Asiya Qadınlar Forumunda Azərbaycan cəmiyyətində qadınların rolu barədə məlumat verilib

Bakı:

13 °C

94 %

6 m/s

Əlaqə

AZ RU EN

Ana səhifə / Xəbər lenti / Asiya Qadınlar Forumunda Azərbaycan cəmiyyətində qadınların rolu barədə məlumat verilib

Asiya Qadınlar Forumunda Azərbaycan cəmiyyətində qadınların rolu barədə məlumat verilib

13.05.2024 [15:58]

Milli Məclisin sədri Sahibə Qafarova Özbəkistanın Səmərqənd şəhərində keçirilən Asiya Qadınlar Forumunda iştirak edib.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, "Qadınların iqtisadi, sosial və siyasi hüquq və imkanlarının genişləndirilməsinə regional yanaşma” mövzusunda tədbirdə çıxış edən S.Qafarova gender bərabərliyi və qadınların səlahiyyətlərinin artırılması məsələsinin bir ölkə, bir region ilə məhdudlaşmadığını diqqətə çatdırıb. Vurğulanıb ki, bu, qlobal təsirə malik və coğrafiyasından asılı olmayaraq, hamını narahat edən məsələdir.

Azərbaycanın qadın hüquqlarının inkişafı sahəsində qazandığı nailiyyətlərdən danışan Milli Məclisin sədri Sahibə Qafarova qadınların cəmiyyətimizin ayrılmaz tərkib hissəsi olduqlarını bildirib. Vurğulayıb ki, Azərbaycan qadınlarının ölkənin siyasi, iqtisadi, sosial və mədəni həyatına verdikləri böyük töhfələr ölkəmizdə qadın hüquqlarına yanaşmanı əks etdirir.

Ölkəmizdə qadınların ictimai həyatın bütün sahələrində fəal iştirak etdiklərini və yüksək vəzifələrdə çalışdıqlarını diqqətə çatdıran Milli Məclisin sədri deyib ki, Azərbaycan Respublikasının Birinci vitse-prezidenti Mehriban Əliyevanın həyata keçirdiyi böyük ictimai-siyasi fəaliyyət qadınlarımızın cəmiyyətimizin, ölkəmizin inkişafına dəyərli töhfələrini təcəssüm etdirir.

Bildirilib ki, Azərbaycan Konstitusiyası cinsindən asılı olmayaraq, hər kəsin hüquq və azadlıqlarının bərabərliyinə təminat verir. 2006-cı ildə qəbul edilmiş “Gender bərabərliyi haqqında” Qanun bu sahədə əsas hüquqi bazanı müəyyənləşdirir.

Prezident İlham Əliyevin Qoşulmama Hərəkatında Qadınlar Platformasının yaradılması təşəbbüsü ilə çıxış etdiyini diqqətə çatdıran Milli Məclisin sədri vurğulayıb ki, bu təşəbbüsün reallaşması qadınların hüquqlarının inkişafı üçün daha bir vacib çoxtərəfli mexanizm olacaq. Azərbaycan həm də qadın hüquqlarının müxtəlif aspektləri üzrə müzakirələrin aparılması üçün mühüm məkana çevrilib.

Sahibə Qafarova, həmçinin işğaldan azad edilmiş torpaqlara Böyük Qayıdış, həmçinin ölkəmizin ev sahibliyi edəcəyi COP29 barədə də məlumat verib.

Qeyd edilib ki, kişi və qadınların bərabər hüquqlara malik olması anlayışı əsas dəyərə çevrilməlidir. Gender bərabərliyi və qadınların səlahiyyətlərinin artırılması insan hüquqlarının, sosial ədalətin əsas məsələsidir. Gələcək nəsillər naminə dünyanı yaşamaq üçün daha yaxşı yerə çevirmək üçün gender bərabərliyi problemi bu gün öz həllini tapmalıdır.

Qeyd edək ki, Forumun açılış mərasimində Özbəkistan Prezidenti Şavkat Mirziyoyevin təbriki səsləndirilib. Sonra Özbəkistan Ali Məclisi Senatının sədri Tənzilə Narbayeva, BMT Baş katibinin müavini Sima Sami Bahous, Parlamentlərarası İttifaqın Baş katibi Martin Çunqonq və digərləri çıxış edərək müzakirə olunan mövzu ilə bağlı fikirlərini bildiriblər.

Paylaş:

Baxılıb: 543 dəfə