzarlığına üz tutan insanların yaşadıqları acılar və onların xatirələri də filmdə öz əksini tapıb. ömürlərinin yaşlı dövrlərini yaşayan bu insanlar filmdə dünya ictimaiyyətindən 1918-ci ilin mart-may aylarında erməni daşnakları tərəfindən onların yaxınlarına, azərbaycanlılara qarşı törədilmiş cinayətlərə, soyqırımına hüquqi qiymətin verilməsini tələb edirlər.
Filmin Azərbaycanın televiziya kanallarında nümayiş etdirilməsi ilə yanaşı, ingilis dili variantının aprel ayında ABŞ-da və Avropanın bəzi ölkələrində təqdimatının keçirilməsi də nəzərdə tutulub. Ssenari müəllifi və rejissoru Etibar Məmmədov, elmi rəyçisi tarix elmləri doktoru, professor Musa Qasımlı olan ekran əsərinin Azərbaycan Xarici İşlər Nazirliyi, Diasporla İş üzrə Dövlət Komitəsi və bir çox dövlət, həmçinin, qeyri-hökumət təşkilatları, diaspor təşkilatları vasitəsilə beynəlxalq ictimaiyyətə çatdırılması da planlaşdırılır.
KƏBUTƏR

Paylaş:

Baxılıb: 1102 dəfə